‘ශ්රී ලංකාවේ සිවිල් යුද්ධය අතරතුර සිදුවූ සහ අදටත් ප්රජාවන්ට බලපෑමක් ඇතිකරන මානව හිමිකම් උල්ලංඝනය කිරීම් සහ අපයෝජනයන් සඳහා වගවීම සෙවීම ඇතුළු ශ්රී ලංකාවේ මානව හිමිකම් සඳහා එක්සත් රාජධානියේ රජය කැපවී සිටී. වගකිව යුත්තන්ට දඬුවම් නොලැබීමට ඉඩ නොදෙන බවට සහතික කිරීමට මම අපගේ මැතිවරණ ව්යාපාරය තුළදී ප්රතිඥාවක් දුන්නා. මෙම තීරණය මගින් අතීත මානව හිමිකම් උල්ලංඝනය කිරීම් සහ අපයෝජනයන්ට අදාළව වගකිව යුතු අය, වගකිව යුතු බවට සහතික කෙරුණා. මෙම සුවිශේෂ තීරණයන් ගැනුණේ එවැනි වටපිටාවකදීයි. ශ්රී ලංකාවේ මානව හිමිකම් වැඩිදියුණු කිරීම සඳහා නව ශ්රී ලංකා රජය සමග කටයුතු කිරීමට එක්සත් රාජධානියේ රජය බලාපොරොත්තු වන අතර, ජාතික සමගිය සඳහා ඔවුන්ගේ කැපවීම් සාදරයෙන් පිළිගනී. ප්රජාවන් හා එක්ව ඉදිරියට යෑමට නම් අතීත වැරැදි සඳහා පිළිගැනීමක් සහ වගවීමක්ද තිබිය යුතු අතර, අද මෙලෙස හඳුන්වා දී ඇති සම්බාධක ලැයිස්තුගත කිරීම් මගින් එම අපේක්ෂාවන්ට සහාය වීම සිදුවනු ඇත…’ Sri Lanka Latest News
කුමක්ද මෙලෙස ඇසෙන බැරෑරුම් කතාන්දරය? මෙය කියා සිටින්නේ කවරකු විසින්ද? මානව හිමිකම් උල්ලංඝනයට අදාළව මෙම කතාව ඇසුණේ මෙයට දින කීපයකට පෙරදීය. එක්සත් රාජධානියේ (එංගලන්තයේ) රජයේ නිල ප්රකාශයක් මගින් අපට මෙම කතාව කියා සිටින්නේ එරට රජයේ වත්මන් විදේශ කටයුතු රාජ්ය ලේකම් ඩේවිඩ් ලැමී නමැති රාජ්යතාන්ත්රිකයා විසිනි. ඔහුගේ තනතුර සම්පූර්ණ වශයෙන් සඳහන් වන්නේ විදේශ, පොදුරාජ්ය මණ්ඩලයීය සහ සංවර්ධන කටයුතු පිළිබඳ රාජ්ය ලේකම් වශයෙනි. මෙම තනතුර බි්රතාන්ය රජයේ ඉතා බලගතු තනතුරක් ලෙස සැලකෙන්නේ, එමගින් එක්සත් රාජධානියේ සිදුකෙරෙන සියලු රාජ්යතාන්ත්රික විදේශ කටයුතු සඳහා පූර්ණ බලතල හිමිවන හෙයිනි. ඩේවිඩ් ලැමී මෙම සුවිශේෂ තනතුර සඳහා පත්වන්නේ පසුගිය 2024 ජූලි මාසයේදී බලයට පත්වුණු බි්රතාන්ය නව රජය යටතේදීය. එනම් එරට නව අගමැති කීර් ස්ටාර්මර්ගේ රජය යටතේය. එයට පෙර මෙම දේශපාලකයා වසර 25කට ආසන්න කාලයක්ම බි්රතාන්ය රජයන් කිහිපයක් යටතේ බි්රතාන්ය පාර්ලිමේන්තු මන්ත්රී ධුරයද දරා ඇත. දැනට 52 හැවිරිදි වියේ පසුවන ඔහු බි්රතාන්ය කළු ජාතිකයෙකි. මෙම බි්රතාන්ය රාජ්යතාන්ත්රිකයා පසුගියදා අප ශ්රී ලංකාවට අදාළව එසේ සිදුකළ ප්රකාශය ඉතා ආන්දෝලනාත්මක එකක් විය.
