නාමල් රාජපක්ෂ මහතා ජනාධිපති වූ දවසක තමන් මෙරට නිල නොලත් ජනාධිපතිවරයා බවට පත්වන්නේ යැයි තිස්සකුට්ටිආරච්චි මහතා පසුගියදා කළ ප්රකාශය සම්බන්ධයෙන් ශ්රී ලංකා පොදුජන පෙරමුණේ මහලේකම් නීතිඥ සාගර කාරියවසම් මහතා විසින් තිස්සකුට්ටිආරච්චි මහතාට දැඩි ලෙස අවවාද කර ඇතැයි මාධ්ය වාර්තා කර තිබිණි.
විශේෂයෙන්ම, ප්රසිද්ධ රැස්වීම්වලදී වගකීම් විරහිත ප්රකාශ කිරීමෙන් වළකින ලෙස ඔහුට කාරියවසම් මහතා විසින් දැනුම් දී ඇතැයි පැවැසේ. කෙසේ වෙතත් පසුගිය 29 වැනිදා ජන හමුවකට එක්වූ තිස්සකුට්ටිආරච්චි මහතා ඒ සම්බන්ධයෙන් සිය ප්රතිචාරය මෙලෙස දක්වා සිටියේය.Sri Lanka Latest News
‘වැඩිය මොකුත් කියන්න හොඳ නෑ. මට දැන් වචනයක් එහා මෙහා වෙනකොට උන්දලා ඉන්නේ අරගෙන තඩිබාන්නනේ මට. ඒ නිසා මට කියලා තියෙන්නේ පරිස්සමෙන් කතාකරන්න කියලා. ඒක නම් කරන්න බෑ මේ මාධ්ය තියෙනවනෙ. තිස්ස කුට්ටිආරච්චිට පරිස්සමෙන් කතාකරලා පුරුදු නෑ. ඇයි? මම ගමේ බයියානේ. මම ගමේ බයියා. මම කතාකරන්නේ ගමට. මට හොඳට සරම කමිසේ ඇඳලා, වෙල් ඉපනැල්ලේ පිනුම් ගහලා, කැත්ත උදැල්ලෙන් වැඩ අරගෙන, වී ටික හුළං කරලා, බැත බෝ කරලා, ගොයම් ටික ඔළුව උඩ තියාගෙන ගිහිල්ලා පුරුදු එකා මම. මම හම්බන්තොට බෙලිඅත්තේ, මම හම්බන්තොට ලුණුගම්වෙහෙර තිස්සමහාරාමේ. මම ගමේ බයියා. ගමේ බයියාගේ කතාව ජී.එල්. පීරිස් මහත්තයාගේ කතාව වගේ වෙන්න බෑනේ ලොක්කා. එයාට ඉන්නවා මහාචාර්ය ජී.එල්. පීරිස්. ඒක කරන්න. මේ තිස්සකුට්ටිආරච්චි. ඒ නිසා තිස්ස කුට්ටිආරච්චිට ආවේණික කතාව කිසිම කෙනකුට තහංචි දාලා නවත්තන්න බෑ කියන එක පැහැදිලිවම මතක් කරනවා.
වචනය වැරදුණත් මම තිස්සකුට්ටිආරච්චි. වචනය කෙළවුණත් මම තිස්සකුට්ටිආරච්චි. වචන හොඳට කිව්වත් මම තිස්සකුට්ටිආරච්චි කියන එක මම බොහොම පැහැදිලිව මතක් කරනවා. ඒක තමයි තිස්සකුට්ටිආරච්චිගේ ස්ටයිල් එක. මම කතා කරනකොට නාමල් රාජපක්ෂගේ ඡන්ද කැඩෙනවලු. මම බැලුවා ෆේස්බුක් එකේ කමෙන්ට් දාලා තිබුණා, නාමල් රාජපක්ෂගේ ඡන්ද කැඩෙනවා කියලා. ඒකේ ෆේස්බුක් එකේ ප්රොෆයිල් පික්චර් එකට ගිහින් බලනකොට ඒකේ තියෙනවා ‘රට අනුරට’ කියලා. දැන් ඌ ඡන්ද හදනවා මගේ අම්මා. ඌ මට කමෙන්ට් කරනවා මේකා ඉන්න එක හොඳයි, මේකා නාමල්ගේ ඡන්ද කඩයි කියලා. ඌ ඡන්ද හදනවද මගේ අම්මා, රට අනුරට කියලා දාගෙන?
