දරු දෙදෙනා හදා ගැනීමට ක්රමයක් නැතැයි කියමින් 31 හැවිරිදි දෙදරු මවක සෙවණගල ප්රාදේශීය ලේකම් කාර්යාලය ඉදිරිපිටට පැමිණ හඬා වැටුණු සිද්ධියක් වාර්තා වේ.
සැමියා තමන් හා දරු දෙදෙනා නිවෙසින් පන්නා දමා වෙනත් කාන්තාවක සමඟ ජීවත්වන බවත්, තමන්ට ඉන්න හිටින්නට තැනක් හා දරුවන් දෙදෙනා හදාගන්නට ක්රමයක් නැති බවත් කියමින් මෙසේ හඬා වැටී ඇත්තේ උඩවලව, තණමල්විල පාරේ, 8 කණුව ප්රදේශයේ පදිංචි පී.එම්. අනෝජා සමන්මලී නමැති කාන්තාවකි.
ඇයගේ පුතු වන එච්.ආර්.එම්. සස්මික සහස්ර නිම්නෙත් සිවු හැවිරිදි වියේ පසුවන අතර, දියණිය වන එච්.ආර්.එම්. යෙහෙන්ෂා යෙනුලිගේ වයස අවුරුදු එක හමාරකි.
උදව් උපකාර පැතිය හැකි සියලුම දෙනාට දුක කියමින් පදිංචියට ඉඩමක් ඉල්ලා සිටියත් නොලැබුණු බවත්, දරුදෙදෙනා සමඟ ජීවිතය නැති කරගන්නවා හැර විකල්පයක් නැති බවත් ඇය පවසා ඇත.
සැමියා තමන් පන්නා දමා වෙනත් කාන්තාවක සමඟ ජීවත් වන බවට පොලිසියට පැමිණිලි කළත් පලක් නොවූ බවත්, පදිංචියට ස්ථානයක් ලැබුණොත් කුලී වැඩක් කරගෙන හෝ ජීවත්විය හැකි බවත් ඇය පැවසුවාය.
සෙවණගල ප්රාදේශීය ලේකම්වරයාගෙන් ඉඩම් කැබැල්ලක් ඉල්ලූ විට එහි නිවෙසක් ඉදිකරගන්නා ආකාරය විමසන බවත් ඉඩමක් තිබේ නම් හිඟා කා හෝ නිවෙසක් තනාගත හැකි බවත් ඇය කියයි.
දරුවන් දෙදෙනා පරිවාසයට බාරදෙන්නැයි ප්රාදේශීය ලේකම් කාර්යාලයේ නිලධාරීන් පවසන බවත්, තමන්ට දරු දෙදෙනා නොමැතිව ජීවත්විය නොහැකි බවත් ඇය පැවසුවාය.
මේ සම්බන්ධයෙන් කළ විමසීමක දී සෙවණගල ප්රාදේශීය ලේකම් නයනජිත් ප්රියශාන්ත මහතා පැවසුවේ ඇයට ඉඩමක් ලබාදීමට තමන්ට හැකි බවත් ඒ සඳහා ඉඩම් කච්චේරියට මේ පිළිබඳව යොමුකර ඉඩමක් ලබාදීමට කටයුතු කරන බවත්ය.
මෙම මවට පිහිට විය හැකි පරිත්යාගශීලීන් වෙත්නම් සෙවණගල ප්රාදේශීය ලේකම්වරයා හෝ 0773855587 යන දුරකථන අංකයට අමතා තොරතුරු ලබාගත හැක. -ලංකාදීප
