ශ්රී ලංකාවට ලැබෙන විදේශ ප්රේෂණ කෙරෙහි දායකවන වැදගත් ක්ෂේත්රයක් වන්නේ විදේශ රැකියා ක්ෂේත්රය වන අතර එහි දී කොරියානු රැකියා වලට සුවිශේෂී ස්ථානයක් හිමි වුවත් පසුගිය වසර කිහිපය තුළ කොරියානු ජනරජයේ විදේශ රැකියා සදහා සුදුසුකම් ලබා ඇති නමුත් රැකියා සදහා අවස්ථාව නොලැබීම මත පොරොත්තු ලේඛනයේ රැදී සිටින තරුණ තරුණියන්ගේ ප්රමාණය ඉහළ ගොස් ඇති බවත් මේ තත්ත්වය මත කොරියානු ජනරජය සමග බැදී ඇති Employment permit system (EPS) යටතේ වන ද්වි පාර්ශ්වික ගිවිසුම් යාවත්කාලීන කිරීමට රජයේ මැදිහත්වීම අත්යාවශ්ය වීම බවත් මෙය 2026 මාර්තු මාසයේ සිට අලුත් වීම සිදු නොවන්නේ නම් මෙරට තරුණ තරුණියන් 10000ක් පමණ අනාථ වන බවත් විපක්ෂ නායක සජිත් ප්රේමදාස මහතා අද පාර්ලිමේන්තුවේ දී පැවසීය.Sri Lanka Latest News
විපක්ෂ නායක සජිත් ප්රේමදාස මහතා අද පාර්ලිමේන්තුවේදී මේ බව කියා සිටියේ ස්ථාවර නියෝග 27 (2) යටතේ කොරියානු රැකියා ගැටලුව කෙරෙහි රජයේ අවධානය යොමු කරමිනි.
ද්විපාර්ශ්වික ගිවිසුම් යටතේ ශ්රී ලංකාවට විදේශ රැකියා අවස්ථා ලබා දෙන රටවල් සංඛ්යාව, කොරියාවෙන් ලබා දෙන රැකියා අවස්ථා ප්රමාණයන් කාණ්ඩ වශයෙන් ඉදිරිපත් කරන ලෙසත් කොරියානු ජනරජය ලබා දෙන රැකියා අවස්ථා පසුගිය වසර 5 අඩුවී ඇත්නම් එයට හේතු ඉදිරිපත් කරන ලෙසත වත්මන් රජය මේ සම්බන්ධයෙන් සිදු කරන ලද අධ්යයනයන් සභාගත කරන ලෙසට ඉල්ලා සිටින බවත් විපක්ෂ නායකවරයා මෙහි දී පැවසීය.
කොරියානු ජනරජයේ රැකියා සදහා සුදුසුකම් සපයා ඇති වෙබ් අඩවියේ ලියාපදිංචි රැකියා අපේක්ෂකයන් වසර 2කින් පසුව ස්වයංක්රීයව ඉවත් වීමට සිදුවීමෙන් එම අපේක්ෂකයන්ට අසාධාරණයක් සිදුව ඇති බවත් ලක්ෂ ගණනක් මුදල් වියදම් කර 10000ක් පමණ තරුණ තරුණියන් පොරොත්තු ලේඛනයේ සිටියත් වසර දෙකින් ඔවුන් ඉවත් වන නිසා මේ සම්බන්ධයෙන් රජය කඩිනම් පියවරක් ගත යුතු බවත් විපක්ෂ නායකවරයා තවදුරටත් පැවසීය.
මේ පොරොත්තු කාල සීමාව දීර්ඝ කර ගැනීමට කටයුතු කළ යුතු බවත් සමගි ජන බලවේගය ද කොරියානු තානාපතිවරිය සමග සාකච්ඡා පවත්වා කඩිනම් විසදුමක් ඉල්ලා සිටි බවත් රාජ්ය පාර්ශ්වයෙන් දැවැන්ත මැදිහත්වීමක් ද මෙහි දී අවශ්ය බවත් කොරියානු ජනරජය හැර නව රැකියා වෙළෙදපොළවල් විවෘත කර ගැනිමට රජය ඉදිරිපත් කර ඇති ගිවිසුම් ඉදිරිපත් කරන ලෙසත් 2011 වසරේ ඉතාලි රජය සමග අත්සන් කර ඇති ගිවිසුම් ප්රකාරව 2014 වසරේ විභාගය අවසන් කළත් රැකියා සදහා පිටත්ව යාමට නොහැකි වූ අපේක්ෂකයන්ට අවස්ථාව නොලැබීමට හේතු ඉදිරිපත් කරන ලෙසත් විපක්ෂ නායකවරයා මෙහි දී රජයෙන් ල්ලා සිටියේය.
