ඊයේ දින පැවැති මුල්ලිවයික්කාල් අනුස්මරණ දිනය නිමිත්තෙන් නිල ප්රකාශයක් නිකුත් කළ කැනඩා අග්රාමාත්ය මාර්ක් කාර්නි, ශ්රී ලංකාවේ දෙමළ ජනතාවට එරෙහිව සිදුවූ බව පැවසෙන අපරාධ “ජන සංහාරයක්” ලෙස කැනඩාව විසින් පිළිගෙන ඇති බව යළි තහවුරු කර තිබේ.Sri Lanka Latest News
ඊයේ නිකුත් කළ එම නිවේදනයේ සඳහන් වන්නේ, “කැනඩාවේ සහ ලොව පුරා සිටින දෙමළ ප්රජාව සමඟ එක්ව දෙමළ ජන සංහාර අනුස්මරණ දිනය සනිටුහන් කරන” බවයි. එමෙන්ම, දෙමළ ජනතාව තම මව්බිමේදී සන්නද්ධ ගැටුම තුළ මුහුණ දුන් දැවැන්ත වේදනාව සහ පීඩාව පිළිබඳවද එහිදී අවධාරණය කර ඇත.
“ශ්රී ලංකාවේ සිවිල් යුද්ධය වසර විසිපහකට වැඩි කාලයක් පුරා දස දහස් ගණනක් සිවිල් වැසියන්ගේ ජීවිත බිලිගත්තා,” යනුවෙන් එම ප්රකාශයේ සඳහන් වේ.
“ජීවිත අහිමි වූවන්ගේ මතකයට අප ගෞරව කරමින්, දැඩි වේදනාවකට මුහුණ දුන් ජීවිත බේරාගත් අය, පවුල් සහ ප්රජාවන් සමඟ අප එකට සිටිනවා,” යනුවෙන්ද එහි දැක්වේ.
කැනඩාවේ ජීවත් වන විශාල දෙමළ ප්රජාව පිළිබඳවද අග්රාමාත්යවරයා සිය ප්රකාශයෙන් අවධානය යොමු කර තිබේ. ශ්රී ලංකාවේ හටගත් ප්රචණ්ඩත්වයෙන් සහ පීඩනයෙන් ගැලවීමට බොහෝ දෙමළ ජනතාව කැනඩාවට පැමිණි බවද ඔහු සඳහන් කර ඇත.
“ලෝකයේ විශාලතම දෙමළ ඩයස්පෝරාවන්ගෙන් එකක් කැනඩාවේ ජීවත් වෙනවා. ඔවුන්ගෙන් බොහෝ දෙනෙක් ශ්රී ලංකාවේ ප්රචණ්ඩත්වයෙන් සහ පීඩනයෙන් බේරීමට මෙරටට පැමිණි අයයි,” යනුවෙන් ඔහු ප්රකාශ කළේය.
2022 වසරේදී කැනඩා පාර්ලිමේන්තුව විසින් මැයි 18 “දෙමළ ජන සංහාර අනුස්මරණ දිනය” ලෙස ඒකමතිකව පිළිගත් බවත්, ශ්රී ලංකාවේ දෙමළ ජනතාවට එරෙහිව සිදුවූ අපරාධ “ජන සංහාරයක්” ලෙස නිල වශයෙන් පිළිගෙන ඇති බවත් අග්රාමාත්යවරයා සිහිපත් කළේය.
“2022දී කැනඩා පාර්ලිමේන්තුව ඒකමතිකව මැයි 18 දෙමළ ජන සංහාර අනුස්මරණ දිනය ලෙස පිළිගෙන, ශ්රී ලංකාවේ දෙමළ ජනතාවට එරෙහිව සිදුවූ අපරාධ ජන සංහාරයක් ලෙස හඳුනාගත්තා. එය මෙම වේදනාකාරී ඉතිහාසය පිළිගැනීමේ වැදගත් පියවරක්,” යනුවෙන් එහි සඳහන් විය.
එමෙන්ම, ශ්රී ලංකාවේ වගවීම, මානව හිමිකම් සහ ස්ථාවර සාමයක් වෙනුවෙන් ජාත්යන්තර මට්ටමේ උත්සාහයන්ට කැනඩාව තවදුරටත් සහාය දක්වන බවද අග්රාමාත්යවරයා ප්රකාශ කළේය.
“වගවීම ඉදිරියට ගෙන යාම, මානව හිමිකම් ආරක්ෂා කිරීම සහ දිවයිනේ ජනතාව සඳහා ස්ථාවර සාමයක් ප්රවර්ධනය කිරීම වෙනුවෙන් වන ජාත්යන්තර උත්සාහයන්ට කැනඩාව අඛණ්ඩව සහාය දක්වනු ඇත,” යනුවෙන් ඔහු සඳහන් කළේය.
“මානව ගරුත්වය සහ යුක්තිය වෙනුවෙන් අපගේ කැපවීම නැවත තහවුරු කරන අතර, මෙවැනි බරපතළ මානව හිමිකම් උල්ලංඝනයන් කිසිදා නොසඟවා අමතක නොවන බවට අප වගබලා ගන්නවා,” යනුවෙන් එම නිවේදනය අවසන් කර ඇත.
2009 වසරේ ශ්රී ලංකා යුධ හමුදා මෙහෙයුම්වල අවසන් අදියරේදී මියගිය බව කියන දස දහස් ගණනක් දෙමළ සිවිල් වැසියන් සිහිපත් කරමින්, මුල්ලිවයික්කාල් සංහාරයේ 17වන සංවත්සරය දෙමළ ජනතාව විසින් මව්බිම සහ විදේශගත ප්රජාවන් තුළ සමරන අවස්ථාවක මෙම ප්රකාශය නිකුත් වී තිබේ.