සිලින්ඩරයට ගියා, බාර් පර්මිට් එක ගත්තා, කාර් පර්මිට් එක ගත්තා, වැලි පර්මිට් එක ගත්තා, පස් පර්මිට් එක ගත්තා, බස් පර්මිට් එක ගත්තා, සල්ලිවලට පැන්නා, ඒ ගිහිල්ලා නැවත ඇවිල්ලා නාමල් රාජපක්ෂ වටේ දැන් ඉඳගෙන කියනවා, කුට්ටියා නාමල්ගේ ඡන්ද කඩනවලු. මහින්ද රාජපක්ෂ ආදරණීය අප්පච්චිගේ ආදරණීය ලොකු පුතා නාමල් රාජපක්ෂ ජනාධිපතිවරණයට ඉල්ලනකොට මුන් සේරම හැත්තැ බුරුත්ත ගියාද නැද්ද? මුන් ගියා. මුන් ගිහිල්ලා මහින්ද මහත්තයාගේ පුතා ඡන්ද ඉල්ලනකොට ලක්ෂ දෙකහමාරකට ඡන්ද බැස්සුවා. එදත් වේදිකාවේ එක දවසේ රැස්වීම් හය හත කමිස තුන හතර මාරු කරගෙන තෙත් වෙනකන් කතා කරපු එකා කවුද? තිස්සකුට්ටිආරච්චි විතරයි එදත් හිටියේ. ලක්ෂ 69 දෙකහමාරකට බස්සපු උන්දලා, ඒ දෙකහමාරක් රැකගන්න ගිරිය ලේ රහ වෙනකන් කෑගහලා කතාකරපු තිස්සකුට්ටිආරච්චි ඡන්ද කඩනවලු. මම බාර් පර්මිට් අරගෙන තියෙනවා නම් ඔප්පු කරන්න පුළුවන් මේ මාධ්ය තියෙනවා.
මට එක බාර් පර්මිට් එකක් තියෙනවද? මට එක ෂෙඩ් එකක් තියෙනවද? මම වැව්පිටි අල්ලලා තියෙනවද? මට බස් පර්මිට් තියෙනවද? මට පස් පර්මිට් තියෙනවද? කෝටි ගණන් දෙන්න තමයි තිස්සකුට්ටිගේ කට ගන්න හැදුවේ. ජනාධිපතිවරණයට හරියටම දින හයක් තියලා තමයි මට ලොකුම ගානක ඔෆර් එකකට කතා කළේ. කෝටි ගානක්. දෙකයි පනහට බැස්සත් තිස්සකුට්ටිආරච්චි කිසිම දවසක රාජපක්ෂලා අතෑරියේ නෑ කියන කාරණාව අභිමානයෙන් කියනවා මගේ අම්මා. අභිමානයෙන්.
දැන් එක්කෙනෙක් මම දැක්කා කියනවා, එහෙම නාමල් රාජපක්ෂට හිතවත්, මහින්ද රාජපක්ෂට හිතවත්, එහෙම එකක් නෑ කියලා මම දැක්කා කියනවා. මහින්ද රාජපක්ෂගේ නම විකුණන්න, නාමල් රාජපක්ෂගේ නම විකුණන්න, පක්ෂයේ නම විකුණන්න කාටවත් අයිතියක් නෑ කියලා. ඔව්. ඒ නම විකුණන්න උන්දැලාට එහෙම අයිතියක් නෑ තමයි. ඔය කියන උන්දැලා නාමල් රාජපක්ෂගේ, මහින්ද රාජපක්ෂගේ නම විකුණගෙන බාර් පර්මිට් ගන්න ඇති, වැලි පර්මිට්, පස් පර්මිට්, ගල් පර්මිට්, බස් පර්මිට් ගන්න ඇති. සමහරු හොඳට හරි, නරකට හරි මුදල් හම්බ කරගන්න ඇති. මම ඒක දන්නේ නෑ. හැබැයි කිසිම දවසක තිස්සකුට්ටිආරච්චි නාමල් රාජපක්ෂගේවත්, මහින්ද රාජපක්ෂගේවත් නම තිස්සකුට්ටිආරච්චිගේ පෞද්ගලික වුවමනාවක් සඳහා විකුණලා නෑ කියන කාරණාවත් අභිමානයෙන් මතක් කරනවා….’
