ලංකාවේ දේශපාලන ඉතිහාසයේ ජේ.ආර්. සහ බණ්ඩාරනායක මැතිනිය අතර තිබුණු දේශපාලන වෛරය තරම් වෛරයක් වෙනත් කිසිදු ප්රතිවිරුද්ධ නායකයන් දෙදෙනෙක් අතර තිබිලා නැත. 1970-1977 සමගි පෙරමුණු ආණ්ඩු කාලයේ එවක අගමැතිනි බණ්ඩාරනායක මැතිනිය 1971 කැරැල්ල වෙලාවේ ජේ.ආර්.ගේ එකම පුත් රවී ජයවර්ධන කිසිදු චෝදනාවකින් තොරව අත්අඩංගුවට ගනු ලැබුවාය. ඒ වගේම ජේ.ආර්. සහ බිරිය ඔස්ටේ්රලියාවේ සංචාරයකට යෑමට ගුවන් යානයේ සිටියදී විදේශ විනිමය චෝදනාවක් නගා ජේ.ආර්.ව අත්අඩංගුවට ගන්න උත්සාහ කරනු ලැබුවාය.
විපක්ෂ නායක ලෙස තමාට බණ්ඩාරනායක මැතිනිය දුන් වදය ජේ.ආර්. අමතක කළේ නැත. ඔහු ජනාධිපති වූ පසු ඉඩම් චෝදනාවක් නගා ජේ.ආර්. ඇයගේ ප්රජා අයිතිය අහෝසි කරනු ලැබීය.Sri Lanka Latest News
මේ දෙදෙනාම ප්රභූ දේශපාලන පන්තියේ නායකයන්ය. මැතිනිය වලව්කාරියකි. ජේ.ආර්. කොළඹ කුරුඳුවත්තේ ප්රභූ පවුලක නායකයෙකි. මේ දෙදෙනාගේ වෛරය සමහන් වූයේ 1988 නිර්ප්රභූ පවුලක නායකයකු වූ රණසිංහ ප්රේමදාස පරදින්න නියමිත ජනාධිපතිවරණය දිනන ලකුණු පෙනෙන්න පටන්ගත් විටදීය.
1988 ජනාධිපතිවරණය කට ළඟ තිබියදී ජේ.ආර්. සහ අනුර හමුවී භාරකාර රජයක් පිහිටුවන්න සාකච්ඡා ආරම්භ කළහ. මේ සාකච්ඡාවලට ශ්රීලනිපය එකඟ වූයේ මැතිනියගේ රැස්වීම්වලට ජවිපෙ තර්ජනය එල්ල වීමෙන් පසුවය. ජවිපෙ භීෂණය නිසා මැතිනියගේ ඡන්ද පදනමට වන හානිය ප්රේමදාසගේ යූ.ඇන්.පී. ඡන්ද පදනමට වන හානියට වඩා දරුණු බව ශ්රීලනිපයට තේරුම් ගියේ පසුවය. ප්රේමදාසට රැස්වීමක්වත් තියාගත නොහැකි ලෙස ජවිපෙ භීෂණය ව්යාප්ත කළත් යූ.ඇන්.පී.යේ ඡන්ද පදනම වූ වතුකරයේ සහ නැගෙනහිර මුස්ලිම් ඡන්ද පදනම තුළ භීෂණය ව්යාප්ත කරන්න ජවිපෙ අසමත් විය. ආණ්ඩුව සහ විපක්ෂය එක්වී භාරකාර රජයක් පිහිටුවා ජනාධිපතිවරණය පවත්වන්න සුදුසු වාතාවරණයක් හැදීම ජේ.ආර්.ගේත් අනුරගේත් සාකච්ඡාවල අරමුණ විය.
ඒත් ඇත්ත අරමුණ නම් ප්රේමදාස ජනාධිපති වීම වළක්වා ගැනීමය. මේ සාකච්ඡා ගැන ඉව වැටී ප්රේමදාසට යකා නැග්ගේය. ඔහු බොරැල්ලේ රැස්වීම අවසන් කොට ජේ.ආර්.ගේ වෝඞ් ප්ලේස්හි නිවෙසට ගොස් ජනාධිපති අපේක්ෂකත්වයෙන් තමන් ඉවත් වන බවට තර්ජනය කළේය. ඒ වෙලාවේ පක්ෂය හිටියේ ප්රේමදාස එක්කය. ජේ.ආර්. බය විය. සාකච්ඡා අතරමග නතර විය.
