ජාතික ජන බලවේගය දේශපාලන රැස්වීම් සඳහා සහභාගිවීම හේතුවෙන් තනතුරට අදාළ විශ්රාමික වරප්රසාද අභිමිකර තිබූ ගුවන් හමුදාවේ විශ්රාමික එයාර් වයිෂ් මාෂල් සම්පත් තුයියකොන්තාගේ අදාළ වරප්රසාද කඩිනමින් ඔහුට නැවතත් ලබාදෙන ලෙස ශ්රේෂ්ඨාධිකරණය නීතිපතිවරයාට හා වගඋත්තරකාර පාර්ශ්වයට ඊයේ (7) නියෝග කර තිබෙනවා.Sri Lanka Latest News
අභිමි කරන ලද වරප්රසාද නැවත ලබාදෙන බවට සඳහන් ලිපියක් පෙත්සම්කාර සම්පත් තුයියාකොන්තා මහතාට හා ඔහු වෙනුවෙන් පෙනී සිටි නීතිඥවරයාට ලබා දෙන ලෙසටයි විනිසුරුවරුන් නියෝග කර ඇත්තේ.
ජාතික ජන බලවේගය රැස්වීම් කිහිපයකට සහභාගිවීම හේතුවෙන් ගුවන් හමුදා විශ්රාමික වරප්රසාද අහිමි කර තමන්ව අසාදු ලේඛනගත කිරීමට ගුවන් හමුදාපතිවරයා ගෙන තිබෙන තීරණය බලරහිත කරන ලෙසත් තමන්ගේ මූලික අයිතිවාසිකම් උල්ලංඝනය කිරීම වෙනුවෙන් ඔහුගෙන් රුපියල් මිලියන 5ක චන්දියක් අය කරදීමට නියෝගයක් ලබාදෙන ලෙසත් ඉල්ලමින් ගුවන් හමුදාවේ විශ්රාමික එයාර් වයිෂ් මාෂල් සම්පත් තුයියකොන්තා හමුවේ එම මුලික අයිතිවාසිකම් නඩුව ගොනුකර තිබුණා.
ගුවන් හමුදාපතිවරයාට අමතරව ගුවන් හමුදා පරිපාලන අධ්යක්ෂවරයා, රාජ්ය ආරක්ෂක අමාත්ය ප්රමිත බණ්ඩාර තෙන්නකෝන් භා නීතිපතිවරයා වගඋත්තරකරුවන් කරමින් මෙම පෙත්සම ගොනු කර තියෙනවා. ගුවන් හමුදා විශ්රාමික වරප්රසාද අභිමි කරමින් තමන්ව අසාදු ලේඛන ගත කර ඇති බවට ඉකුත් මාර්තු මාසයේදී මාධ්ය මඟින් තමන්ට දැනගන්නට ලැබුණු බවත් එහෙත් ඒ සම්බන්ධයෙන් ගුවන් හමුදාව මඟින් මෙතෙක් තමන්ට කිසිදු දැනුම්දීමක් සිදුකර නොමැති බවයි විශ්රාමික එයාර් වයිෂ් මාෂල් සම්පත් තුයියකොන්තා එම පැමිණිල්ල මඟින් පෙන්වාදී තියෙනවා.
ජාතික ජන බලවේගය දේශපාලන වේදිකාවෙහි තම මතය ප්රකාශ කිරීමේ ප්රතිඵලයක් ලෙස තමාව අසාදු ලේඛනගත කිරීමට සිදුවූ බවට රාජ්ය ආරක්ෂක අමාත්ය ප්රමිත බණ්ඩාර තෙන්නකෝන් පාර්ලිමේන්තුවේ දී පැවසූ බවද එම පැමිණිල්ලේ සඳහන් වෙනවා.
මෙරට පැවැති යුද්ධය නිමා කිරීමට ගුවන් නියමුවකු වශයෙන් වසර 30කට වැඩි කාලයක් තමා ඉතා විශාල මෙහෙයක් සිදු කළ බවත් ඒ වෙනුවෙන් පිරිනැමෙන වීරවික්රම, වීරවිභූෂණ, රණශූර ඇතුළු පදක්කම් රැසක් තමන් හිමි කරගෙන තිබෙන බවත් ඔහු පවසනවා.
ගුවන් හමුදා සක්රිය සේවයේ යෙදී සිටියදී හෝ ගුවන් හමුදාවෙන් විශ්රාම යෑමෙන් අනතුරුව තමන් කිසිදු නීති විරෝධී ක්රියාවකට සම්බන්ධ වී නොමැති බව විශ්රාමික එයාර් වයිෂ් මාෂල් සම්පත් තුයියකොන්තා කියනවා. එවැනි තත්ත්වයක් තුළ ගුවන් හමුදා විශ්රාමික වරප්රසාද අහිමි කරමින් තමන්ව අසාදු ලේඛනගත කිරීම දැඩි ගැටලු සහගත තත්ත්වයක් බවත් ඔහු ඉදිරිපත් කළ එම පැමිණිල්ලේ සඳහන් වෙනවා.
විශ්රාමික නිලධාරියකුට අදාළ සම්මත නීති පටිපාටින් අනුගමනය කිරීමකින් තොරව තමන්ව අසාදු ලේඛන ගත කිරීමට ගුවන් හමුදාපතිවරයාට හෝ ඔහුගේ නියෝජිත බලධාරීන්ට බලය හිමිවී නොමැති බවයි සම්පත් තුයියකොන්තා මහතා සිය පැමිණිල්ලෙන් පවසා ඇත්තේ.
කිසිදු විමසීමකින් තොරව තමන්ව අසාදු ලේඛන ගත කිරීම තමන්ගේ මූලික අයිතිවාසිකම් උල්ලංඝනය කිරීමක් බැවින් ගුවන් හමුදාපතිවරයා ගෙන තිබෙන එම තීරණය බලරහිත කරන ලෙසත් තමන්ගේ මූලික අයිතිවාසිකම් අහිමි කිරීම වෙනුවෙන් ගුවන් හමුදාපතිවරයාගෙන් රැපියල් මිලියන 5ක වන්දි මුදලක් අයකර දෙන ලෙසත් සම්පත් තුයියකොන්තා මහතා සිය පෙත්සම මඟින් ශ්රේෂ්ඨාධිකරණයෙන් ඉල්ලා තිබෙනවා.
නීතීඥ සුනිල් වටගල හා ජේ.එම්. විජය බණ්ඩාර යන නීතිඥවරු පෙත්සම්කාර සම්පත් තුයියාකොන්තා මහතා වෙනුවෙන් පෙනී සිට තිබෙනවා.
