.
ශ්රී ලංකාවේ දේශපාලනය ඉතාම ඉහළ වේගයකින් යූ ටර්න් එකක් ගහපු කාලයක් තමයි මේ පහු කරන්නේ. සාමකාමී ඡන්දයක් තියලා ඒ ඡන්දෙන් සාමකාමී ජනාධිපතිවරයෙක් ලංකාවට පත්වුණා. එතුමා පත්වෙලා ටික කාලෙකින් ඉතාම හොඳ පාර්ලිමේන්තු මැතිවරණයක් තිබිලා, කිසිවෙක්ට චෝදනා කරන්න බැරි විදියට ප්රතිඵලයක් නිකුත් වුණා. ඉන් තුනෙන් දෙකකටත් වැඩි බලයක් මාලිමාව කණ්ඩායමට ලැබුණා. දැන් මාලිමාව ආණ්ඩුවක් තියෙනවා. මාලිමාවට තුනෙන් දෙකක් තියෙනවා. මාලිමාවේ පාර්ලිමේන්තුවක් තියෙනවා. මාලිමාවේ ජනාධිපතිවරයෙක් ඉන්නවා. අනුර කුමාර දිසානායක ජනාධිපතිවරයා ආධුනික ජනාධිපතිවරයෙක් විදියට, පළමු වරට ජනාධිපති ලෙස පත්වෙච්ච කෙනෙක් විදියට ඉතාම ආධුනික දේශපාලකයන් රොත්තක් එක්ක මේ වැඩේ හරියට කරගෙන යනවා. සාමාන්යයෙන් රටක් කරගෙන යනකොට ඇතිවිය හැකි ස්වභාවික ප්රශ්න ගැටලුවලට මුහුණ දෙමින් ඔවුන් මේ වැඩේ කරගෙන යනවා. ඉතින් මේ රට දැන් යම් ආකාරයකට නිවැරැදි දිශාවකට ගමන් කරන ගතියක් ඒක දිහා බලාගෙන ඉන්න අපිට දැනෙනවා. රටට එහෙම තමයි වෙන්න ඕනේ. Sri Lanka Latest News
අනුර කුමාර දිසානායක මහත්තයා මේ වැඩේ විචිත්රවත්ව කරගෙන යනකොට ඔහු යාපනේ පවා ගිහිල්ලා මිනිස්සු අතරේ ආදරේ දිනාගන්නකොට, මිනිස්සුන්ව වැලඳගන්නකොට මේ වෙලාවේ කඹුරුපිටිය, ගම්පහ, පානදුර වගේ විවිධ ප්රදේශවල එක එක ජාතියේ සිද්ධි වාර්තා වෙමින් යනවා. ඒ අය එළියට බැහැපු ගමන් කියන වචන ටිකක් සහ සටන් පාඨ ටිකක් තියෙනවා. අපි දැක්කා කඹුරුපිටියේ මහජනතාව විසින් සූදානම් කරපු උද්ඝෝෂණයක් කියලා එකක් තියෙනවා. ඒක මහජනතාව විසින් කරපු එකක්ද, වෙන කවුරු හරි කෙනෙක් මේක ඇතුළේ රඟපානවද, මේක ඇතුළේ චරිතයක් නිරූපණය කරනවද කියන එක අපි දන්නේ නෑ. කොහොම හරි එහෙම එකක් වුණා. මෙන්න මේ උද්ඝෝෂණ අවස්ථාවට එන පුද්ගලයෙක් ‘මරනවා, කපනවා, කොටනවා, 88-89 තිබ්බ එක ආයෙ පෙන්නනවා, උඹලා දන්නේ නෑ අපි කවුද කියලා’ කියමින් හෝ ඊට ආසන්න වචන වගයක් කියමින් පොඩි ප්රශ්නයක් ඇතිකර ගත්ත බව එතැන හිටපු අය ඔහුත් සමග ගැටෙමින් කෑගහමින් රණ්ඩු කරමින් කියනවා. ඔවුන් අතර විශාල ප්රශ්නයක් ඇතිවෙනවා. ගැටුමක් ඇතිවෙනවා. ගහගන්න යනවා. මේ අතර, ගම්පහත් මේ වගේම සිද්ධියක් වාර්තා වෙනවා. ගම්පහත් එක්තරා විරෝධතාවකට එක පිරිසක් කඩාපැනලා ඔවුන් එරෙහි වෙලා කරන්න දෙන්නේ නෑ කියලා, අපේ බලය අපේ ආණ්ඩුව කියලා ඔවුන් පොඩි ප්රශ්නයක් ඇති කරගන්නවා.
