අමෙරිකානු පරිත්යාගයක් ලෙස ශ්රී ලංකාවට හිමිවූ TH-57 Sea Ranger වර්ගයේ හෙලිකොප්ටර් යානා 10 මේ වනවිට ශ්රී ලංකාව වෙත පිටත්කර එවා තිබේ.Sri Lanka Latest News
අමෙරිකාවේ ශ්රී ලංකා තානාපති මහින්ද සමරසිංහ මහතා සිය නිල ෆේස්බුක් පිටුවේ සටහනක් තබමින් මේ බව තහවුරු කර ඇත.
අමෙරිකාව විසින් පරිත්යාග කරන ලද මෙම හෙලිකොප්ටර් යානා 10 මාර්තු 15 වන දා අමෙරිකාවේ ඇලබාමා හි Port Mobile සිට මෙරට බලා පිටත්ව තිබේ.
එය මේ වසරේ මැයි 24 වන දින මෙරටට ළඟා වෙනු ඇතැයි අපේක්ෂා කෙරේ.
Bell 206B-3 Jet Ranger යානා මිලිටරි ප්රභේදයක් වන මෙම මෙහෙයුම් ගුවන් යානා, ශ්රී ලංකා ගුවන් හමුදාවට ලබාදීමට නියමිතය.
Bell 206 මාදිලි සමඟ ශ්රී ලංකා ගුවන් හමුදාවට මෙම හෙලිකොප්ටර් යානා එක් කරගැනීමෙන් උසස් නියමු පුහුණුව, ආපදා ප්රතිචාර දැක්වීම සහ සෙවීම සහ ගලවා ගැනීම ඇතුළු තීරණාත්මක පොදු කාර්ය මෙහෙයුම් ධාරිතාවය ඉහළ නැංවීමට අපේක්ෂා කෙරේ.
මෙම යානා සැලකිය යුතු ලෙස වැඩි දියුණු කර ඇති බවත් මෙම පරිත්යාගය එක්සත් ජනපදය සහ ශ්රී ලංකාව අතර පවතින දිගුකාලීන හවුල්කාරිත්වය මෙන්ම කලාපීය ආරක්ෂාව සහ මානුෂීය ආධාර සඳහා වන කැපවීම ශක්තිමත් කරන බවද මහින්ද සමරසිංහ මහතා සිය නිවේදනයේ සඳහන් කර ඇත.
මෙම හෙලිකොප්ටර් යානා නිරීක්ෂණය කිරීම සඳහා ශ්රී ලංකා ගුවන් හමුදාවේ දූත පිරිසක් ජනවාරි මාසයේ දී අමෙරිකාවේ සංචාරයක නිරත වී තිබේ.
මෙම වටිනා පරිත්යාගය සම්බන්ධයෙන් ශ්රී ලංකාව අමෙරිකාවට සිය හෘදයාංගම කෘතඥතාවය පල කරන බවද මහින්ද සමරසිංහ මහතා වැඩිදුරටත් සඳහන් කර ඇත.
පසුගිය සතියේ රාජ්ය රහස් කළ හෙළිදරව්ව!
