අලුත්කඩේ මහේස්ත්රාත් අධිකරණයේ අංක 05 අධිකරණ ශාලාව තුළ මහේස්ත්රාත්වරයා නඩු විභාග කටයුතුවල නිරතව සිටියදී විත්ති කූඩුවේ සිටි මත්කුඩු ජාවාරමේ නිරත පාතාලයේ ප්රබල අපරාධකරුවකු වන සංජීව කුමාර සමරරත්න නොහොත් මාකිලංගමුවේ සංජීවට (ගණේමුල්ලේ සංජීව) වෙඩි තබා ඝාතනය කර පලා යමින් සිටි නීතිඥ වෙස් ගත් වෙඩික්කරු වෙඩි ප්රහාරය සිදුව පැය 08ක් වැනි කාලයක් තුළ අත්අඩංගුවට ගැනීමට පොලිස් විශේෂ කාර්ය බළකාය සමත්ව ඇත.Sri Lanka Latest News
කල්පිටියෙන් බෝට්ටුවක වෙඩික්කරු නැඟී රටින් පලා යෑමේ සූදානමින් ගමන් කරමින් සිටින බවට පොලීසියට ලද තොරතුරු මත සිදු කළ විශේෂ සෝදිසියකදී ඔහු පොලිස් විශේෂ කාර්ය බළකායට හසු වී තිබේ.
මොහොමඩ් අස්මාන් සෙරිෆ්ඩීන් නමැති 34 හැවිරිදි වියේ පසුවන මෙම වෙඩික්කරු වෑන් රථයක නැඟී ගමන් කරමින් සිටියදී පොලිස් විශේෂ කාර්ය බළකායට හසු වී ඇත්තේ පුත්තලම පාලවිය ප්රදේශයේදීය. මෙම සැකකරු කුලී ඝාතකයකු බවටත් යුද හමුදාවේ සෙබළකු බවටත් තොරතුරු අනාවරණය වී තිබේ. බුද්ධි අංශවලට සම්බන්ධවත් ඔහු කටයුතු කර ඇති බවට තොරතුරු ද විමර්ශන නිලධාරීන්ට ලැබී ඇත. ඒ සම්බන්ධයෙන් තවදුරටත් විමර්ශන පැවැත්වෙන බව උසස් පොලිස් නිලධාරියෙක් පැවසීය.
අධිකරණය තුළ සිදුවූ මෙම ඝාතනය ඔහු විසින් කර ඇත්තේ රුපියල් ලක්ෂ 150ක කොන්ත්රාත්තුවකට බව හෙළි වී ඇත. එම කොන්ත්රාත් මුදලින් ඔහුට ලැබී ඇත්තේ රුපියල් ලක්ෂ 02ක පමණ මුදලක් බව ද අනාවරණය වේ.
මෙම ඝාතන කොන්ත්රාත්තුව ඔහුට ලැබී ඇත්තේ ඩුබායිහි රැඳී සිටින ප්රබල පාතාලයේ අපරාධකරුවකු වන කෙහෙල්බද්දර පද්මේ නමැත්තාගේ සමීපතමයකු මඟින් බවට ද තොරතුරු විමර්ශනයේදී අනාවරණය වී ඇති බව පොලිස් තොරතුරු සඳහන් කළේය. දැඩිව අයිස් මත්ද්රව්ය භාවිතයට ඇබ්බැහි වී සිටින්නකු වන සැකකරු ඒ සඳහා මුදල් සොයා ගැනීමට කොන්ත්රාත් මිනිස් ඝාතනවලද නිරත වී ඇති බව ද සඳහන්ය.
ගල්කිස්ස වටරප්පල පාරේදී පසුගිය ජනවාරි 07 වැනිදා පුද්ගලයකු ඝාතනය කරමින් තවත් අයකුට තුවාල ගෙනදුන් අබිරහස් ඝාතකයා ඔහු බවට තොරතුරු ද අනාවරණය වී ඇත. එම ඝාතනය ඇතුළු ඝාතන 05කට ඔහු සම්බන්ධ බවට ද කරුණු හෙළි වී තිබේ. සීදූව ලියනගේමුල්ලේදී පසුගිය වසරේ දෙසැම්බර් 28 වැනිදා ව්යාපාරික පවුලක පියාත් දරුවන් දෙදෙනාත් වෙඩි තබා ව්යාපාරික පියාත් ව්යාපාරික පුතාත් ඝාතනය කිරීමට මෙම සැකකරුගේ සම්බන්ධයක් ඇතැයි ද පොලීසිය විශ්වාස කරයි. ඒ සම්බන්ධයෙන් ද ඊයේ රාත්රියේ ඔහුගෙන් දීර්ඝ ලෙස ප්රශ්න කරමින් සිටියේය.