තවත් සිද්ධියක් අපි දැක්කා සමුපකාර ඡන්දයක් ජයග්රහණය කළාට පස්සේ රතිඤ්ඤා පත්තු කළාම ඊට විරුද්ධව විශාල ප්රශ්නයක් ඇතිවෙනවා. මේ ප්රශ්න රටට අවශ්ය නැහැ. 88-89 භීෂණය, ඒ කාලේ කරපුවා පෙන්නනවා, ටයර් සෑයවල් මතකද වගේ වචන තවදුරටත් දේශපාලනික නෑ. මොකද මේ දේශපාලනය කවුරුවත් ඒවා කරපු අය නෙවෙයි. මේ අය නව දේශපාලන ප්රවාහයක අලුත් දේශපාලන සංස්කෘතියක් ඇතුළේ ඉන්න ඉන්ටර්නෙට් තියෙන, තාක්ෂණය තියෙන, මොබයිල් ෆෝන් පාවිච්චි කරන ස්මාර්ට් මිනිස්සු. එතකොට මේ ස්මාර්ට් මිනිස්සුන්ට පත්තරයක් විතරක් තිබිච්ච කාලේ, රේඩියෝ එකක් කඩමණ්ඩියට ගිහිල්ලා ආපු කාලේ, ටීවී එකක් ඇහැට නොදැකපු කාලේ තිබිච්ච දේශපාලනය හෝ දේශපාලන හැඩය ගැන අවබෝධයකුත් නෑ. අවබෝධයක් අවශ්යත් නෑ. ඒ නිසා මේ සාමකාමීව යන රට සාමකාමීව තියෙන්න දෙන්න. ඔබ මාලිමාවේ සාමාජිකයෙක් නම්, ඔබ ජනතා විමුක්ති පෙරමුණේ නම්, ඔබ දේශපාලනික වශයෙන් මේ කණ්ඩායමට උදව් කරපු, මේ බලය ගත්තම සතුටු වෙච්ච, මේ බල පෙරළිය වෙනුවෙන් දරදිය ඇදපු මිනිහෙක් නම්, ඉහළ දේශපාලකයෝ අරගෙන යන විචිත්රවත් දේශපාලන සංස්කෘතියට උදව් කරන්න. මේ ආදරණීය බව රැකගන්න උදව් කරන්න. මේ ප්රේමයේ සංස්කෘතිය ඒ විදියටම තියෙන්න ඉඩහරින්න.
අපි දන්නවා අනුර කුමාර දිසානායකවත්, හරිනි නෝනාවත්, විජිත හේරත් මහත්තයවත්, වෙන කවුරුවත් දන්නේ නෑ මේ තක්කඩි හැසිරීම් ගැන. ඒ අය එක එක්කෙනාට කියලා එළියට දාපු අය නෙවෙයි මේ. හැබැයි එහෙම නැති වුණත් මේ කුමන හෝ කාරණාවකදී බැණුම් අහන්නේ සහ ප්රශ්නවලට මුහුණ දෙන්නේ, නරකයි කියලා කියන්නේ, අනුර කුමාර මහතා ඇතුළු සමස්ත දේශපාලන කණ්ඩායම. ඇත්තටම එක්කෙනෙක්ගේ දෙන්නෙක්ගේ මෝඩ හැසිරීම නිසා විනාශයට පත්වෙන්න දෙන්න බෑ. අපි දන්නවා ලංකාවේ පහුගිය කාලේ දේශපාලනයේ හිටියේ කීප දෙනයි. ඒ කීප දෙනා කරපු නාඩගම් නිසා, නරක වැඩ නිසා ඒ අයට බලය අහිමි වුණා, ඒ අයට ගේ දොර අහිමි වුණා. සමහර විට ඒ මිනිස්සුන්ට ඒ මිනිස්සුන්වත් අහිමි වුණා. ජීවත් වුණත් සමහර අය මියගිහිල්ලා වගේ. මිනිස්සු ෆොටෝ එකක් දැම්මාම දාන්නේ නිවන් සුව කියලා. ඒක වෙන්නේ මේ රටේ මිනිස්සුන්ට විරුද්ධව දේශපාලනය කරන්න ගියාම. ඒ නිසා ඡන්දේ දුන්නද, නැද්ද, විපක්ෂෙද, අර පක්ෂෙද, මේ පක්ෂෙද, ශ්රී ලංකාද, යූ.ඇන්.පී,ද, සුදුද, කළුද, යාපනේද, කොළඹද, නගරෙද, ගමේද මේ කිසි දෙයක් වැඩක් නෑ. රටකට අවශ්ය වෙන්නේ යහපත් දේශපාලන ප්රවාහයක්. ඒ යහපත් දේශපාලන ප්රවාහය හැදෙන්න දීලා පුළුවන් තරම් පැත්තකට වෙලා හිටියා නම් තමයි වඩා හොඳ. මොකද එහෙම නැති වුණොත් වෙන්නේ මේ යහපත් දේශපාලන ප්රවාහයට හානි කරන්න ආපු තක්කඩි කවුද කියලා දන්නෙත් නෑ, හැබැයි ඒ ආපු එවුන්ගේ පරිප්පු කන්න වෙන්නේ මේ මාලිමා ආණ්ඩුවට.
ජීවන පහන් තිළිණ
