පසුගිය ජූලි මස 02 වැනි දින අප පුවත්පතේ මුල් පිටුවේ පළවූ ‘සජිත්ට කතාකිරීම තහනම්’ යන ප්රධාන සිරස්තලය මුල් කරගෙන පාර්ලිමේන්තු මන්ත්රී පාඨලී චම්පික රණවක මහතා විසින් සිය වරප්රසාද කඩ වූ බවට පැමිණිල්ලක් පාර්ලිමේන්තුවේ වරප්රසාද කමිටුව වෙත ඉදිරිපත් කොට තිබිණි.Sri Lanka Latest News
අප වෙත ලැබී තිබුණු තොරතුරුවලට අනුව එහිදී අප වාර්තා කළේ විපක්ෂ නායක සජිත් ප්රේමදාස මහතාට මුදල් කමිටුවට පැමිණ අදහස් පළකිරීම සම්බන්ධයෙන් සිදුකරනු ලැබ තිබූ මත විමසීමේදී පාඨලී චම්පික රණවක මහතා ඡන්දය ලබාදීමෙන් වැළකී සිටි බවය.
කෙසේ වෙතත් පාඨලී චම්පික රණවක මහතා විසින් වරප්රසාද කමිටුවට ඉදිරිපත් කරන ලද පැමිණිල්ලේ සඳහන් වන්නේ එම ඡන්ද විමසීමේදී විපක්ෂ නායකවරයා තම අදහස් දැක්වීමට ඉඩ දිය යුතු බවට වූ යෝජනාවට පක්ෂව මුදල් කමිටුවේදී තමන් ඡන්දය භාවිත කිරීමට කටයුතු කර ඇති බවකි. ඒ බව චම්පික රණවක මහතා විසින් සිය පැමිණිල්ල සමග ඉදිරිපත් කර ඇති ඡායාරූපවලින්ද තහවුරු වී තිබේ.
ඒ අනුව අප පළකළ පුවත මගින් පාඨලී චම්පික රණවක මහතාට යම් කිසි අපහසුතාවක් සිදුවූයේ නම් ඊට කොන්දේසි විරහිතව කනගාටුව ප්රකාශ කරන බව මෙයින් දැනුම් දී සිටිමු.
මීට අමතරව අදාළ කමිටුවේදී ගත් තීන්දු තීරණ පාර්ලිමේන්තුවට වාර්තා කරන තෙක් මාධ්යයට ලබා නොදීමට මුදල් කාරකසභාවේ සභාපති හර්ෂ ද සිල්වා මහතා විසින් ගෙන තිබූ තීරණයද මුල් අවස්ථාවේදී අප වෙත වාර්තා වී තිබුණේ නැත. ඒ අනුව අදාළ පුවත රටට වැදගත් පුවතක් සේ සලකා අප පළ කළේද මුදල් කමිටුව ගත් එම තීන්දුව පිළිබඳ පූර්ව දැනුවත්භාවයකින් තොරවය.
එම නිසා අපගේ අනාවරණයෙන් මුදල් කමිටුවටද යම් අපහසුතාවකට මුහුණ දීමට සිදුවූයේ නම්, ඒ පිළිබඳවද අපගේ කොන්දේසි විරහිත කනගාටුව මෙයින් පළකර සිටිමු.