අධිකරණයේ සිදුවූ වෙඩි තැබීමෙන් පසු පුත්තලම පාලවියේ පිහිටි පොලිස් විශේෂ කාර්ය බළකායේ ක්ෂණික මාර්ග බාධක පොලිස් මුරපොළකදී වෑන් රථය පරීක්ෂාවට ලක් කරන විට සැකකරු නීතිඥවරයකු බව පවසමින් නීතිඥ හැඳුනුම්පතක් ද පෙන්වා විශේෂ කාර්ය බළකා නිලධාරීන්ගේ පරීක්ෂාවලින් මඟහැර යෑමට උත්සාහයක ද නිරත වී ඇත.
එහිදී ඔහුගේ හැසිරීම ගැන සැක සිතී විශේෂ කාර්ය බළකා නිලධාරීන් තමන්ගේ ජංගම දුරකතන වෙත ලැබී තිබුණු අධිකරණයේ වෙඩි තැබූ සැකකරුගේ ඡායාරූපය හා වෑන් රථයේ සිටි නීතඥවරයකු බව කී පුද්ගලයාගේ රූපය පරීක්ෂාවට ලක්කර තිබේ. එහිදී පෙනී ගොස් ඇත්තේ එම රූපය සමඟ වෑන් රථයේ සිටින නීතිඥවරයකු ලෙස හඳුන්වා දුන් පුද්ගලයාගේ රුව ගැළපෙන බවය. අනතුරුව තවත් පරීක්ෂා කිරීම් කිහිපයකින් පසු ඔහුව අත්අඩංගුවට ගැනීමට කටයුතු කර ඇත්තේ වෑන් රථයේ රියැදුරු ද සමඟිනි.
අලුත්කඩේ අධිකරණය තුළ සිදුවූ ඝාතනයට කාන්තාවක ද ඔහුට හවුල් වී ඇත. එම කාන්තාව නීතිඥවරියක ලෙස අධිකරණ සංකීර්ණයට සුදු සහ කළු පැහැති සාරියකින් සැරසී පැමිණ ඇත. ගිනි අවිය අධිකරණ භූමියට රැගෙනවිත් ඇත්තේ එම කාන්තාව විසිනි. ඇය මීගමුව කටුවැල්ලේගම පාරේ පදිංචිකාරියක වන පින්පුර දේවගේ ඉෂාරා සෙව්වන්දි නමැත්තිය බවට තොරතුරු අනාවරණය වී ඇතැයි පොලීසිය කියයි. ඇය මත්කුඩු ජාවාරමට සම්බන්ධ තැනැත්තියක බව අනාවරණය වී තිබේ. ඇය අත්අඩංගුවට ගැනීමට ඊයේ රාත්රියේ විශේෂ මෙහෙයුමක් ද පොලීසිය දියත් කර තිබිණි. සීදූවේ වෙඩි තැබීමට කාන්තාවක ද වෙඩික්කරුවන් සමඟ පැමිණි බවට තොරතුරු කියැවෙන්නට වූ බැවින් එම කාන්තාව මෙම කාන්තාවදැයි සැකයක් පවතින බව උසස් පොලිස් නිලධාරියෙක් පැවසීය.
මෙම කාන්තාව නීතිඥවරියක ලෙස හැඟී යන ආකාරයට අධිකරණ භූමියට පැමිණ ඇත්තේ වෙඩි තැබූ රිවෝල්වරය දණ්ඩ නීති සංග්රමයේ පිටපතක සඟවාගෙනය. එම පොතේ පිටු ගිනි අවිය සැඟවීමට හැකි ආකාරයට කපා එය ඒ තුළ සඟවාගෙන අධිකරණ පරිශ්රයට පැමිණ ඇති බව ද අනාවරණය වී තිබේ. ඇය එම පොතට අමතරව ලිපිගොනු රැසක් ද අතේ රඳවාගෙන පැමිණ ඇති ආකාරය ආරක්ෂක කැමරාවලද සටහන්ව තිබී ඇත. ගිනි අවිය රැඳවූ එම පොත නීතිඥවරුන් රැඳී සිටින කාමරයේ තිබී නීතිඥවරුන් පිරිසකට හමුවී තිබිණි. එම පොත පොලීසියට එම නීතිඥවරුන් විසින් භාරදීමට කටයුතු කර තිබිණි. ආරක්ෂක කැමරා නිරීක්ෂණයේදී පෙනී ගොස් ඇත්තේ ගිනි අවිය වෙඩික්කරු අතට පත්ව තිබෙන්නේ අධිකරණ පරිශ්රයේ වැසිකිළිය අසලදී බව ද පෙනීගොස් ඇත.
