මහනුවර නගරයෙන් හරි අඩක්ම මේ වන විට ජලයෙන් යට වී තිබේ. මහනුවර දුම්රිය ස්ථානය ජලයෙන් යටවී ඇති අතර, එහි කටයුතු මුළුමනින්ම ඇණහිට ඇත.
අද (25) අලුයම් කාලයේ පටන් මහනුවර නගරයට පැවැති දැඩි වර්ෂාව හේතුවෙන් මහනුවර නගරයේ පහළ කොටස ලෙස සැලකෙන දුම්රිය ස්ථානය පෙදෙස මෙසේ ජලයෙන් යටවී තිබිණි.
පැය පහකට අධික කාලයක් නොනවත්වා ගලා ආ ජලයෙන් මහනුවර දුම්රිය ස්ථානය වැසීගොස් ඇත.
දුම්රිය ස්ථාන පිවිසුමේ සිට පදික වේදිකා, දුම්රිය මාර්ග ජලය පිරී එකම ජලාශයක් ලෙස දිස්විය. වැසි ජලයෙන් දුම්රිය සථානයට විශාල හානියක් සිදුවී ඇත.
මහනුවර නගරයේ සිට විලියම් ගොපල්ලව මාවත දෙසට යන මැද ඇල ද උතුරා යෑමෙන් විලියම් ගොපල්ලව මාවතේ සුදුහුම්පොල කොටස ද සම්පූර්ණයෙන් ජලයෙන් යටවී ඇත. සුදුහුම්පොල කොටස ඇත්තේ දුම්රිය මාර්ගයට ඉහළිනි.
මේ සම්බන්ධව අදහස් දක්වන මහනුවර ප්රධාන දුම්රිය ස්ථානාධිපති ආර්එම්පී රත්නායක ප්රකාශ කර සිටියේ බෝගම්බර දෙසින් ගලා ආ ජලකඳ හේතුවෙන් කෙටි කාලයකින් දුම්රිය ස්ථානය මුළුමනින්ම ජලයෙන් යටවී ගිය බවයි.
බෝගම්බර ක්රීඩාංගනය පෙදෙසේ මාර්ග ඉදිකිරීම් සහ ගොඩනැගිලි ඉදිකිරීම් අවසන් නොකිරීම නිසා ජලය බැසයන මාර්ග අවහිර වී තිබීමත්, කඩිනම් සංවර්ධන ක්රියාමාර්ග යටතේ ආරම්භ කළ සෑම ඉදිකිරීමක්ම පාහේ නතර කර දමා තිබීමෙන් ජල බැස්මට බාධා ඇතිවීමත් මීට හේතුව විය හැකි බව ඔහු කීවේය.
lankasara
