සේවකයන් නව දෙනෙකුගේ වැඩ තහනම් කරමින් ශ්රී ලංකා ඉංජිනේරු සංස්ථාවේ පරිපාලනය ගෙනයන කම්කරු මර්දනයට එරෙහිව සේවකයන් දෙදෙනෙකු ආයතනයේ වහල මත නැගී විරෝධය දක්වමින් සිටින බව වාර්තා වේ.
ඉංජිනේරු සංස්ථා ගොඩනැගිල්ල මත නැගී සේවක දඩයම නවතා දැමීම ඇතුළු සිය ඉල්ලීම් අවධානයට ගන්නා ලෙස බල කරමින් ඔවුන් මෙම විරෝධතාවයේ නියුතුව සිටින බව වාර්තා වේ.
මේ අතර රාජ්ය ඉංජිනේරු සංස්ථාවේ සේවකයින් සඳහා මේ මාසය වෙනුවෙන් වැටුප් ගෙවීමට නොහැකි තත්වයක් මතුව ඇති බවත්, ආයතනයේ සේවකයින්ට මේ මාසයේ සිට වැටුප් ගෙවීමට මුදල් නැතැයි සංස්ථාවේ සභාපතිවරයා පැවසු බවත් ඒකාබද්ධ ඉංජිනේරු සේවා සේවක සංගමයේ කැඳවුම්කරු දුමින්ද නාගමුව පවසයි.
සංස්ථා සභාපතිවරයා ඒ බව සඳහන් කර ඇත්තේ, ඒකාබද්ධ ඉංජිනේරු සේවා සේවක සංගමයේ නියෝජිතයින් පිරිසක් සමග පැවතී සාකච්ජාවකදීය.
පසුගිය මාස දෙකේදී ද සේවක වැටුප් ගෙවා ඇත්තේ මුදල් අමාත්යංශයෙන් ලබාදුන් සහනයක් මත බව පවසා ඇති සභාපතිවරයා, මේ මාසයට වැටුප් සඳහා මුදල් ගෙවීම මුදල් අමාත්යංශ ලේකම්වරයා විසින් ප්රතික්ෂේප කර ඇතැයි ද වෘත්තීය සමිති නියෝජිතයින්ට පවසා තිබේ.