මත්කුඩු ජාවාරමේ නිරත ගම්පහ පාතාලයේ ප්රබලයකු වන කෙහෙල්බද්දර පද්මේ ඇතුළු පාතාලයේ අපරාධකරුවන් පිරිසක් එක්ව කළ සැලසුමකට අනුව මෙම වෙඩි තැබීම සිදුව ඇති බවත් ඊට කමාන්ඩෝ සලින්ද, බටුවත්තේ චාමර, ජා-ඇල ජූඩ්, කෙසෙල්වත්තේ දිනුක සිටින බවට සැකකරන තොරතුරු ද බුද්ධි අංශ වෙත ලැබී තිබේ. ඒ සම්බන්ධන්ධයෙන් විමර්ශන මේ වන විටත් සිදුවෙමින් ඇති බව පොලිස් තොරතුරු සඳහන් කළේය. අත්අඩංගුවට ගත් සැකකරුගෙන් කරනු ලබන ප්රශ්න කිරීම්වලදී ද ඒ සම්බන්ධයෙන් වැදගත් තොරතුරු රැසක් අනාවරණය වන බව පොලිස් ආරංචි මාර්ග අනාවරණය කළේය.
අධිකරණ ශාලාව තුළ නීතිඥවරුන් අසුන් ගන්නා ස්ථානයේ අසුන්ගෙන සිටි වෙඩික්කරු සංජීවගේ නඩුව විභාගයට ගනිමින් තිබියදී ඔහු රැඳී සිටි ස්ථානයෙන් නැඟිට විත්ති කූඩුව අසලට ප්රශ්න ඇසීමට නීතිඥවරු යන ආකාරයට ගොස් එකවරම වෙඩි තබා ඇති බව විමර්ශනවලින් පෙනී ගොස් ඇත. වෙඩි පහක් සංජීව වෙත එල්ලකර ඇති බවත් වෙඩි වැදී ඇත්තේ පපු ප්රදේශයට බවත් සඳහන්ය.
අධිකරණ පරිශ්රයට මුලින්ම පැමිණ ඇත්තේ නීතිඥ වෙස් ගත් කාන්තාව බව ආරක්ෂක කැමරා නිරීක්ෂණයේදී පෙනී ගොස් ඇත.
නීතිඥ වෙස් ගත් වෙඩික්කරු අධිකරණ පරිශ්රයට පැමිණ ඇත්තේ ලිපිකවරයක් පමණක් අතින් ගෙන බව ද විමර්ශනයේදී පෙනී ගොස් තිබේ. නීතිඥ වෙස් ගත් කාන්තාව අධිකරණ පරිශ්රය තුළට නිරුපද්රිතව ඇතුළු වීමෙන් පසු වෙඩික්කරු ඇතුළු වී ඇති බව ද විමර්ශනයේදී අනාවරණය වී තිබේ.
ගිනි අවිය වෙඩික්කරුට දීමෙන් අනතුරුව වෙඩි ප්රහාරය එල්ල කිරීමට පෙර නීතිඥ වෙස් ගත් කාන්තාව අධිකරණ පරිශ්රයෙන් පිටවගොස් ඇති බවට සැකකරන තොරතුරු ද ලැබී ඇත. වෙඩි තැබීමෙන් අනතුරුව වෙඩි තැබීමට යොදාගත් 0.38 වර්ගයේ රිවෝල්වරය විත්ති කූඩුව අසලට වීසි කර දමා විත්ති කූඩුව ආසන්නයේ ඇති දොරකින් වෙඩික්කරු පලා ගොස් තිබේ. ඔහු පලා ගොස් ඇත්තේ ද අධිකරණයේ පඩිපෙළේ සිටි පිරිස් ද පෙරළාගෙන “අන්න ගණේමුල්ල සංජීව පැන්නා. වෙඩි තියනවා. වෙඩි තියනවා.” යනුවෙන් පවසමිනි. එහිදී අධිකරණ පරිශ්රයේ රැඳී සිටි පිරිස්ද කලබල කරවා එම පිරිස් අතරින් රිංගා පලාගොස් ඇති බව විමර්ශනවලින් පෙනී ගොස් තිබේ. සැකකරුගෙන් කළ ප්රශ්න කිරීමේදී ඔහු පවසා ඇත්තේ තමා අධිකරණයේ ප්රධාන දොරටුවෙන් පිටව ගිය බවය. ඒ සම්බන්ධයෙන් තවදුරටත් විමර්ශන පැවැත්වෙන බව උසස් පොලිස් නිලධාරියෙක් පැවසීය.