එය ආල්දෝලනාත්මක ප්රකාශයක් වූයේ කෙසේද? එය නම් මෙයට දින කීපයකට පෙරදී දෙස් විදෙස් මාධ්ය හරහා අපට අසන්නට ලැබුණු තවත් සුවිශේෂ පුවතක් හේතුකොට ගෙනය. එමගින් මෙසේ කියැවිණි.
‘ශ්රී ලංකාවේ සිවිල් යුද්ධය අතරතුර බරපතළ මානව හිමිකම් උල්ලංඝනය කිරීම් සහ අපයෝජනයන් සම්බන්ධයෙන් වගකිව යුතු පුද්ගලයන්ට එරෙහිව එක්සත් රාජධානිය (මහා බි්රතාන්යය) සම්බාධක පනවා තිබේ. එම අපරාධ සම්බන්ධයෙන් වගකිව යුතු හිටපු ශ්රී ලාංකික හමුදා අණදෙන නිලධාරීන් තිදෙනකුට සහ දෙමළ ඊළාම් විමුක්ති කොටි (එල්.ටී.ටී.ඊ.) සංවිධානයේ හිටපු අණදෙන එක් නිලධාරියකුටද එරෙහිව මෙම සම්බාධක පනවා ඇත. අදාළ අපරාධ සඳහා වගවීම සෙවීමට කටයුතු කිරීම මෙන්ම, දඬුවම් නොලැබීමේ සංස්කෘතියක් වැළැක්වීම සම්බාධකවල ප්රධාන අරමුණයි. ශ්රී ලංකාවේ සිවිල් යුද්ධය අතරතුර නීති විරෝධී ඝාතන, විවිධ වධ හිංසා පැමිණවීම්, අතුරුදන් කිරීම් මෙන්ම ලිංගික ප්රචණ්ඩත්වයද සිදුකිරීම ඇතුළු බරපතළ මානව හිමිකම් උල්ලංඝනයට අදාළව ඉහත පුද්ගලයන් හතර දෙනා වගකිව යුතු වෙයි. අද එක්සත් රාජධානිය සම්බාධක පැනවූ පුද්ගලයන් හතර දෙනාට ශ්රී ලංකා හමුදාවේ හිටපු ජ්යෙෂ්ඨ හමුදාපතිවරුන් තිදෙනකු සහ ශ්රී ලංකා හමුදාව වෙනුවෙන් ක්රියාත්මක වූ ‘පැරාමිලිටරි කරුණා කණ්ඩායම’ට නායකත්වය දුන් හිටපු එල්.ටී.ටී.ඊ. හමුදාපතිවරයකුද අයත් වෙයි. අද පනවන ලද මහා බි්රතාන්යයේ සම්බාධක යටතේ එක්සත් රාජධානියට සංචාරක තහනම් කිරීම්, වත්කම් කැටිකිරීම් සහ තවත් පියවර කීපයක් අයත් වනු ඇත. මෙතැන් සිට එම පුද්ගලයන්ට අදාළව මෙම සම්බාධක ස්ථිරව ක්රියාත්මක වීම සිදුවනු ඇතිය…’
දැන් ඔබ මෙම කතාවෙහි යම් සන්ධිස්ථානයකට පැමිණ සිටින්නේය. මහා බි්රතාන්යයේ වත්මන් නව රජය විසින් ගෙන ඇති මෙම තීරණය මේ වනවිට ලොව පුරා මහත් ආන්දෝලනයක් ඇති කිරීමට සමත් වී ඇත. මෙම තීරණයට අදාළව මේ වනවිට විවිධ දෙස් විදෙස් පාර්ශ්ව විසින් නොයෙකුත් අදහස් හා මතිමතාන්තර ප්රකාශ කර ඇත. තවත් එම තොරතුර සොයා බලන්නට ප්රථම මෙලෙස මහා බි්රතාන්යයේ සම්බාධකවලට ලක්වුණු ශ්රී ලාංකික සුවිශේෂ පුද්ගලයන් හතර දෙනාගේ තතු සොයා බලමු.