ඒ වෙලාවේ ජේ.ආර්.ගේත් මැතිනිය-අනුර ඇතුළු බණ්ඩාරනායකවරුන්ගේත් ඉලක්ක දෙකක් තිබිණි. පළමු ඉලක්කය ප්රේමදාස ජනාධිපති වීම වළක්වා ගැනීමය. දෙවැනි ඉලක්කය ජවිපෙ මර්දනය කරන්න සර්වපාක්ෂික එකඟතාවක් ඇතිකර ගැනීමය.
ප්රේමදාස වගේම විජේවීරත් නිර්ප්රභූ නායකයෙකි. ප්රේමදාස ජයග්රහණය කිරීම හෝ විජේවීර රට අල්ලා ගැනීම ලංකාවේ ප්රභූ දේශපාලන පන්තිය ඉවසුවේ නැත.
ඒ, 1988දීය. හරියටම එයට වසර 36කට පසු ජනාධිපතිවරණයක් අබියස නිර්ප්රභූ දේශපාලන නායකයන් දෙදෙනෙක් ජනාධිපති සටනට එක්වී ඇත. එක් අයෙක් රණසිංහ ප්රේමදාසගේ පුතා සජිත් ප්රේමදාසය. අනෙකා තඹුත්තේගම ගමේ ඉස්කෝලෙන් ආ ජවිපෙ නායක අනුර කුමාර දිසානායකය. මේ දෙදෙනාගෙන් කවුරුන් හෝ ජනාධිපති වීම ප්රභූ පන්තිය ඉවසන්නේ නැත.
ජනාධිපතිවරණය කට ළඟ තිබියදී විධායක ජනාධිපති ක්රමය අහෝසි කරන යෝජනාවක් ගෙන එන්නේ ජනාධිපති පුටුව නිර්ප්රභූ සජිත්ට හෝ අනුරට යෑම වළක්වන්නටය.
මේ ප්රභූ මානසිකත්වය අරුමපුදුම මානසිකත්වයකි. 1988 ජනාධිපතිවරණයේ ප්රතිඵල නිකුත් වෙද්දී මැතිවරණ කොමසාරිස් කාර්යාලයට ආ බණ්ඩාරනායක මැතිනිය ප්රතිඵල අත්හිටුවන ලෙස ප්රකාශ කොට කොමසාරිස් කාර්යාලයේ පුටුවකට පයින් ගසා යන්න ගියාය. ජේ.ආර්. සිය චරිතාපදානයේ සඳහන් කරන්නේ මැතිනියට ප්රේමදාස අතින් පරාජයට පත්වීම විඳදරාගත නොහැකි වූ බවය.
ප්රේමදාස දිනා ජවිපෙට ඇමැතිකම් තුනක් දී සභාග ආණ්ඩුවක් පිහිටුවන්න කතා කරද්දී ප්රභූ පන්තිය යළි ක්රියාත්මක විය. ප්රේමදාසගේ ආණ්ඩුවේ ප්රබලතම ඇමැතිවරුන් දෙදෙනා වූ ජේ.ආර්. පත් කළ පක්ෂ ලේකම් රාජ්ය ආරක්ෂක ඇමැති රන්ජන් විජේරත්න සහ ජේ.ආර්.ගේ බෑණා වූ සභානායක රනිල් වික්රමසිංහ එක්වී ජවිපෙ මර්දනය කරන තැනට ප්රේමදාසව තල්ලු කරද්දී බණ්ඩාරනායක මැතිනිය ප්රේමදාසගේ සර්වපාක්ෂික සමුළුවට පැමිණ ජවිපෙ මර්දනය සාධාරණීකරණය කරනු ලැබීය.
1983න් පසු ලංකාවේ දේශපාලනයේ නිර්ප්රභූ නායකයන් තුන්දෙනෙක් මතුවිය. ඒ, රණසිංහ ප්රේමදාස, රෝහණ විජේවීර සහ විජය කුමාරතුංගය. ප්රභූ පන්තියට මේ නිර්ප්රභූ නායකයන් තිදෙනා මහත් හිසරදයක් විය. ඔවුහු උපක්රමශීලීව දාම් ඉත්තන් ඇද්දාහ. නිර්ප්රභූ නායකයෝ තිදෙනා එකිනෙකා මරාගන්න සටන ආරම්භ කළහ.
