ඔස්ට්‍රේලියාවේදී දරුවන් දෙදෙනා මැරූ ලාංකික පියා දිවි හානි කරගෙන! මානසික අවපීඩනයෙන් සිටින බවට වීඩියෝවකුත් තියලා!

40 හැවිරිදි ශ්‍රී ලාංකියෙකු සිය දරුවන් දෙදෙනා ඝාතනය කර සියදිවි නසාගෙන ඇති බව විදෙස් මාධ්‍ය වාර්තා කරයි.

විදෙස් මාධ්‍ය පෙන්වා දෙන්නේ ඔහු ඔස්ට්‍රෙලියාවේ පර්ත් නුවර වාසය කරන ශ්‍රී ලාංකිකයෙකු බවය.

ඔස්ට්‍රෙලියානු පොලීසිය උපුටා දක්වමින් විදෙස් මාධ්‍ය වැඩිදුරටත් වාර්තා කර ඇත්තේ ඝාතනයට ලක්වී ඇති පිරිමි දරුවාගේ වයස අවුරුදු 6ක් සහ ගැහැණු දරුවාගේ වයස අවුරුදු 4ක් බවය.

ඝාතනයන්ගෙන් අනතුරුව පියා විසින් ගරාජයේදී සියදිවි නසාගෙන ඇත.

ඔහු වෘත්තියෙන් නගර අලංකරණ ශිල්පියෙකු ලෙස කටයුතු කරමින් සිට තිබේ.

මිට සති 06 කට පමණ පෙර ෆේස්බුක් මාධ්‍ය හරහා වීඩියෝවක් නිකුත් කරමින් සඳහන් කර තිබුනේ තමන් මානසික අවපිඩනයකින් පෙළෙමින් සිටින බවයි.

එමෙන්ම තමන් ගැන සොයා බලන ලද සියලු දෙනාට ස්තුතියිවන්ත වන බවද ඔහු එම වීඩියෝවේ දී සඳහන් කර ඇත.

” දිගු කලක් තිස්සේ මාව හොඳින් හඳුනන අය, මා මානසික අවපීඩනයෙන් පෙළෙන හෝ මානසික අවපීඩනයෙන් පෙළෙන අයෙකු ලෙස නොසිතනු ඇති බව මට විශ්වාසයි. නමුත් මෑතකදී මා මානසික අවපීඩනයෙන් පෙලෙන බවට හඳුනා ගනු ලැබුවා.

මම පත්ව ඇති තත්ත්වය සම්බන්ධයෙන් ඖෂධ ලබා ගනිමින් සිටිනවා. මානසික සෞඛ්‍ය ගැටලු හෝ මානසික අවපීඩනය නිසා ඇතිවන තත්ත්වයන් ඔබට පමණක් නොව ඔබ අවට සිටින අයටද බලපාන බවට මම සිතනවා. සියදිවි නසා ගැනීම විසඳුම නොවේ. මිනිසුන් වෙත ළඟා වීමට උත්සාහ කරන්න, මිනිසුන් සමඟ කතා කරන්න, උදව් සොයන්න. දරුණු තීරණයක් ගැනීමට පෙර ඔබට කළ හැකි දේ බලන්න. සැම දෙනාටම කරුණාව දක්වන්න” සියදිවි හානිකර ගත් බවට සැක කරනු ලබන 40 හැවිරිදි ශ්‍රී ලාංකිකයා එම වීඩියෝවේ සඳහන් කර තිබෙනවා.

සියදිවි හානිකර ගත් බවට සැකකෙරෙන ලාංකිකයාගේ බිරිද සිය දරුවන් දෙදෙනා කැඳවා ගෙන ඒමට පෙර නියම කර තිබු ස්ථානයක් කරා ගොස් සිට ඇති අතර එහිදී ළමුන් දෙදෙනා එම ස්ථානයට නොපැමිණ සිට තිබීම නිසා ඔවුන් සොයා ගැනීමට ඇය සිය හිතවතුන්ගේ සහය පතා ඇත.