ජෙනරල් ශවේන්ද්ර සිල්වා – විශ්රාමික ශ්රී ලංකා හමුදාපතිවරයෙකි. ඔහු 2019 සිට 2022 දක්වා ශ්රී ලංකා යුද හමුදාවේ හමුදාපතිවරයා ලෙස සේවය කළේය. ජෙනරල් ශවේන්ද්ර සිල්වා ශ්රී ලංකා සිවිල් යුද්ධය අතරතුරදී 58 වැනි සේනාංකයේ ප්රභූ අණදෙන නිලධාරියා ලෙස කටයුතු කරමින් ප්රසිද්ධියට පත්විය. ශ්රී ලංකා ආරක්ෂක මාණ්ඩලික ප්රධානී සහ එක්සත් ජාතීන්ගේ මූලස්ථානයේ ශ්රී ලංකා නියෝජ්ය නිත්ය නියෝජිතයා ලෙසද කටයුතු කළේය. දැනට 60 වැනි වියෙහි පසුවන ඔහු සම්මාන රැසකින් පිදුම් ලබා ඇත.
අද්මිරාල් වසන්ත කරන්නාගොඩ – ශ්රී ලංකා නාවික හමුදාවේ නාවික හමුදාපතිවරයා ලෙස ශ්රී ලංකා සිවිල් යුද්ධයේ අවසාන අදියරේදී කටයුතු කළේය. ඔහුගේ අණ යටතේ ශ්රී ලංකා නාවික හමුදාවට ඉන්දියානු සාගරයේ ඉහළ මුහුදේදී එල්.ටී.ටී.ඊ. කොටි සංවිධානයේ අවි නැව් සහ යාත්රා දහයකට අධික ප්රමාණයක් මුහුදේ ගිල්වා දැමීමට සමත් විය. දැනට 72 වැනි වියේ පසුවන අද්මිරාල් වසන්ත කරන්නාගොඩ විශ්රාම ගැනීමෙන් පසු ජපානයේ තානාපති ධුරයද දැරීය.
ජෙනරල් ජගත් ජයසූරිය – 2009 සිට 2013 දක්වා ශ්රී ලංකා යුද හමුදාවේ හමුදාපතිවරයා ලෙස කටයුතු කළේය. ශ්රී ලංකා සිවිල් යුද්ධයේ අවසාන අදියරේදී (2008-2009) ඔහු වන්නි කලාපයේ ශ්රී ලංකා යුද හමුදාවේ ප්රහාරවල සමස්ත අණදෙන නිලධාරියා ලෙස කටයුතු කළේය. විශ්රාම ගැනීමෙන් පසුව ආරක්ෂක මාණ්ඩලික ප්රධානියා ලෙස සහ විදේශ රටවල් කිහිපයක ශ්රී ලංකා තානාපති ධුරයන්ද දැරීය. හමුදා සම්මාන රැසකින් පිදුම් ලබා ඇත.
කර්නල් කරුණා අම්මාන් – දෙමළ ඊළාම් විමුක්ති කොටි ත්රස්ත සංවිධානයේ හමුදා නායකයෙකි. වසර 20ක් පමණ කොටි සංවිධානයේ කටයුතු කර පසුව එකල රාජපක්ෂ රජය සමග එක්වී කොටි සංවිධානයට එරෙහිව කටයුතු කළේය. මෙසේ අවි ආයුධ අතහැර දේශපාලනයට පිවිසීමෙන් පසුව ඔහු ජනාධිපති මහින්ද රාජපක්ෂ මහතාගේ රජයේ ජාතික ලැයිස්තු මන්ත්රී ධුරයකට පත්කරනු ලැබුවේය. ඉන් පසුව ඔහුට එම රජයේම කැබිනට් අමාත්ය ධුරයක්ද හිමිවිය. කරුණා අම්මාන් දැනට 58 වැනි වියේ පසුවෙයි.