ගෝර් මැයි එනවා
කෙසේ වෙතත් මීට මාස කීපයකට ඉහත සිටම අප මෙම තීරයෙන් වාර්තා කර සිටි විශේෂ තොරතුරක් වූයේ ජනාධිපතිවරයා සහ ඇමෙරිකාව අතර ඉතා විශේෂ සබඳතාවක් ගොඩනැගෙමින් පවතිනවා යැයි කියාය. විශේෂයෙන්ම ජනාධිපතිවරයා එක්සත් ජාතීන්ගේ සමුළුවට සහභාගි වීම සඳහා පසුගිය සැප්තැම්බර් මාසයේදී ඇමෙරිකාවට ගිය අවස්ථාවේදී එරට ජනාධිපති ඩොනල්ඩ් ට්රම්ප් මහතාගේ දකුණු හා මධ්යම ආසියානු කලාපය භාර විශේෂ නියෝජිතයා මෙන්ම ඉන්දියාවේ ඇමෙරිකානු තානාපතිවරයා ලෙස කටයුතු කරන සර්ජියෝ ගෝර් සමග විශේෂ සාකච්ඡාවක් පැවැත්වූ ආකාරයත්, ඉන් පසු අවස්ථාවකදීද ජනාධිපතිවරයා සහ ගෝර් අතර දුරකතන සාකච්ඡා සිදුව තිබූ ආකාරයත් අපි මෙම තීරයෙන් වාර්තා කළෙමු. එමෙන්ම ජනාධිපතිවරයා නවදිල්ලියේ පැවැති කෘත්රිම බුද්ධිය සමුළුව අතරතුරදීද මේ කියන සර්ජියෝ ගෝර් හමුවී සාකච්ඡා පැවැත්වූ බවත්, එහිදී ගෝර් ලංකාවේ සංචාරය කිරීමට සූදානමින් සිටින බව ජනාධිපතිවරයාට දැනුම් දුන් බවත් අප මෙම තීරයෙන් වාර්තා කර සිටියෙමු. ඒ අනුව මේ වනවිට අපට ඇති තොරතුරුවලින් කියැවෙන්නේ ගෝර් ලබන මැයි මාසයේදී ලංකාවට පැමිණීමට තීන්දු කොට ඇතැයි කියාය. ඒ නිකන්ම නොව දැවැන්ත ඇමෙරිකානු නෞකාවක් සහ හෙලිකොප්ටර් යානා 10ක් ලංකාවට පරිත්යාග කිරීමේ අරමුණෙන් යුතුවය. මෙම නෞකා සහ හෙලිකොප්ටර් ලංකාවට ලබාදීමට යෝජනා වී තිබුණේ ඇමෙරිකාව සහ ලංකාව අතර ඇතිකොට ගෙන තිබූ ආරක්ෂක එකඟතාවකට අනුවය. ඒ අනුව මුල් අදියරේදී ඇමෙරිකාව වෙරළාරක්ෂක යාත්රා 4ක් ලංකාවට ලබාදීම සඳහා ඉකුත් ජනවාරි මාසයේ ඇමෙරිකාව සමග ගිවිසුමකට එළඹිණි. ඉන් නෞකා 3ක් මේ වනවිට ලංකාවට ලබාදීමට ඇමෙරිකාව පියවර ගෙන තිබිණි. ඒ අනුව සර්ජියෝ ගෝර් මැයි මාසයේ ලංකාවට පැමිණෙන්නේ මෙම ඉතිරි නෞකාව සහ හෙලිකොප්ටර් යානා 10 ලංකාවට ලබාදීමටය. එම නෞකාව සහ හෙලිකොප්ටර් භාරගැනීම වෙනුවෙන් ත්රිකුණාමල වරායේ දැවැන්ත උත්සවයක් සංවිධාන කිරීමටද ආණ්ඩුව සැලසුම් කර ඇති බවක් ආරංචිය. ඒ අනුව ඉදිරියේදී මෙම යාත්රාව සහ හෙලිකොප්ටර් සියල්ල ජාත්යන්තර මුහුදේ සිදුකරන මත්ද්රව්ය වැටලීම්, මිනිස් ජාවාරම මැඬලීම සහ සුපරීක්ෂණ කටයුතු වෙනුවෙන් යොදාගැනීමට නියමිතය.
ඒ අනුව දැනටමත් මෙම නෞකාව සහ හෙලිකොප්ටර් යානා 10 රැගත් විශේෂ නෞකාව ලංකාවට ඒමට ඇමෙරිකාවෙන් පිටත්ව ඇති අතර, ගුවන් හමුදාවට භාරදීමට නියමිත එම හෙලිකොප්ටර් යානා 10න් කොටසක් අනුරාධපුර ගුවන් හමුදා කඳවුරටත්, ත්රිකුණාමල චයිනා බේහි පිහිටි ගුවන් හමුදා කඳවුරටත් ලබාදීමට නියමිතය. ගෝර් ලංකාවට පැමිණෙන්නේ අතිඋත්කර්ෂවත් අන්දමින් පැවැත්වීමට නියමිත මෙම උත්සවයට සහභාගි වීම සඳහාය.
