අද කැලෑ කොලමෙන් අවධානය යොමුකරන්නේ පරිසරයට ඇලුම් කරන තවත් පිරිසක් වන යාල ලෙපර්ඩ් සෙන්ටර් (Yala Leopard Cente) කණ්ඩායම සංවිධාන කරන විශේෂ වනජීවී ඡායාරූප ප්රදර්ශනයක් පිළිබඳවයි. මෙම ඡායාරූප ප්රදර්ශනයේ විශේෂත්වය වන්නේ මෙරටට පමණක් අවේණික (Panthera pardus kotiya) යන විද්යාත්මක නාමයෙන් හඳුන්වන දිවියන්ගේ ඡායාරූප රාශියක් ඊට ඇතුළත් වීමයි. Sri Lanka Latest News
යාල, කුමන, හෝර්ටන්තැන්න, විල්පත්තුව වැනි ප්රධාන වනෝද්යානවල ජීවත්වන දිවියන්ගේ විවිධ ඉරියව්වලින් සමන්විත මෙම ඡායාරූප ප්රදර්ශනය පවත්වනු ලබන්නේ දෙවැනි වතාවටයි. මෙහි පළමු ප්රදර්ශනය ජාතික කෞතුකාගාරයේදී 2024දී පැවැත්වීය.
ඒ අනුව, මෙවර ඡායාරූප ප්රදර්ශනය පැවැත්වෙන්නේ සංචාරක පාරාදීසයක් වන ඓතිහාසික ගාලු කොටු පවුර තුළ ඇති මුහුදු කෞතුකාගාර ශාලාවේදියි. ප්රදර්ශනය 2025 පෙබරවාරි 7, 8 සහ 9 යන දිනවල පෙ.ව. 9.00 සිට සවස 6.30 දක්වා මහජන ප්රදර්ශනය සඳහා විවෘතව ඇත.
ඡායාරූප ප්රදර්ශනයේ සංවිධායකන් වන රවිඳු සිරිවර්ධන, මිලින්ද වත්තේගෙදර සහ නිශාන්ත සිල්වා යන අය ලියුම්කරු සමග පැවැසුවේ සංචාරක ආකර්ෂණය දිනාගැනීම හා මෙරටට පමණක් ආවේණික දිවියන්ගේ ස්වභාවික චර්යා රටාවන් කෙරෙහි ජනතාවගේ උනන්දුව ඉහළ නැංවීමේ අරමුණෙන් මෙය සංවිධාන කරන බවයි.
අප රටේ ස්වභාවික සෞන්දර්යයේ අසිරිය සහ අභිමානය ලොවට කියැපෑමටත් ඒ හරහා මෙරටට විදෙස් සංචාරකයන් වැඩි වශයෙන් ආකර්ෂණය කරගැනීමටත් මෙම ප්රදර්ශනය ඉවහල්වනු ඇති බව අපි විශ්වාස කරමු.
සමන් හල්ලොලුව
