2019 ජනාධිපතිවරණයේ පරාජයට පත් අපේක්ෂක සජිත් ප්රේමදාස ගත්ත ඡන්ද ප්රතිශතය 41.99%කි. සජිත් ගත්ත ඡන්ද සංඛ්යාව 55,64,239කි. මෙවර 2024 ජනාධිපතිවරණයේදී ජයග්රහණය කළ අපේක්ෂක අනුර කුමාර ගත්ත ඡන්ද ප්රතිශතය 42.31%කි. ඔහු ගත්ත ඡන්ද සංඛ්යාව 57,40,179කි. Sri Lanka Latest News
‘ඒ කියන්නේ මෙවර අනුර දිනලා තියෙන්නේ 2019 පරාජය වෙච්ච සජිත් ගත්ත ඡන්ද ප්රතිශතයෙන්නේ…?’
ඇත්තටම අනුර දිනලා තියෙන්නේ 2010 හැර ලංකාවේ ජනාධිපතිවරණ ඉතිහාසයේ පරාජිත අපේක්ෂකයා ගත්ත ඡන්ද ප්රතිශතයටත් වඩා අඩු ප්රතිශතයකින්ය. 1999 සිට ජනාධිපතිවරණ 5ක පරාජිත අපේක්ෂකයා ගත්ත ඡන්ද ප්රතිශත දෙස බලන විට එය හොඳින්ම පැහැදිලිය.
‘අනුරට ඡන්ද කෝටියක්…’
මේ, 2024 ජනාධිපතිවරණය ප්රකාශයට පත්කරන්න කලින්ම ජවිපෙ පටන්ගත් කැම්පේන් එකය. සමාජ මාධ්ය ජනමත සමීක්ෂණවලින් පෙන්නුවේද අනුර 60%කට වඩා ඡන්ද ගන්නා බවය. පක්ෂ භේදයකින් තොරව හැමෝම කීවේ අනුරට රටේ රැල්ලක් තියෙන බවය. මේ රැල්ල 2019 ගෝඨාගේ රැල්ලටත් වඩා මහ විශාල රැල්ලක් බව දේශපාලන විචාරකයෝ කීහ.
සජිත් දිනනවා කී හැමෝම කීවේ උතුරු-නැගෙනහිර සහ වතුකරයේ සුළු ජාතික ඡන්දවලින් සජිත්ට දිනන්න පුළුවන් කියාය. ඇත්ත කතාව නම් රනිල් සුළු ජාතිකයන් ජීවත් වෙන උතුරු-නැගෙනහිර සහ වතුකරයේ දිස්ත්රික්කවල ගත්ත ඡන්ද 7,23,426 සහ දෙමළ ස්වාධීන අපේක්ෂකයා ගත්ත ඡන්ද 2,26,343 එකට එකතු කළ විට ඡන්ද 9,49,769කි. මේ 9,49,769 සජිත් ගත් ඡන්ද සංඛ්යාවට එකතු කළ විට ඡන්ද 53,12,804කි. රනිල් සුළු ජාතිකයන් ජීවත් වන කොළඹ, මහනුවර, මාතලේ ගත්ත ඡන්ද මේ සංඛ්යාවට එකතු කළේ නැත. රනිල් කොළඹ, මහනුවර, මාතලේ දිස්ත්රික්කවල ගත්ත සුළු ජාතික ඡන්ද පමණක් සජිත්ට එකතු කළා නම් දිනන්නේ සජිත්ය.
මෙහිදී සිංහල ජාතිකයන් ජීවත් වන දිස්ත්රික්කවලින් රනිල් ගත් ඡන්ද සජිත්ට එකතු කළේ නැත. මන්ද ඒ ඡන්ද අතර පොහොට්ටු සහ යූ.ඇන්.පී. ඡන්ද තිබිණි. සජිත්ට එකතු කළේ නුවරඑළිය, යාපනය, වන්නිය, මඩකළපුව, දිගාමඩුල්ල, ත්රිකුණාමලය, පුත්තලම, බදුල්ල යන දිස්ත්රික්ක පමණි. දෙමළ ජාතික සන්ධාන නායක ශ්රීධරන්ට සහ තෝරාගත් දෙමළ ජාතික සන්ධාන මන්ත්රීවරුන්ට බාර් ලයිසන් දී ස්වාධීන දෙමළ අපේක්ෂකයෙක් දැම්මේ රනිල්ය.
