මෙරට නීතිඥවරුන්ගේ සහ මහජනතාවගේ ආරක්ෂාවට එල්ල වී ඇති බරපතල තර්ජන සම්බන්ධයෙන් විපක්ෂයේ පක්ෂ රැසක නායකයන් එක්ව ජාත්යන්තර වෘත්තීය සංවිධානවල මැදිහත්වීම පතමින් ඒකාබද්ධ නිවේදනයක් නිකුත් කර තිබෙනවා.Sri Lanka Latest News
සජිත් ප්රේමදාස, පාඨලී චම්පික රණවක, නාමල් රාජපක්ෂ, රනිල් වික්රමසිංහ, ජීවන් තොන්ඩමන්, මනෝ ගනේෂන් ඇතුළු විපක්ෂයේ පක්ෂ නායකයින්ගේ අත්සනින් යුතුවයි මෙම නිවේදනය නිකුත් කර ඇත්තේ.
පසුගිය වසරේ පුද්ගල මරණ 60කට අධික සංඛ්යාවක් සහ මෙම වසරේ මේ දක්වා මරණ 9ක් වාර්තා වෙමින් නවීන ගිනිඅවි භාවිත කර සිදු කරන ඝාතන රටාවක් නිර්මාණය වී ඇති බවයි එම නිවේදනයේ ඔවුන් සඳහන් කර තිබෙන්නේ.
එසේම 2026 පෙබරවාරි 13 වන දින අධි ආරක්ෂිත කලාපයක් අසලදී නීතිඥ බුද්ධික මල්ලවආරච්චි සහ ඔහුගේ බිරිඳ ඝාතනය කිරීම මෙරට නීති ක්ෂේත්රය දැඩි කම්පනයකට පත් කර ඇති බව එහි සඳහන්.
මෙම ඝාතනයට විරෝධය පළ කරමින් ශ්රී ලංකා නීතිඥ සංගමය වසර 14කට පසු ගනු ලැබූ අසාමාන්ය තීරණයකට අනුව පෙබරවාරි 16 වැනිදා දිවයින පුරා නීතිඥවරුන් වෘත්තීය කටයුතුවලින් බැහැරව සිටි බවත්, මේ හේතුවෙන් එදින ශ්රේෂ්ඨාධිකරණයේ සිට මහේස්ත්රාත් අධිකරණ දක්වා සියලු අධිකරණ වසා තැබීමට සිදු වූ බවත්, එම නිවේදනයේ සඳහන් කර තිබෙනවා.
එසේම එම නිවේදනයේ වැඩිදුරටත් සඳහන් වෙන්නේ, පරීක්ෂණයක් පැවැත්වීමටත් පෙර මියගිය නීතිඥවරයා මත්ද්රව්ය ජාවාරම්කරුවන් වෙනුවෙන් පෙනී සිටි අයෙකු බවට පොලිසිය සිදු කළ ප්රකාශයන් වගකීම් විරහිත බවත්, එය සිද්ධියේ බරපතලකම යටපත් කිරීමේ උත්සාහයක් බවත්.
එමෙන්ම පොලිස් බලකාය දැඩි ලෙස දේශපාලනීකරණය වී ඇති බවටයි මෙහි චෝදනා එල්ල වී ඇත්තේ.
යෝජිත ත්රස්ත විරෝධී පනත මගින් මහජන අතෘප්තිය මර්දනය කිරීමට උත්සාහ කරන බවත්, එමගින් ප්රජාතන්ත්රවාදී වටිනාකම් සහ මාධ්ය නිදහස දැඩි අවදානමකට ලක්ව ඇති බවත්, එම නිවේදනයේ සඳහන්.
මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල රටේ නීතිය සහ සාමය පවත්වා ගැනීමටත්, පුරවැසියන්ගේ ආරක්ෂාව තහවුරු කිරීමටත් අසමත් වී ඇති බවයි එම නිවේදනයේ වැඩිදුරටත් සඳහන් වෙන්නේ.
මහජන අතෘප්තිය මර්දනය කිරීම සඳහා යෝජිත මර්දනකාරී ත්රස්ත විරෝධී පනතක් භාවිත කිරීමට උත්සාහ කෙරෙන බවත්, එහි වත්මන් ස්වරූපය රටේ ප්රජාතන්ත්රවාදී වටිනාකම්වලට පහර දෙන අතර සිවිල් හා දේශපාලන අයිතිවාසිකම් පිළිබඳ ජාත්යන්තර සම්මුතිය (ICCPR) ඇතුළු ජාත්යන්තර එකඟතාවලට ශ්රී ලංකාව බැඳී ඇති මූලික වගකීම් ද උල්ලංඝනය කරන බවයි එහි සඳහන් කර ඇත්තේ.
ඒ අනුව, මෙහි සෘජු ඉලක්කය වී ඇත්තේ මාධ්ය ආයතන, එහි හිමිකරුවන්, කර්තෘවරුන්, විධායකයන් සහ සෑම තරාතිරමකම මාධ්ය වෘත්තිකයින් බව ද එහි සඳහන්.
එසේම මෙම බරපතල තත්ත්වය හමුවේ මෙරට වෘත්තිකයන්ගේ ආරක්ෂාව වෙනුවෙන් මැදිහත් වන ලෙසයි ඔවුහු ජාත්යන්තර වෘත්තීය සංවිධානවලින් ඉල්ලා සිටින්නේ.
ඒ අනුව, ජාත්යන්තර නීතිඥ සංගමය, පොදු රාජ්ය මණ්ඩලීය නීතිඥ සංගමය, ජාත්යන්තර නීතිවේදීන්ගේ කොමිසම, තරුණ නීතිඥයින්ගේ ජාත්යන්තර සංගමය, ජාත්යන්තර ප්රජාතන්ත්රවාදී නීතිඥ සංගමය, ඇම්නෙස්ටි ජාත්යන්තරය, හියුමන් රයිට්ස් වොච්, මානව හිමිකම් සඳහා වූ ජාත්යන්තර සම්මේලනය, වධහිංසාවට එරෙහි ලෝක සංවිධානය, පෙරටුගාමී ආරක්ෂකයින්, මානව හිමිකම් සඳහා මහ කොමසාරිස් කාර්යාලය, මානව හිමිකම් ආරක්ෂා කරන්නන් පිළිබඳ එක්සත් ජාතීන්ගේ විශේෂ වාර්තාකරු වෙත ද ඔවුන් මෙම මැදිහත්වීම පිළිබඳ ඉල්ලීම සහිත නිවේදනය යොමුකර තිබෙනවා.
