යුක්රේනයේ රුසියානු ආක්රමණයේ හතරවන සතිය ගතවන විට දෙරට අතර සාම ගිවිසුමක මූලික කටයුතු ආරම්භ වෙමින් පවතී.
මේ බවට ඉඟි පලකරමින් රුසියානු ජනාධිපති ව්ලැඩිමීර් පුටින් සහ තුර්කි ජනාධිපති Recep Tayyip Erdogan අතර පැවති දුරකථන සංවාදයකදී රුසියානු ජනාධිපතිවරයා ඒ සඳහා වන සිය ඉල්ලීම් ඉදිරිපත් කර තිබේ.
මේ අතර, රුසියානු හමුදා ක්රිමියාවේ සිට නැගෙනහිර සහ බටහිර දෙසින් ඉදිරියට ගමන් කරමින් යුක්රේනයේ දකුණු ප්රදේශයේ යම් ජයග්රහණයන් ලබා ගැනීමට සමත්වී ඇත.
රුසියානු භට පිරිස් කියෙව් අගනුවර වටකර යටත් කරගැනීමට උත්සාහ කරන නමුත් නගරය සහ ඒ අවට විශාල ප්රදේශයක් තවමත් යුක්රේන පාලනය යටතේ පවතී.
රුසියානු ආක්රමණය ආරම්භ වීමට ප්රථම රුසියාව විසින් කියෙව් අගනුවරට දරුණු සහ වේගවත් ප්රහාරයක් එල්ල කරනු ඇතැයි අනාවැකි පල උවද මේ වන විට රුසියානු හමුදා අවම ජයග්රහණයන් පමණක් ලබා ගනිමින් යුක්රේනය තුල සිරවී සිටින අයුරු දක්නට ලැබේ.
ඒ අතර රුසියානු හමුදාවේ විශාල පිරිසක් මියගොස් ඇති බවද වාර්තා වේ.
යුක්රේනයේ දෙවන ප්රධාන නගරය වන Kharkiv නගරය සති තුනක් තිස්සේ රුසියානු ප්රහාරවල නිරන්තර ඉලක්කයක් වී ඇත.
සති තුනක දරුණු සටන්වලින් පසුවත්, රුසියානු හමුදාවන් යුක්රේනයේ දෙවන විශාලතම නගරය අල්ලා ගැනීම වළක්වමින් තවමත් Kharkiv හා තදාසන්න ප්රදේශයේ බලය අල්ලාගෙන සිටීමට යුක්රේන හමුදාව සමත් වී තිබේ.
රුසියාව ඩ්රෝන යානා, ගුවන් යානා, ප්රහාරක හෙලිකොප්ටර්, වැනි සියල්ල භාවිතා කරමින් මිලියන 1.4 ක ජනතාවක් වාසය කළ නගරයට දිවා රෑ බෝම්බ හෙලති.
රුසියානු ෂෙල් වෙඩි ගිගුරුම් දෙමින් මාර්ග සහ අවට මහල් නිවාසවලට පහර දෙමින් සිටි.
ඒ අතර රුසියානු හමුදා විසින් යුක්රේනයේ මරියුපෝල් නගරයේ නට්ය ශාලාවකට බෝම්බ හෙලා විනාශ කර දමා ඇත.
ඒ අවස්ථාව වන විටත් එම ශාලාව තුල සිවිල් වැසියන් සිය ගණනක් සිට ඇති අතර ඔවුන් බිම් මහලේ සැඟවී දිවි ගලවා ගැනීමට සමත් වී ඇත.
කෙසේ වෙතත් ගලවා ගැනීමේ සහන සේවකයන් මේ වන විටත් සුන්බුන් ඉවත් කරමින් දිවි ගලවා ගත් ජනතාව පිටතට ගනිමින් සිටින බව වාර්තා වේ.
මම තිලාන් ජයසේකර
බ්රිතාන්යයේ ලන්ඩන් නුවර සිට