ජේ.ආර්. විජයව අත්අඩංගුවට ගත්තේය. විජේවීරගේ පක්ෂය තහනම් කොට විජේවීරව කැලයට හිර කළේය. මැතිනිය සහ අනුර වැඩියෙන්ම ගැහුවේ ප්රේමදාසට සහ පවුලටය. මැතිනිය සහ අනුර විජයව පක්ෂයෙන් එළියට දමනු ලැබීය. 1971දී මැතිනිය විජේවීරව හිරේට දැම්මාය. 1988 ජවිපෙ සමග සන්ධානගත වීමට ජවිපෙ දමපු කොන්දේසි ප්රතික්ෂේප කළාය.
ඒත් ප්රේමදාසවත්, විජේවීරවත්, විජයවත් තමන්ට තර්ජනය තියෙන්නේ ප්රභූ පන්තියෙන් බව තේරුම් ගත්තේ නැත. ඔවුන් තමන්ගේ හතුරා ලෙස දැක්කේ තමාගේම පන්තියේ නායකයන්ය. ප්රභූ පන්තියටත් ඕනෙ වුණේ ඒකය. විජේවීර, විජයව හතුරෙක් ලෙස දැක්කේය. විජය, විජේවීරව හතුරෙක් ලෙස දැක්කේය. විජේවීරගේ අතින් විජය මැරුම්කෑවේය. ප්රේමදාසගේ අතින් විජේවීර මැරුම්කෑවේය. අවසානයේ යූ.ඇන්.පී. ප්රභූ පන්තියයි, බණ්ඩාරනායක මැතිනියයි එක්වී ප්රේමදාසට එරෙහි දෝෂාභියෝගයක් ගෙනැවිත් ප්රේමදාස නොමරා මරනු ලැබීය.
ප්රේමදාසව ඝාතනය කළේත් උතුරේ නිර්ප්රභූ පන්තියක නායකයකු වූ ප්රභාකරන්ය. ප්රේමදාස, විජය, විජේවීර මෙන් ප්රභාකරන්ද උතුරේ ප්රභූ පන්තියට එරෙහිව කැරැලි ගහපු නිර්ප්රභූ නායකයෙකි. මේ හතර දෙනාම උසස් යැයි සම්මත කුල නියෝජනය නොකරන හතර දෙනෙකි.
ඉතිහාසයේ එකම සිදුවීම අද වෙනස් විදියකට සිදුවෙමින් තිබේ. නිර්ප්රභූ නායකයන් දෙදෙනෙක් අතර සටන ප්රභූ පන්තිය බය බිරාන්ත වී බලා සිටී. ජනාධිපතිවරණ නැති කරන විධායක ජනාධිපති ක්රමය අහෝසි කරන යෝජනා ප්රභූ පන්තියේ කුමන්ත්රණය.
ප්රේමදාස, විජේවීර, විජය මෙන් සජිත් සහ අනුරද තමන්ගේ හරි හතුරා කවුද කියා හඳුනාගෙන නැත. සජිත් හිතන්නේ තමන්ගේ හතුරා අනුර කියාය. අනුර හිතන්නේ තමන්ගේ හතුරා සජිත් කියාය. ඒත් මේ දෙන්නාගේම හතුරා ප්රභූ පන්තියය.
හැබැයි 1988 ජවිපෙ භීෂණය ප්රභූ පන්තියට කටඋත්තර නැති කළා සේ 2022 අරගලය ප්රභූ පන්තිය කකුල් දෙකෙන් ඔසවා පොළොවේ ගසා ඇත. ප්රභූ පන්තිය 1988 දුර්වල වූ වෙලාවේ ආවේත් නිර්ප්රභූ ජනාධිපතිවරයෙකි. මෙවර ප්රභූ පන්තිය ඔළුවෙන් හිටවලා ඉන්න වෙලාවකත් එන්න ඕනා නිර්ප්රභූ ජනාධිපතිවරයෙකි.