යහපාලන ආණ්ඩුව පරාජයට මූලිකව හේතු වූ බැදුම්කර හොරුන් තවමත් ආරක්ෂා කරමින්ද, ආණ්ඩුව සමග හොර රහසේ ඩීල් දමමින් ද සිදු කරන ප්රෝඩාකාරී වැඩපිළිවෙළ ජනතාව අනුමත කරනවාදැයි සමගි ජනබලවේගයේ මහලේකම් රංජිත් මද්දුමබණ්ඩාර මහතා ප්රශ්න කර සිටී.
ඒ මහතා පෙන්වා දෙන්නේ එජාපය පිරිසිදු වී සමගි ජනබලවේගය සමග එක් වන්නේනම් මෙහි දොරටු විවෘතව ඇති අතර එය තවදුරටත් පරාජයේ මාවතම තෝරා ගන්නේනම් ඊට අනුකම්පා කරනු හැර විකල්පයක් නැති බවයි
සමගි ජනබලවේගයේ මහලේකම්වරයා නිකුත් කළ නිවේදනය මෙසේය.
විපක්ෂ නායක සහ සමගි ජනබලවේගයේ නායක සජිත් ප්රේමදාස මහතාට එක්සත් ජාතික පක්ෂය සමග එක්වන ලෙස එහි මහ ලේකම්වරයා ආරාධනා කොට සිටී. එය අව්යාජ ආරාධනාවක් බවත් ඔහු පවසා ඇත. එජාප කෘත්යාධිකාරී මණ්ඩලයේ එකගත්වයෙන් සමගි ජනබලවේගය බිහි කළ බව ඇතැම් විට එහි නිලධාරීන්ට දැන් අමතකව ඇතිවා විය හැක.
එහෙත්, එක්සත් ජාතික පාක්ෂිකයින් සිටින්නේ කොතැනදැයි යන්න පසුගිය මැතිවරණයේ දී ජනතාව විසින්ම ඔප්පු කළ අතර එය අහම්බයක් නොවන බව අවධාරණය කළ යුතුය.
එජාපය නාය යාමට හේතුවූ කරුණු පිළිබඳව ස්වයං පාපොච්චාරණයක යෙදීම එම පක්ෂයට පැවරී ඇති හොදම විසදුම වන අතර අපගේ ආණ්ඩුව පරාජයට මූලිකව හේතු වූ බැදුම්කර හොරුන් තවමත් ආරක්ෂා කරමින් ද,ආණ්ඩුව සමග හොර රහසේ ඩීල් දමමින් ද සිදු කරන ප්රෝඩාකාරී වැඩපිළිවෙළ ජනතාව අනුමත කරනවාදැයි විමසා සිටිමු.
ජනතා බලයෙන් පත්වූ පළාත් පාලන නියෝජිතයින් නෙරපා හරිමින් ජනතා ප්රජාතන්ත්රවාදයට මරු පහරක් එල්ල කළ සහ එම මහජන නියෝජිතයින් මන්ත්රීධූරයේ හිලවුවට ප්රාණ ඇපයට ගත් පක්ෂක් විසින් කරන මේ ඉල්ලීම විහිලු සහගත ය. අතීත එජාපයේ තිබූ වටිනාකම්, උදාර පුරුෂාර්ථයන් වර්ථමානයේ තිරව ක්රියාත්මක කරන්නේ සමගි ජනබලවේගය වන අතර එය සද් ජාතිකත්වය මත පදනම්වූ නවීන ගමනක යෙදෙමින් සිටී.
එජාපය පිරිසිදු වී සමගි ජනබලවේගය සමග එක් වන්නේනම් මෙහි දොරටු විවෘතව ඇති අතර එය තවදුරටත් පරාජයේ මාවතම තෝරා ගන්නේනම් ඊට අනුකම්පා කරනු හැර විකල්පයක් නැත.
රංජිත් මද්දුමබණ්ඩාර
මහලේකම්
සමගි ජනබලවේගය
