ජනාධිපතිවරණ සටනේදී වත්මන් විපක්ෂ නායකයාට සහාය දීමට ඉලංගෙයි තමිල් අරසු කච්චි මධ්යම කාරක සභාව ගත් තීන්දුව පිළිබද තමන් නොදැනුවත් බව එහි සභාපති මාවෙයි සේනාධිරාජා පළමුව ප්රකාශ කොට තිබුණද පසුව එම තීන්දුව පිළිගත යුතු බව ඊයේ (02) හෙතෙම යාපනයේදී මාධ්යවේදීන්ට පවසා තිබේ.Sri Lanka Latest News
“තමිල් අරසු කච්චි මධ්යම කාරක සභාව මේ මැතිවරණය ගැන ගත්තු තීන්දුව ක්රියාත්මක කිරීමේ වගකීම අපට තිබෙනවා. ඒක තමිල් අරසු කච්චි වගකීම. ඒක අපි ඉටු කරන්න ඕනෙ. ඒත්, මැතිවරණයේ තීන්දු ගැනීමේදී ජනතාව සිතා බලා විශේෂයෙන් දෙමළ ජාතියේ අනාගත විමුක්තිය ගැන හිතලා ඡන්දය ප්රකාශ කරන්න ඕනේ.”
හිටපු මන්ත්රී වී ධර්මලිංගම්ගේ අනුස්මරණයට එක්ව සිටි ඉලංගෙයි තමිල් අරසු කච්චි සභාපති මාවෙයි සේනාධිරාජා සැප්තැම්බර් 2 වැනිදා යාපනයේ දී මෙසේ පැවසීය.
ඉලංගෙයි තම්ල් අරසු පක්ෂය (ITAK) වව්නියාවේ පැවති විශේෂ මධ්යම කාරක සභා රැස්වීමකදී සජිත් ප්රේමදාස මහතාට සහාය ලබා දීමට තීරණය කළ බව පාර්ලිමේන්තු මන්ත්රී එම් ඒ සුමන්දිරන් සැප්තැම්බර් 1 වැනිදා නිවේදනය කළේය.
පසුව මාවෙයි සේනාධිරාජා පවසා තිබුනේ එය තමන් නොමැති සභාවක ගත් තීරණයක් මිස පක්ෂයේ නිල මතය නොවන බවයි.
එහෙත් ඊට පසු දිනම පෙර දිනයේ තමන් සිදු කළ ප්රකාශය කනපිට හරවමින් පක්ෂයේ මතය පිළිගත යුතු බව පැවසු හිටපු මන්ත්රී මාවෙයි සේනාධිරාජා තවදුරටත් අවධාරණය කර තිබුනේ දෙමළ දේශයේ වැසියන් එකමුතුව ජාතියේ විමුක්තිය වෙනුවෙන් මැතිවරණය පාවිච්චි කළ යුතු බවයි.
“ඒ වගේම දෙමළ ජනතාව, දෙමළ දේශයේ සියලුම පලාත්වල ජනතාව අපි සියලු දෙනාම එක්සත් වෙලා අපේ ජාතියේ විමුක්තිය වෙනුවෙන් මේ මැතිවරණය පාවිච්චි කරන්න ඕනේ. ඒ විමුක්තිය අපිට ඉතාම වැදගත්. ඒ විමුක්තිය වෙනුවෙන් අපි හැමෝම එක්ව කටයුතු කරන්න ඕනේ කියලා මම ඉල්ලා සිටිනවා.” යැයි හෙතෙම කියා තිබිණ.
කෙසේවෙතත් තමිල් අරසු කච්චි පක්ෂය සජීත් ප්රේමදාස මහතාට සහාය පළ කිරීමට ගත් තීන්දුවට වඩා වැඩි ප්රචාරයක් මාවෙයි සේනාධිරාජා මහතාගේ මෙම පුවතට දකුණේ එක්තරා රූපවාහිනී නාළිකාවකින් සහ ජනාධිපතිවරයාට, ජවිපෙට හිතවත් පිරිස් විසින් ලබා දෙමින් සිටි ආකාරයක් දැකගන්නට ලැබිණ.
එය කෙතරම්ද කියනවා නම් ඊයේ දින මාවෙයි සේනාධිරාජා මහතා විශේෂ ප්රකාශයක් මගින් තමන් පක්ෂ තීන්දුවට අනුව යමින් සජිත් ප්රේමදාස මහතාට සහාය පළ කරන බව ප්රකාශ කර තිබුණද ඊයේ රාත්රියෙත් එම රූපවාහිනී නාළිකාව මාවෙයි සේනාධිරාජා මහතා සජිත් ප්රේමදාස මහතාට සහාය පළ කොට නොමැති බව වාර්තා කළේය.
