ශ්රී ලංකාවේ පැවැත්වුණු ප්රකාශන හිමිකම් නඩුවකදී පසුගියදා ශ්රේෂ්ඨාධිකරණය විසින් ඓතිහාසික තීන්දුවක් ලබාදී ඇත. මේ අනුව උත්තරීතර අධිකරණය විසින් මෙම තීන්දුව ලබාදී ඇත්තේ දිවංගත ප්රවීණ සංගීතඥ සහ ගායක ක්ලැරන්ස් විජේවර්ධන මහතාගේ බිරිය වන ශීලා විජේවර්ධන මහත්මිය විසින් ‘ටොරානා මියුසික්’ සමාගමේ අයිතිකරු වන සරත් කොතලාවල මහතාට එරෙහිව ශ්රේෂ්ඨාධිකරණයේ පවරන ලද ප්රකාශන හිමිකම් නඩුවකදීය. Sri Lanka Latest News
ගායක රජිව් සෙබස්තියන් විසින් දිවංගත ක්ලැරන්ස් විජේවර්ධනයන්ගේ ගීත ගායනා කර එම ගීත ඇතුළත් සංයුක්ත තැටි සරත් කොතලාවලගේ ටොරානා මියුසික් ආයතනය විසින් නිෂ්පාදනය කිරීමට එරෙහිව නඩුව පවරා තිබිණි. මෙම ක්රියාවලිය හේතුවෙන් තමන්ගේ අභාවප්රාප්ත සැමියා විසින් රචනා කර ගායනා කරන ලද ගීත කිහිපයක පද රචනා සහ සංගීත සයුතිවල ප්රකාශන අයිතිය උල්ලංඝනය කර ඇති බවට ශීලා විජේවර්ධන විසින් 2005 දී වාණිජ මහාධිකරණයේ ගොනුකළ නඩුවක් හේතුවෙන් මෙම අභියාචනය පැනනැගී තිබිණි.
මේ අනුව වාණිජ මහාධිකරණයේ ගොනුකර ඇති නඩුවේදී රජිව් සෙබස්තියන්ට එරෙහිව වාරණ නියෝගයක්, වන්දි ගෙවීමක් සහ උල්ලඝනය කරන ලද ද්රව්ය භාරදෙන ලෙසට ශීලා විජේවර්ධන විසින් ඉල්ලා තිබිණි. වාණිජ මහාධිකණයේ නඩුව තවමත් විභාග වෙමින් තිබියදී මියගිය ක්ලැරන්ස් විජේවර්ධන මහතාගේ බුද්ධිමය දේපළ ඓතිවාසිකම් පිළිගනිමින් සහ රුපියල් මිලියන 2ක (රුපියල් ලක්ෂ 20ක්) වන්දි මුදලක් ගෙවීමට එකඟ වෙමින් රජිව් සෙබස්තියන් විසින් ශීලා විජේවර්ධන සමග එකඟතාවකට පැමිණි තිබිණි. නඩු විභාගය අවසානයේ වාණිජ මහාධිකරණය විසින් සරත් කොතලාවල මහතාට එරෙහිව ශීලා විජේවර්ධන මහත්මියට පක්ෂව ස්ථිර වාරණ නියෝගයක් ලබා දුන්නේය. ඉන් පසුව අනෙකුත් සහන ඉල්ලා 2013දී විජේවර්ධන මහත්මිය විසින් ශ්රේෂ්ඨාධිකරණයට අභියාචනයක් ගොනුකරන ලදී. එහිදී සරත් කොතලාවලට එරෙහිව ස්ථිර තහනම් නියෝගයක් ලබාදීමේ වාණිජ මහාධිකරණයේ තීරණය ශ්රේෂ්ඨාධිකරණය විසින්ද තහවුරු කර ඇත.
පසුගියදා නඩු විභාගයේදී ශ්රේෂ්ඨාධිකරණය විසින් සරත් කොතලාවලට එරෙහිව වන්දි ලබාදීමේ නියෝගයක් ලබාදී නැතත්, සරත් කොතලාවල සන්තකයේ තිබූ උල්ලංඝනය කරන ලද ද්රව්ය ලබාදීම සඳහා ශීලා විජේවර්ධනගේ ඉල්ලීම ගැන කටයුතු නොකිරීම සම්බන්ධයෙන් වාණිජ මහාධිකරණය වරදක් කර ඇති බවට ශ්රේෂ්ඨාධිකරණය කරුණු සොයාගෙන ඇති අතර, ඒ අනුව වාණිජ මහාධිකරණයේ තීන්දුව සංශෝධනය කර ඇත. මේ අනුව සරත් කොතලාවල යටතේ තිබූ සියලු උල්ලංඝනය කරන ලද ද්රව්ය ලබාදෙන ලෙස ශ්රේෂ්ඨාධිකරණය විසින් සරත් කොතලාවලට නියෝග කර ඇත. එසේම ශ්රේෂ්ඨාධිකරණය විසින් ලබාදී ඇති සහනය වාණිජ මහාධිකරණය විසින් එහි තීන්දුවෙන් ලබාදී ඇති ස්ථිර තහනම් නියෝගයට අමතරව වේ. පළමු වගඋත්තරකරුට එරෙහිව අභාවප්රාප්ත ක්ලැරන්ස් විජේවර්ධනගේ සංගීත නිර්මාණ සම්බන්ධයෙන් ආර්ථික හා සදාචාරාත්මක අයිතිවාසිකම්වලට අයත් වන ගීත නිර්මාණ ඍජව හෝ වක්රව ප්රතිනිෂ්පාදනය කිරීම, ඕනෑම මහජන රංගනයක් සිදුකිරීම හෝ වෙනත් ආකාරයකින් මහජනතාවට සන්නිවේදනය කිරීම වළක්වන ස්ථිර වාරණ නියෝගයක් ලබාදීමේ වාණිජ මහාධිකරණයේ තීරණය මේ අනුව ශ්රේෂ්ඨාධිකරණය විසින්ද තහවුරු කර තිබේ.
මෙම ඓතිහාසික විනිශ්චය ලබාදී ඇත්තේ ශ්රේෂ්ඨාධිකරණ විනිසුරුවරුන් වන ඊ.ඒ.ජී.ආර්. අමරසේකර, ඒ.එල්. ශිරාන් ගුණරත්න සහ අර්ජුන ඔබේසේකර යන විනිසුරු මඬුල්ලක් විසිනි.
ප්රවීණ ජනප්රිය ගායක, ගීත රචක, සංගීත නිෂ්පාදක සහ සංගීත අධ්යක්ෂ ක්ලැරන්ස් විජේවර්ධන මහතා තමන්ට වයස අවුරුදු 53ක් වැනි කෙටි ආයුෂ කාලයකදී 1996 දෙසැම්බර් 13 වැනිදා මිය ගියේය. ශ්රී ලංකා කණ්ඩායම් සංගීතයේ සහ පොප් සංගීතයේ පුරෝගාමියකු වූ ඔහු සිදුකළ ගීතමය නිර්මාණ මෙරට සංගීත රසිකයන් අතරින් කිසිදු දිනක නොමැකී යනු ඇත. ඒ නිසාම ඔහු මෙරට සදා අමරණීය මිනිසකු බවට පත්වනු ඇතිය.
ප්රියන්ත හෙට්ටිගේ