මෙම ඝාතන සැලසුම දීර්ඝ ලෙස අධ්යයනයක නිරතව සිදු කර ඇති බවත් වෙඩික්කරු අවස්ථා කිහිපයකදීම අධිකරණ පරිශ්රයට පැමිණ කරුණු අධ්යයනය කර ඇතැයි පෙනී යන බවත් එම නිලධාරියා කීය.
මෙම ඝාතන විමර්ශන සඳහා කණ්ඩායම් 05ක් පත්කර ඇතැයි පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නීතිවේදී බුද්ධික මනතුංග මහතා සඳහන් කළේය. කොළඹ අපරාධ කොට්ඨාසයේ අධ්යක්ෂ ජ්යෙෂ්ඨ පොලිස් අධිකාරී ඉන්දික ලොකුහෙට්ටි මහතාගේ මෙහෙයවීමෙන් ප්රධාන විමර්ශනය සිදුවන බව පොලිස් තොරතුරු සඳහන් කළේය. ඉදිරියේදී විමර්ශන කටයුතු අපරාධ පරීක්ෂණ දෙපාර්තමේන්තුවට භාරදීමට වැඩබලන පොලිස්පතිවරයාගේ අවධානය යොමුව ඇති බව පොලිස් මාධ්ය ප්රකාශකවරයා පැවසීය.
සැකකාර කාන්තාවට ද රටින් පලා යෑමට නොහැකි වන ලෙස අවශ්ය ආරක්ෂක පියවර ගෙන ඇති බව පොලිස් මාධ්ය ප්රකාශක නීතිවේදී බුද්ධික මනතුංග මහතා සඳහන් කළේය.
පාතාල කල්ලි අතර ඇති ගැටුම් හේතුවෙන් ජීවිත තර්ජනයකට ලක්ව සිටි සංජීව බන්ධනාගරයේ සිට අධිකරණයට ඉදිරිපත් කිරීමට රැගෙන එන්නේ පොලිස් විශේෂ කාර්ය බළකායේ ආරක්ෂාවක් සහිතවය. බොහෝ අවස්ථාවලදී නඩු විභාගයක් පැවැත්වෙන විට ඔහු බන්ධනාගාරයේ සිට ස්කයිප් තාක්ෂණය ඔස්සේ ඉදිරිපත් කර තිබිණි. අත්යවශ්ය විශේෂ කාරණාවකදී හැරුණුකොට ඔහුව බූස්සේ සිට අධිකරණය වෙත රැගෙන ඒමට කටයුතු කළත් ඊයේ දිනයේදී ද ස්කයිප් ඔස්සේ නඩු විභාගය අධිකරණ ශාලා 05 පැවැත්වීමට නියමිතව තිබී ඇත. එහෙත් අංක 09 අධිකරණ ශාලාවේ විභාග වන නඩුවක් සඳහා ඔහුව ඊයේ අධිකරණයට ගෙන ඒමට සිදුව තිබී ඇත. ඒ අනුව ඊයේ සන්නද්ධ ආරක්ෂකයන් 12 දෙනකුගේ ආරක්ෂාවක් සහිතව අලුත්කඩේ අධිකරණය වෙත රැගෙන ඒමට බන්ධනාගාර බලධාරීන් කටයුතු කර තිබිණි. එහෙත් ඊයේ දින 09 අධිකරණයේ මහේස්ත්රාත්වරයා නොසිටි බැවින් 05 අධිකරණයේ නඩුවට ද ඔහුව යොමු කර තිබේ. ඔහුට ඊයේ දිනයේ අංක 05 අධිකරණය තුළ නඩු 03ක් විභාග වීමට තිබී ඇත.
ඊයේ පෙරවරු 9.45ට පමණ අතිරේක මහේස්ත්රාත් පවිත්රා සංජීවනී පතිරණ මහත්මිය අධිකරණ කටයුතු ආරම්භ කිරීමෙන් අනතුරුව සැකකාර ගණේමුල්ලේ සංජීව නමැත්තාගේ නඩු පළමුව කැඳවීමට කටයුතු කළාය.
