රටපුරා රෝහල් හා සෞඛ්ය ආයතනවල සේවය කරන සෞඛ්ය කාර්ය මණ්ඩලවලට ඉන්ධන ලබාදීම සඳහා සිකුරාදා දිනයේදී ඉන්ධන පිරවුම්හල් 84ක් වෙන්කර තිබෙන බව බලධාරීන් පවසා තිබුණා.
එහෙත් එම කිසිඳු ඉන්ධන හලක් වෙත ප්රමාණවත් ඉන්ධන නොලැබීම හේතුවෙන් ගැටලුකාරී තත්වයක් මතුවූ බවයි වාර්තා වෙන්නේ.
තම පිරවුම්හල් සිකුරාදා දිනයේදී සෞඛ්ය කාර්ය මණ්ඩලවලට වෙන්කර ඇති බවක් නොදන්නේ යැයි ඇතැම් ඉන්ධන පිරවුම්හල් හිමියන් එහි ගොස් සිටි සෞඛ්ය කාර්ය මණ්ඩල වෙත දැනුම් දී තිබූ බව පැවසෙනවා.
ඒ පිරවුම් හල් වෙතින් වෙනත් පුද්ගලයින්ටත් ඉන්ධන ලබාදීම සිදුකිරීමෙන් හා ඇතැම් පිරවුම්හල් වෙත ඉන්ධන නොලැබීම හේතුවෙන් වෛද්යවරුන් ඇතුළු සෞඛ්ය කාර්ය මණ්ඩලවලට ඊයේ (24) දිනය පුරා පෝලිම්වල රැඳී සිටීමට සිදුව තිබුණා.
මේ අර්බුදය හේතුවෙන් කොළඹ ජාතික රෝහල, මහරගම අපේක්ෂා රෝහල ඇතුළු දිවයිනේ ප්රධාන රෝහල් රැසක දෛනික ප්රතිකාර කටයුතුවලට බාධා එල්ල වූ බවයි කියන්නේ.
ඇතැම් වෛද්යවරුන් තම වාහන පෝලිම්වල තබා වෙනත් අයකුට බලාගන්නා ලෙස පවරා රෝහල්වලට ගොස් ප්රතිකාර කටයුතුවල නිරත වී ඇති අතර, පෙරදින රාත්රී සේවයේ සිටි කාර්ය මණ්ඩල යළිත් ඊයේ රාත්රී සේවයට වාර්තා කළ යුතුව තිබියදී මේ වන තුරුත් ඉන්ධන පිරවුම්හල් අසල රැඳී සිටින බව පැවසෙනවා.
මේ පිළිබඳව අප කළ විමසීමකදී සමස්ත ලංකා වෛද්ය නිලධාරීන්ගේ සංගමයේ ලේකම් වෛද්ය ජයන්ත බණ්ඩාර පැවසුවේ සමස්ත සෞඛ්ය කාර්ය මණ්ඩල වෙනුවෙන් රටපුරා පිරවුම්හල් අතරින් 84ක් පමණක් ඊයේ දිනයේ වෙන්කර තිබූ බවයි.
කිසිසේත්ම ප්රමාණවත් නොවූ එම වෙන්කිරීමවත් නිසි ලෙස සංවිධානය කර ගැනීමට ආණ්ඩුවට අවශ්ය නොවූ බවයි ඔහු පවසන්නේ.
එම අවම වැඩපිළිවෙල හෝ සාර්ථක කරගැනීමට නොහැකිවූයේ රජයේ ආයතන අතර නිසි සන්නිවේදයක් හා ක්රමවේදයක් නොමැතිවීමෙන් බවයි ඔහු කියන්නේ.
“අපි මේ අර්බුදය ගැන මාර්තු මාසයේ මුල් සතියෙම ජනාධිපතිවරයාට ලිඛිතවම දැනුම් දුන්නා. ඊයේ කියන්නේ ජුනි 24. මාස තුනකට පස්සෙත් ආණ්ඩුවට බැහැ මේ ප්රශ්නයට අවම උත්තරයක්වත් හොයාගන්න. ලබන සතියේදී හෝ මේ අවුල විසඳා ගැනීමට සාර්ථකව කටයුතු නොකළොත් සෞඛ්ය සේවාව පවත්වාගෙනයාමට බැරි වේවි” යි ඔහු පවසනවා.
