මිද්දෙණිය තෝරයාය ප්රදේශයේ ඉඩමක වළ දමා තිබියදී සොයා ගත් රසායන ද්රව්ය තොගයේ සාම්පල බහුතරයක මෙතෆෙටමින් අඩංගු බව අනාවරණය වී තිබෙනවා. Sri Lanka Latest News
එම තොරතුරු ඇතුළත් වාර්තාව ජාතික අන්තරායකර ඖෂධ පාලක මණ්ඩලය විසින් මේ වනවිට බස්නාහිර පළාත් උතුර අපරාධ කොට්ඨාසයට භාර දී ඇති බව සඳහන්.
සංවිධානාත්මක අපරාධකරුවෙකු මෙන්ම මත්ද්රව්ය ජාවාරම්කරුවෙකු වන කෙහෙල්බද්දර පද්මේ සමග ඉන්දුනීසියාවේදී අත්අඩංගුවට ගත් බැකෝ සමන්ගෙන් කළ ප්රශ්න කිරීම්වලදී අයිස් මත්ද්රව්ය නිෂ්පාදනය සඳහා යොදාගන්නා බවට සැක කෙරෙන රසායන ද්රව්ය තිබූ බහාලුම් දෙකක් මිද්දෙණිය තෝරයාය ප්රදේශයේ ඉඩමක තිබී පසුගිය දා සොයා ගත්තා.
මිද්දෙණියෙන් ගොඩ බා ඇති මෙම රසායන ද්රව්යවලින් කොටසක් ඊට දින කිහිපයකට පසු නුවරඑළිය ප්රදේශයේ අයිස් මත්ද්රව්ය නිෂ්පාදනය කරන බව කියන ස්ථානයකට රැගෙන ගොස් ඇති බවට ද අනාවරණ වූ අතර, පසුව ඒවා යළි හම්බන්තොටටත්, හම්බන්තොටින් ගොඩගමටත්, ගොඩගමින් කඳානටත් රැගෙන ගොස් තිබුණා.
ඒවා ගොඩ ගැනීමෙන් අනතුරුව රජයේ රස පරීක්ෂක දෙපාර්තමේන්තුව හා ජාතික අන්තරායකර ඖෂධ පාලක මණ්ඩලය එහි සාම්පල කොටස් රැගෙන ගියේ එම රසායන ද්රව්යවල අඩංගුවන දෑ පරීක්ෂා කිරීම සඳහායි.
ජාතික අන්තරායකර ඖෂධ පාලක මණ්ඩලය එම රසායන ද්රව්ය සම්බන්ධයෙන් වන වාර්තාව පසුගිය සිකුරාදා, බස්නාහිර පළාත උතුර අපරාධ කොට්ඨාසය වෙත භාර දී තිබෙනවා.
මෙම රසායන ද්රව්ය සැඟවීමට ආධාර අනුබල දුන් බවට ශ්රී ලංකා පොදුජන පෙරමුණේ සාමාජිකයෙකු වූ සම්පත් මනම්පේරි නමැත්තාට චෝදනා එල්ල වූ අතර මෙම රසායන ද්රව්ය ගොඩබාන අවස්ථාවේ ද ඔහු එම දර්ශනවල දක්නට ලැබුණා. කෙසේ වෙතත් තවමත් ඔහු අතුරුදන්ව සිටින අතර, ඔහු සොයා තවදුරටත් විමර්ශන ක්රියාත්මකයි.