ඔහුට එරෙහිව අධිකරණය හමුවේ නඩු තුනක් විභාගයට ගැනීමට නියමිතව තිබූ අතර සැකකාර සංජීව නමැත්තාගේ නඩු පළමුව විභාගයට ගනු ලැබූ අතර සැකකාර ගණේමුල්ලේ සංජීව නමැත්තා විත්ති කූඩුවේ සිට නඩු සඳහා පෙනී සිටි බව පොලීසිය අධිකරණයට දැන්වීය. සංජීවට එරෙහිව පැවැති නඩු තුනෙන් පළමු නඩුව කැඳවීමෙන් අනතුරුව දෙවැනි නඩුව කැඳවීමට සූදානම් වූ අවස්ථාවේ නීතිඥ වෙස් ගත් වෙඩික්කරු සිය ඉණෙහි සඟවාගෙන සිටි ගිනි අවිය එකවර පිටතට ගෙන එකපිට එක වෙඩි තබා තිබිණි.
වෙඩි ප්රහාරයට ලක් වූ ගණේමුල්ලේ සංජීව නමැත්තා බරපතළ තුවාල සහිතව විත්ති කූඩුව තුළ ඇදවැටීමෙන් අනතුරුව බන්ධනාගාර නිලධාරීන්ගේ හා පොලිස් නිලධාරීන්ගේ මැදිහත්වීම මත කඩිනමින් ඔහු කොළඹ ජාතික රෝහල වෙත ඇතුළත් කරනු ලැබීය. ඒ වන විටත් ඔහු සිට ඇත්තේ මියගොසිනි.
සිද්ධියෙන් පසුව අධිකරණ භූමිය පුරා දැඩි ආරක්ෂක තත්ත්වයක් ක්රියාත්මක කෙරුණු අතර ඒ අවස්ථාවේ අධිකරණය තුළ රැඳී සිටි කිසිදු පුද්ගලයකුට අධිකරණයෙන් පිටතට බැහැරවීමට හෝ අධිකරණයෙන් පිටත රැඳී සිටි කිසිදු පුද්ගලයකුට අධිකරණ භූමියට ඇතුළු වීමට ආරක්ෂක නිලධාරීන් විසින් ඉඩ ලබාදී නැත. අදාළ සිද්ධියෙන් මොහොතකට පසු ඇඟිලි සලකුණු නිලධාරීන් හා පොලිස් සුනඛයන් අධිකරණ භූමියට රැගෙන ගොස් අවශ්ය සෝදිසි කිරීම් කටයුතු සිදුකළ අතර පොලිස් සුනඛයන් අධිකරණයේ ප්රධාන දොරටුවෙන් පිටතට පැමිණ ඒ ආසන්නයේ දකුණු පස පිහිටි නීති විද්යාලය දෙසට යන අයුරු ද දක්නට ලැබිණි.
අදාළ වෙඩි තැබීම් සිද්ධියක් සමඟ එම අධිකරණ සංකීරණයේ සියලු අධිකරණවල නඩු කටයුතු විභාගයට ගැනීම නවතා දැමුණු අතර පසුව පස්වරුවේ ප්රධාන මහේස්ත්රාත් අධිකරණයේ නඩු කටයුතු විභාගයට ගැනුණි.
අධිකරණ සහ ජාතික ඒකාබද්ධතා අමාත්ය හර්ෂණ නානායක්කර, මහජන ආරක්ෂක හා පාර්ලිමේන්තු කටයුතු නියෝජ්ය අමාත්ය සුනිල් වටගල, වැඩබලන පොලිස්පති නීතිඥ ප්රියන්ත වීරසූරිය මහත්වරුන් ඇතුළු පොලීසියේ උසස් නිලධාරීහු රැසක්ම අධිකරණ පරිශ්රය වෙත පැමිණ සිටියහ.
මෙතෙක් කලක් බන්ධනාගාරයට ඇතුළු වන නීතිඥවරුන් නීතිඥවරියන් පරීක්ෂාවට ලක් නොකෙරුණු නමුත් එම වෙඩිතැබීමේ සිද්ධියෙන් පසුව අධිකරණ භූමියට ඇතුළු වන නීතිඥවරුන් නීතිඥවරියන් මෙන්ම සෙසු සියලු දෙනාම දැඩි පරීක්ෂාවට ලක් කරන අයුරු දක්නට ලැබිණි. පොලිස් අපරාධ ස්ථානීය පරීක්ෂණ නිලධාරීන් පිරිසක් ඊයේ සිද්ධිය සිදුවූ අංක පහ අතිරේක මහේස්ත්රාත් අධිකරණය වෙත පැමිණ විමර්ශන කටයුතු ආරම්භ කළහ.
දිනමිණ