ෆොන්සේකාව ජනාධිපති ඡන්දයට දැම්මේත් රනිල්ය. ඒ, සජිත්ගේ ඡන්ද කඩන්නටය.
‘ඒ කියන්නේ සජිත්ව පරාජය කළේ රනිල්ද?’
රනිල් කළේ 1988 ඔසී අබේගුණසේකර කරපු කොන්ත්රාත්තුවය. 1988 ජනාධිපතිවරණයේදී ශ්රී ලංකා මහජන පක්ෂ අපේක්ෂක ඔසී අබේගුණසේකර ගත්ත ඡන්ද සංඛ්යාව මැතිනියට එකතු කළා නම් දිනන්නේ මැතිනියය. ඔසී කළේ යූ.ඇන්.පී.යේ කොන්ත්රාත්තුවකි.
මෙදා රනිල් කළේත් අනුරගේ කොන්ත්රාත්තුවකි.
සජිත් 2024 ජනාධිපතිවරණයේ මුහුණ දුන්නේ අනුර කුමාරට නොව වසර 76ක් රට පාලනය කළ ශ්රීලනිපය, යූ.ඇන්.පී.ය, පොදුජන පෙරමුණ වගේම 2015 මෛත්රී-රනිල් ආණ්ඩුවේ කොටස්කාරයන්ව සිටි සමගි ජන බලවේගයටද එරෙහිව ආ මහජන සුනාමියකටය. මේ මහජන සුනාමියෙන් ශ්රීලනිපය, යූ.ඇන්.පී.ය, පොදුජන පෙරමුණ ඉවර විය.
හැබැයි සමගි ජන බලවේගය ඉවර වුණේ නැත. 60%කටත් එහා ඡන්ද ප්රතිශතයකින් අනුරව දිනවන්න රැලි ගහපු මහජන සුනාමිය 42%කට බස්සවා 50%ක ඡන්ද ප්රතිශතයක් අහිමි ලංකාවේ පළමු ජනාධිපති බවට අනුර පත්කරන්න සජිත් සමත් විය.
සජිත් මේ ගේම ගැහුවේ ජවිපෙ අති ප්රබල සමාජ මාධ්ය මෙහෙයුම හතර වටින් වටකොට ගහද්දීය.
ලංකාවේ ප්රධාන පෙළේ මාධ්ය වූ දෙරණ, සිරස, ලංකාදීප, ස්වර්ණවාහිනී යන මාධ්ය ආයතන අනුර කුමාර දිනවන්න දිවා රෑ වැඩකරද්දීය. එසේම රාජ්ය මාධ්ය වූ ජාතික රූපවාහිනිය සහ ස්වාධීන රූපවාහිනිය රනිල්ට සහාය පළකරමින් අනුරට ප්රචාරය දෙමින් සජිත්ට පහර පිට පහර ගසද්දීය. දෙරණ සහ ලංකාදීප, ඩේලි මිරර් රනිල්ට සහ අනුරට ප්රචාරය දී සජිත්ව තුන්වැනි තැනට දැම්මාහ. 2019 ගෝඨාභය දිනවන්න නයි පෙන්නපු දෙරණ මේ ජනාධිපතිවරණයේ විවාදයක් දමා සජිත්ට පන්න පන්නා ගැහුවේය.
