කුලී හේවායන් ලෙස රුසියාවට මෙරට විශ්රාමික හමුදා සාමාජිකයන් රැගෙන යාමේ මිනිස් ජාවාරම සම්බන්ධයෙන් තවත් හිටපු යුද්ධ හමුදා නිලධාරීන් පස්දෙනෙකු පමණ ඉදිරියේදී අත්අඩංගුවට ගැනීමට නියමිත බව අපරාධ පරීක්ෂණ දෙපාර්තමේන්තුව කියයි.Sri Lanka Latest News
එමෙන් ම ලැබෙන පැමිණිලි අනුව අත්අඩංගුවට ගැනීමට නියමිත පුද්ගලයන් ගණන මීට වඩා වැඩි විය හැකි බව ද එම දෙපාර්තමේන්තුව සඳහන් කරයි.
ඊට අමතරව සිවිල් පුද්ගලයන් කිහිප දෙනෙකු ද අත්අඩංගුවට ගැනීමට නියමිත බව සඳහන් ය.
අපරාධ පරීක්ෂණ දෙපාර්තමේන්තුවේ තැනැත්තන් වෙළෙඳාම්, මිනිස් ජාවාරම සහ සමුද්රීය අපරාධ විමර්ශන කිරීමේ කොට්ඨාසයේ උසස් නිලධාරියෙකු කීවේ දැනට කර ඇති විමර්ශනවලට අනුව ඉදිරියේදී මෙම පිරිස් අත්අඩංගුවට ගන්නා බව ය.
එමෙන් ම දැනට ලබා දී ඇති ප්රකාශවලට අනුව මෙම නිලධාරීන් සහ සිවිල් පුද්ගලයන් හඳුනාගෙන ඇති බව ද එම නිලධාරියා අවධාරණය කළේය.
රුසියානු – යුක්රේන යුද්ධයට මැදි වී සිටින ශ්රී ලාංකිකයන් සම්බන්ධයෙන් සොයා බැලීමට රුසියාව බලා යාමට නියමිත නිලධාරීන් සමග ද අපරාධ පරීක්ෂණ දෙපාර්තමේන්තුවේ උසස් නිලධාරීන් සාකච්ඡා කර මෙතෙක් කළ විමර්ශනවල ප්රගතිය ද දැනුම් දීමට නියමිතය. එමෙන් ම මෙම මිනිස් ජාවාරම සම්බන්ධයෙන් තොරතුරු ලබා දීම සඳහා ආරක්ෂක අමාත්යාංශයේ ස්ථාපිත දුරකතන අංකයට ලැබෙන තොරතුරු ද එකිනෙක විශ්ලේෂණය කරන බවත් එම තොරතුරු ගැන මෙරටින් යැවෙන දූත පිරිස දැනුවත් කරන බවත් අපරාධ පරීක්ෂණ දෙපාර්තමේන්තු ආරංචි මාර්ග කීවේ ය.
සිද්ධිය සම්බන්ධයෙන් විශ්රාමික මේජර් ජෙනරාල්වරයෙකු, විශ්රාමික යුද හමුදා මාණ්ඩලික සැරයන්වරයෙකු, විශ්රාමික මේජර්වරයකු ඇතුළු දිගන, මාවනැල්ල සහ නුගේගොඩ ප්රදේශයේ පදිංචිකරුවන් සහ ඒජන්සිකරුවන් රක්ෂිත බන්ධනාගාරගත කර තිබේ.
