පසුගියදා සම්මත කරගන්නා ලද ඔන්ලයින් සේෆ්ටි පනත, පනත සදහා ශ්රේෂඨාධිකරණය ලබා දුන් සංශෝධන නොතකා හැර සම්මත කරගෙන ඇතැයි, විපක්ෂය ඇතුළු පාර්ශ්ව රැසක් චෝදනා කර තිබුණි.Sri Lanka Latest News
නමුත් කතානාකවරයා ඊයේ දිනයේ දී නිවේදනයක් නිකුත් කරමින්, ඔන්ලයින් සේෆ්ටි පනත සම්මත කර ගන්නා ලද්දේ, ඒ සදහා ශ්රේෂ්ඨාධිකරණය විසින් ඉදිරිපත් කරන ලද සංශෝධන ඇතුළත් බව සහතික කිරීමෙන් පසුව බව පැවසී ය.
ඉන් නොනැවතී කතානායකරවරයා පැවසූවේ, ශ්රේෂ්ඨාධිකරණ නිර්දේශ නොතකා හැර ඇතැයි යමෙකු චෝදනා කරන්නේ නම්, එසේ නොතකා හැර ඇති නිර්දේශ මොනවා දැයි පැහැදිලිව පෙන්වන ලෙසයි.
විකල්ප ප්රතිපත්ති කේන්ද්රය, මුල සිටම ඔන්ලයින් සේෆ්ටි පනත සම්බන්ධයෙන් ඇහැ ගහගෙන සිටි සංවිධානයකි.
ඔවුන් විසින්, ඔන්ලයින් සේෆ්ටි පනත සම්මත කර ගැනීමේ දී ශ්රේෂ්ඨාධිකරණ නිර්දේශ නොතකා හැර ඇති අවස්ථා කිහිපයක් ගෙනහැර දක්වමින් විශේෂ නිවේදනයක් නිකුත් කර තිබේ.
අපි, එම නිවේදනයෙන් අවශ්යම කොටස් කිහිපයක් පමණක්, දළ වශයෙන් පරිවර්තනය කර මෙසේ ඉදිරිපත් කරන්නෙමු.
පනත් කෙටුම්පත සරළ බහුතරයකින් සම්මත කර ගැනීම සදහා, සංශෝධන 31 ක් අවශ්ය බව ශ්රේෂ්ඨාධිකරණය නියෝග කර තිබුණි.
නමුත් ශ්රේෂ්ඨාධිකරණය විසින් ලබා දී තිබෙන ඇතැම් නිර්දේශ රජය විසින් නොසලකා ඇති බව පෙනී යන්නේ යැයි, විකල්ප ප්රතිපත්ති කේන්ද්රය පවසයි.
උදාහරණයකට, විමර්ශනයට අදාල තොරතුරුවල රහස්ය භාවය, විමර්ශනයට සම්බන්ධ සියළු පාර්ශ්වයන් විසින් ආරක්ෂා කරන බවට, රජය විසින් සහතික කළ යුතු යැයි ශ්රේෂ්ඨාධිකරණ නිර්දේශයක් ඇති නමුත්, සම්මත කර ගන්නා ලද පනත තුළ එවැනි ආරක්ෂාවක් රජය විසින් සහතික කර නැති බව විකල්ප ප්රතිපත්ති කේන්ද්රය පවසයි.
එමෙන්ම, “ද්වේශසහගත” malicious සහ “අසංයම” wantonly වැනි පාරිභාෂිතයන් පාවිච්චි කිරීම තුළ යම් දුරවබෝධ තත්ත්වයක් නිර්මාණය වන බව නිගමනය කර තිබෙන ශ්රේෂ්ඨාධිකරණ, එම වචන ඉවත් කරන ලෙස නියෝග කර තිබේ. නමුත්, එවැනි පාරිභාෂිත වචන පනතින් ඉවත් කර නැති අතර, ඒවා දිගටම භාවිතා කරයි.
ඊට අමතරව, ඊමේල්, එස්.එම්.එස් සහ එම්.එම්.එස් වැනි සේවාවන් ඔන්ලයින් සේෆ්ටි පනතින් ඉවත් කළ යුතු බවට ශ්රේෂ්ඨාධිකරණය නිර්දේශ කර ඇතත්, සම්මත කරගත් පනත තුළ එකී ශ්රේෂ්ඨාධිකරණ නිර්දේශය නොතකා හැර ඇතැයි විකල්ප ප්රතිපත්ති කේන්ද්රය පවසයි.
මේ සියළු කරුණු සැලකිල්ලට ගනිමින්, වහාම ඔන්ලයින් සේෆ්ටි පනත අවලංගු කිරීමට පියවර ගන්නා ලෙස විකල්ප ප්රතිපත්ති කේන්ද්රය ඉල්ලා සිටියි.
