මෙතෙක් කිසිදු කොරෝනා මර්දන එන්නත් මාත්රාවක් ලබාගෙන නැති වයස අවුරුදු 60 ඉක්ම වූ පුද්ගලයන් හැටහත්දහසක් සිටින බවට අනාවරණ වී ඇත.
ඉන් වැඩි පිරිසක් යාපනය දිස්ත්රික්කයේ වන අතර එම පිරිස විසිදහසකි.
එමෙන්ම අම්පාර සහ පොලොන්නරුව දිස්ත්රික්කවල පමණක් වයස අවුරුදු 60 ඉක්ම වූ සියලු පුද්ගලයන් එන්නත්කරණයට යොමුව ඇත.
වයස අවුරුදු 60ට වැඩි පුද්ගලයන් එන්නත්කරණයට යොමු වීම සම්බන්ධයෙන් තොරතුරු රැස් කරන ලෙස ජනාධිපතිවරයා ස්වදේශ කටයුතු අමාත්යාංශ ලේකම් එම්. එච්. එම්. චිත්රානන්දට පසුගියදා දැනුම් දී තිබුණි.
ඒ අනුව සිය වසම්වල එන්නත් කළ නොකළ වයස අවුරුදු 60ට වැඩි පුද්ගලයන් සම්බන්ධයෙන් සොයා බලා වාර්තාවක් ලබා දෙන ලෙස ස්වදේශ කටයුතු රාජ්ය අමාත්යාංශ ලේකම්වරයා ග්රාම නිලධාරීන්ට උපදෙස් ලබා දුනි.
එලෙස ලබා දුන් උපදෙස් මත ග්රාම නිලධාරීන් ඇතුළු ක්ෂේත්ර නිලධාරීන් කරනු ලැබූ විමර්ශනයකින් මෙම තොරතුරු අනාවරණය වූ බව ස්වදේශ කටයුතු රාජ්ය අමාත්යාංශ ලේකම් එම්. එච්. එම්. චිත්රානන්ද පැවසීය.
මෙරට සිටින වයස අවුරුදු 60ට වැඩි සමස්ත පුද්ගලයන් සංඛ්යාව ලක්ෂ 36ක් වේ.
