යාපනය යුද හමුදා කඳවුරු සීමාවන්ට අයත්ව තිබු යාපනය, කන්කසන්තුරය, මාන්කොල්ලෙයි වෛරව කෝවිල් ඉඩම හා තවත් ඉඩම් කිහිපයක් සිවිල් වැසියන් වෙත මුදාහැරීම ඊයේ (10) සිදුකෙරුණා. (Sri Lanka Latest News)
යාපනය ජේ 233 ග්රාම සේවා වසමට අයත් සිවිල් වැසියන්ගේ ඉඩම් කොටසක් හා කෝවිල් ඉඩමක් මෙලෙස මුදාහැරීමට පියවර ගෙන තිබෙනවා.
යාපනය, පලාලි යුද හමුදා කඳවුරු සීමාව වෙත අදාළ ඉඩම් ලබාගැනීම 1990 වසරේ සිදුකරගත් බවයි යාපනය ප්රදේශවාසීන් පවසන්නේ.
උතුරු නැගෙනහිර ආරක්ෂක අංශ සතුව පවතින උතුරේ වැසියන්ගේ පාරම්පරික ඉඩම් යළි ජනතාවට ලබාදීමේ කටයුතු විධිමත් කිරීම සඳහා ස්ථිර කාර්යාලයක් ද පිහිටුවා ඇති බවයි ආරක්ෂක අංශ පවසන්නේ.
ජාතික ආරක්ෂාව පිළිබඳ ජනාධිපති උපදේශක ජනාධිපති කාර්ය මණ්ඩල ප්රධානී සාගල රත්නායක මහතාගේ උපදෙස් පරිදි අදාළ කාර්යාලය පිහිටුවා ඇති අතර, යුද හමුදා බ්රිගේඩියර්වරයකුගේ ප්රධානත්වයෙන් එහි කටයුතු සිදු කෙරෙනවා.
අදාළ කාර්යාලය මගින් මාස හයක කාලසීමාවක් කුළ උතුරු නැගෙනහිර ඉඩම් ගැටලු විසඳීමට නියමිත අතර, ජාතික ආරක්ෂාවට තර්ජනයක් නොවන ලෙසට උතුරු නැගෙනහිර වැසියන්ගේ පාරම්පරික ඉඩම් බෙදාදෙන ලෙසට ද සාගල රත්නායක මහතා ආරක්ෂක අංශ වෙත උපදෙස් ලබාදී තිබෙනවා.
උතුරු නැගෙනහිර ජනතාවගේ ඉඩම් අක්කර 3000කට ආසන්න ප්රමාණයක් තවමත් ආරක්ෂක අංශ කඳවුරු වෙත පවරාගෙන ඇති බවයි උතුරු නැගෙනහිර අවතැන්වූවන් පෙන්වා දෙන්නේ.
පාරම්පරික ඉඩම් ජනතාවට මුදාහැරීමේදී ජාතික ආරක්ෂාවට මෙන්ම ජනතාවට කිසිදු ගැටළුවක් නොවන අයුරින් විධිමත් ක්රමවේදයක් සකස් කිරීමේ අරමුණින් අදාළ කාර්යාලය ස්ථාපිත කර තිබෙනවා.
යාපනය පලාලි යුද හමුදා කඳවුරු සීමාව තුළ සිවිල් වැසියන්ගේ පාරම්පරික ඉඩම් රැසක් පවතින බවයි උතුරු පළාත් අවතැන්වූවන්ගේ සංවිධාන සඳහන් කළේ.
dasathalankanews