දැන් ඔබ මෙම කතාවෙහි සුවිශේෂ හැරවුම් ලක්ෂ්යයකට පැමිණ සිටින්නේය. පසුගියදා එක්සත් රාජධානියේ (මහා බි්රතාන්යයේ) රජයේ සම්බාධකවලට මුහුණ දී සිටින ශ්රී ලාංකිකයන්ගේ විස්තරද ඔබට පැහැදිලි වනු ඇත. බි්රතාන්ය රජයේ මෙම ඍජු තීරණයට අදාළව දෙස් විදෙස් පාර්ශ්ව ගණනාවක් විසින් පැසසුම් මෙන්ම හෙළාදැකීම්ද ඉදිරිපත් කර ඇත. ඒවා සියල්ලක්ම මෙහි ලියා තබන්නට ඉඩකඩ මදිය. එම වටපිටාවේදී එම තීරණයට අදාළව විදේශ මානව හිමිකම් පාර්ශ්ව ගණනාවක්ම පැසසුම් ඉදිරිපත් කර තිබිණි. එසේ වුවද ශ්රී ලංකාව තුළ යම් පාර්ශ්ව සහ විදේශයන්හි සිටින සිංහල ජාතික ඩයස්පෝරා පාර්ශ්ව මෙම තීරණයට එරෙහිව තම දෝෂාරෝපණයන් ප්රකාශ කර තිබිණි. තත්ත්වය කෙසේ වුවද බි්රතාන්ය රජයේ තීරණය එසේම වෙනස් නොවී පවතින අතර, ක්රියාවෙහිද නැංවෙනු ඇතිය.
මෙලෙස පනවන ලද සම්බාධකවලට මෙම සවිස්තරාත්මක තොරතුරු අයත් බව පෙනෙයි. එනම් මූල්යමය සම්බාධකවලට මුදල් හා මූල්යමය නොවන වත්කම් (උදාහරණ ලෙස මහා බි්රතාන්යය තුළ තිබෙන බැංකු ගිණුම් හා වෙනත් මුදල් තැන්පතු සහ ඉඩම් හා නිවාස දේපළ මෙන්ම වාහන ආදී දේපළ) මේ සඳහා අයත් වෙයි. මෙහිදී එම දේපළ කැටිකිරීම සහ තහනම් කිරීම සිදුකෙරෙන අතර, එම අදාළ පුද්ගලයන්ට එම දේපළවලට කිසිදු වත්කමක් ලබා නොදෙන බවට සහතික කෙරෙයි. සංචාරක සම්බාධකවලට එම අදාළ පුද්ගලයන්ට එක්සත් රාජධානියට ඇතුළු වීමට හෝ රැඳී සිටීමට නොහැකි අතර, සංක්රමණ අරමුණු ඇතුළුව එක්සත් රාජධානියට සංචාරය කිරීම සඳහා වන ඕනෑම වීසා අයැදුම්පතක් ප්රතික්ෂේප කරනු ලැබෙයි. මෙම වටපිටාවේදී අපගේ මතකයට එන්නේ පසුගිය 2023 ජනවාරි මාසයේදී කැනඩාව විසින් මෙරට හිටපු ජනාධිපතිවරුන් වන මහින්ද රාජපක්ෂ මහතාට සහ ගෝඨාභය රාජපක්ෂ මහතාටද මේ ආකාරයේ සම්බාධක පැනවීමේ සිදුවීමය.
ප්රියන්ත හෙට්ටිගේ
