රොබෝ තාක්ෂණය සඳහා වන විශිෂ්ටතා මධ්යස්ථානයට මීට වසර තුනකට පෙර මිලදී ගත් රුපියල් කෝටි අටක් වටිනා රොබෝ යන්ත්ර ඇතුළු උපකරණ ගොඩනැගිල්ලක දමා ඊට ඇතුළුවීමට නොහැකි වන ලෙස අගුලු දැමීමට කර්මාන්ත අමාත්යංශ ඉහළ නිලධාරීන් කටයුතු කර ඇති බව ලංකා කාර්මික සංවර්ධන මණ්ඩලයේ සභාපති උපසේන දිසානායක පවසයි.
එම රොබෝ යන්ත්ර සම්බන්ධව තමා කිසිවක් නොදන්නා බව සභාපතිවරයා සඳහන් කළේය.
රොබෝ තාක්ෂණය සඳහා වන විශිෂ්ටතා මධ්යස්ථානය ස්ථාපිත කිරීමට ලංකා කාර්මික සංවර්ධන මණ්ඩලයේ ගොඩනැගිල්ලක් නවීකරණය කිරීමට හා යන්ත්ර උපකරණ මිලදී ගැනීමට 2017 වසරේ කැබිනට් අනුමැතිය හිමි විය. එම මධ්යස්ථානය 2018 වසරේ ස්ථාපිත කිරීමට රජය කටයුතු කර ඇත.
මෙම මධ්යස්ථානය ස්ථාපිත කිරීම සඳහා ලංකා කාර්මික සංවර්ධන මණ්ඩලයේ ගොඩනැගිල්ල නවීකරණය කිරීමටද රුපියල් කෝටි හතරක මුදලක් වැය කොට තිබේ. එම ගොඩනැගිල්ලට සහ රොබෝ යන්ත්රවලට මෙලෙස රුපියල් කෝටි දොළහක් වැයකරමින් රොබෝ තාක්ෂණය සඳහා වන විශිෂ්ටතා මධ්යස්ථානය ස්ථාපිත කළද ඉන් මෙතෙක් කිසිදු ප්රයෝජනයක් ගෙන නැති බව අනාවරණය වෙයි.
එකී රොබෝ යන්ත්ර ඇතුළු උපකරණ භාවිත නොකිරීම නිසා ඒවා මළ බැඳී ඇති අතර මුරපද ඇතුළත් කර ඇති ඇතැම් මෘදුකාංග ක්රියාත්මක කිරීමටද නොහැකි වී තිබෙන බව විගණකාධිපතිවරයාගේ වාර්ෂික වාර්තාවේ සඳහන් වෙයි.
මෙම විශිෂ්ටතා මධ්යස්ථානය සඳහා විධායක ශ්රේණියේ නිලධාරියකු බඳවාගෙන තිබූ අතර 2017 වර්ෂයේ සැප්තැම්බර් මාසයේ සිට 2018 වසරේ ඔක්තෝබර් මාසය දක්වා මාසයකට රුපියල් හත්ලක්ෂ විසිපන්දහසක් බැගින් රුපියල් මිලියන එකොළහක් වැටුප් සහ දීමනා වශයෙන් ගෙවා තිබෙන බව විගණකාධිපතිවරයා අනාවරණය කරයි.
එවක කර්මාන්ත අමාත්යංශය යටතේ පැවැති මෙම ම්යස්ථානයේ අසාර්ථකත්වය මත 2018 දෙසැම්බර් මස 28 වැනි දින අංක 2013 /14 දරන ගැසට් පත්රය මගින් විද්යා හා තාක්ෂණ අමාත්යංශය යටතට මෙය පවරා 2020 නොවැම්බර් මස 16 වැනි දින කැබිනට් තීරණයකට අනුව යළි කර්මාන්ත අමාත්යාංශය යටතට පවරාගෙන තිබේ.