පොහොට්ටුව රනිල්ට ජනාධිපතිකම දුන්නේ රනිල්ට ආදරයට නොව යූ.ඇන්.පී. ජනාධිපති කෙනෙක් පත්කරලා සජිත්ටයි සමගි ජන බලවේගයටයි කෙළින්නටය. රනිල් ඒ වැඩේ කරන කොට පොහොට්ටුව පිබිදෙයි කියලා රාජපක්ෂලා සිතූහ. ඒත් පොහොට්ටුව පරවිය. ජවිපෙ පිබිදුණි.
රනිල් 2001 අගමැති වන්නේ ප්රභාකරන්ගේ පිහිටෙනි. ප්රභාකරන් කොළඹ බෝම්බ පුපුරුවා යාපනය ආක්රමණය කරන්න ආවේ නැත්නම් චන්ද්රිකාගේ ආණ්ඩුව වට්ටන්න බැරිය. රනිල් අගමැති විය. රනිල්ට එන්න පාර කැපපු ප්රභාකරන් විනාශ විය.
රනිල්ව 2015 අගමැති කරන්නේ ශ්රීලනිපයය. 2019 වනවිට ශ්රීලනිපය විනාශ වී නන්නත්තාර විය.
රනිල්ව 2022 අගමැති කොට ජනාධිපති කරන්නේ පොහොට්ටුවය. 2024 පොහොට්ටුව නැත්තටම නැති විය.
2024 ජනාධිපතිවරණ පරාජයෙන් පසු තව පොට්ඩෙන් සමගි ජන බලවේගය රනිල්ව කරේ දමා ගන්නවාය. 2024 මහ මැතිවරණයට සජිත් රනිල්ව එකතු කරගත්තා නම් මේ මහ මැතිවරණයෙන් විනාශ වන්නේ සමගි ජන බලවේගයය.
සමගි ජන බලවේගය හදපු දින සිට රනිල්, රාජපක්ෂලා, ජවිපෙ වෙන වෙනම ගහලා සමගි ජන බලවේගයත් සජිත්වත් ඉවර කරන්න ගේම් ගැසූහ. ගෝඨා දින්න හැටියේ සමගි ජන බලවේගයේ පක්ෂය හිමි ඩයනාව ආණ්ඩුවට ගත්තේය. රාජපක්ෂලා රනිල්ව පාර්ලිමේන්තුවට ගෙනැවිත් සජිත්ගෙන් විපක්ෂ නායක ධුරය අරන් දෙන්න උත්සාහ කළහ. බැරිවූ තැන රනිල්ව ජනාධිපති කොට රනිල් ලව්වා සමගි ජන බලවේගය කඩන්න උත්සාහ කළහ. ජවිපෙත් ඒකට උල්පන්දම් දුන්හ. ජනාධිපතිවරණය මැද තලතා සමගි ජන බලවේගය කඩාගෙන රනිල්ට එකතු වූයේ රනිල් දිනවන්න නොව අනුරව දිනවන්නටය. රනිල් හිතුවේ අනුර එක වී තමාට දෙක වෙන්න පුළුවන් කියාය. නැතිනම් සජිත්ව පරාජය කොට සජිත්ව පන්නලා සමගි ජන බලවේගය යූ.ඇන්.පී.යට ගෙන යළි විපක්ෂ නායක වෙන්නටය. අද රනිල් ඡන්දය ඉල්ලන්නේත් නැත. ජාතික ලැයිස්තුවේත් නැත. යූ.ඇන්.පී. නායක, සභාපති, මහලේකම් කවුරුවත් ඡන්දය ඉල්ලන්නේ නැත. රාජපක්ෂලා ඡන්දය ඉල්ලන්නේත් නැත.
හැබැයි සජිත් ඡන්දය ඉල්ලයි. සමගි ජන බලවේගය රටේ ප්රධාන විපක්ෂයය. තිත්ත වුණත් ඇත්ත ඒකය. මහජන සුනාමියකට හසුවී පක්ෂ නාය යද්දී බේරිලා ඉතිරි වෙලා තියෙන්නේ සමගි ජන බලවේගය විතරය.
