කැලණිය විශ්ව විද්යාලයේ පරිගණක හා තාක්ෂණ පීඨය මාස 12කින් ප්රතිඵල නිකුත් කර නැහැ – අන්තර් විශ්වවිද්යාල ශිෂ්ය බල මණ්ඩලයේ කැඳවුම්කරු වසන්ත මුදලිගේ තේරීම් කාරක සභාව හමුවේ හෙළි කරයි
• පේරාදෙණිය විශ්වවිද්යාලයේ සම සෞඛ්ය විද්යා පීඨය තවමත් අධ්යයන කාලසටහන ඉදිරිපත් කර නැහැ
• ඉදිරි කටයුතු පිළිබඳ සාකච්ඡා කිරීම සඳහා උපකුලපතිවරුන්, උසස් අධ්යාපන අමාත්යාංශය, අන්තර් විශ්ව විද්යාල ශිෂ්ය බලමණ්ඩලය සහ අනෙකුත් අදාළ පාර්ශ්ව පාර්ලිමේන්තු තේරීම් කාරක සභාව වෙත කැඳවීමට පියවර.
කැලණිය විශ්වවිද්යාලයේ පරිගණක හා තාක්ෂණ පීඨය මාස 12කින් ප්රතිඵල නිකුත් නොකිරීම නිසා සිසුන් දැඩි පීඩාවට පත්ව ඇති බව අන්තර් විශ්වවිද්යාල ශිෂ්ය බලමණ්ඩලයේ (අවිශිබම) කැඳවුම්කරු වසන්ත මුදලිගේ මහතා අනාවරණය කළේය.
ඔහු මේ බව ප්රකාශ කළේ ශ්රී ලංකාවේ උසස් අධ්යාපන අවස්ථා පුළුල් කිරීම සඳහා සුදුසු නිර්දේශ ඉදිරිපත් කිරීම සඳහා පාර්ලිමේන්තු තේරීම් කාරක සභාව වෙත කැඳවූ අවස්ථාවේදීය. කාරක සභාව එහි සභාපති අධිකරණ අමාත්ය (ආචාර්ය) ජනාධිපති නීතිඥ විජයදාස රාජපක්ෂ මහතාගේ ප්රධානත්වයෙන් පසුගියදා (25) පාර්ලිමේන්තුවේදී රැස්විය.
ශ්රී ලංකාවේ උසස් අධ්යාපන අවස්ථා පුළුල් කිරීම සඳහා සුදුසු නිර්දේශ ඉදිරිපත් කිරීම සඳහා වූ පාර්ලිමේන්තු තේරීම් කාරක සභාව, උසස් අධ්යාපනය සම්බන්ධයෙන් පවතින ගැටලු සාකච්ඡා කිරීමට සහ ඒ සඳහා ඉදිරිපත් කළ හැකි යෝජනා සහ ඉදිරි කටයුතු පිළිබඳ සොයා බැලීම පිණිස අන්තර් විශ්වවිද්යාල ශිෂ්ය බල මණ්ඩලය කමිටුව හමුවට කැඳවා තිබිණි.
අධ්යාපනය වරප්රසාදයක් නොව අයිතිවාසිකමක් විය යුතු බව අවධාරණය කළ අන්තර් විශ්වවිද්යාල ශිෂ්ය බල මණ්ඩලයේ කැඳවුම්කරු පෙන්වා දුන්නේ උසස් අධ්යාපන ක්රමයේ පවතින දුර්වලතා හේතුවෙන් මතුවන පීඩනය දරා ගත නොහැකිව බොහෝ සිසුන්ගේ විශ්වවිද්යාලය අධ්යාපනය බිඳ වැටෙන බවයි.
තවද, පේරාදෙණිය විශ්ව විද්යාලයේ සම සෞඛ්ය විද්යා පීඨය තවමත් අධ්යයන දින කාලසටහන ඉදිරිපත් කර නොමැති බවත් සබරගමුව විශ්වවිද්යාලය තවමත් විභාග පැවැත්වීමට කටයතු කර නොමැති බවත් මෙහිදී අනාවරණය විය.
ඒ අනුව, උසස් අධ්යාපන අමාත්යාංශය, සියලුම විශ්වවිද්යාලවල උපකුලපතිවරුන්, අන්තර් විශ්වවිද්යාල ශිෂ්ය බලමණ්ඩලයේ නියෝජිතයන් ඇතුළු අදාළ සියලු පාර්ශ්වයන් සාමූහිකව සාකච්ඡා කිරීම සඳහා කාරක සභාව හමුවට කැඳවා ඉදිරි කටයුතු පිළිබඳ සාකච්ඡා කිරීමට කමිටුව තීරණය කළේය.
කමිටු සාමාජිකයන් වන රාජ්ය අමාත්ය ගරු. (වෛද්ය) සීතා අරඹේපොල, ගරු පාර්ලිමේන්තු මන්ත්රීවරයන් වන ගරු රවුෆ් හකීම්, ගරු අනුර ප්රියදර්ශන යාපා, ගරු එරාන් වික්රමරත්න, ගරු (මහාචාර්ය) චරිත හේරත් සහ ගරු දයාසිරි ජයසේකර මහතා යන මහත්ම මහත්මීන් කාරක සභා රැස්වීමට සහභාගි වූහ.
