මුතුරාජවෙල පරිසර සංවේදී කලාපයට අයිතිව තිබූ හෙක්ටයාර් 5601ක භූමි ප්රමාණය පසුගිය වසර කිහිපය තුළදී හෙක්ටයාර් 1200 දක්වා අඩු වී ඇති බව ජී. පී. එස්. තාක්ෂණය යටතේ සිතියම් ගත කිරීමේදී හෙළි වී තිබේ.
ඒ සඳහා හේතු වී ඇත්තේ පාතාලය, ඇතැම් ප්රාදේශීය දේශපාලනඥයින්, ඔවුන්ගේ හිතවතුන් සහ ඇතැම් රාජ්ය නිලධාරීන් විසින් මුතුරාජවෙල නීති විරෝධීව ගොඩ කර අල්ලා ගැනීමය.
ඒ සම්බන්ධයෙන් සිදු කළ පරීක්ෂණවලදී හෙළි වී ඇත්තේ 1990 වන විටද මුතුරාජවෙලට හෙක්ටයාර් 3064ක් හිමි වී තිබූ බවය.
ඒ හේතුවෙන් ජනාධිපතිවරයාගේ උපදෙස් මත මුතුරාජවෙල වහාම නාගරික සංවර්ධන අධිකාරියට පවරා ගෙන එය සංරක්ෂණය සඳහා කඩිනමින් අදාළ නීතිමය පියවර ගැනීමට තීරණය කළ බව නාගරික සංවර්ධන රාජ්ය අමාත්ය ආචාර්ය නාලක ගොඩහේවා මහතා පැවසීය.
මුතුරාජවෙල ඉඩම් අතරේ පෞද්ගලික ඉඩම්ද තිබෙන බව අනාවරණය වී ඇති හෙයින් ඒවා ගැන වෙනම සොයා බැලීමක් සිදු කරන බවද සඳහන් කළ අමාත්යවරයා දැනට වනජීවී දෙපාර්තමේන්තුව මඟින් පාලනය වන මුතුරාජවෙල නාගරික සංවර්ධන අමාත්යාංශය යටතට ගැසට් මඟින් පවරා ගන්නා බවද සඳහන් කළේය.
කොළඹ නගරාසන්නයේ පිහිටා ඇති මුතුරාජවෙල කොළඹ අවට වාතාශ්රය පිරිසුදු කරන පෙනහල්ලක් බඳු පරිසර සංවේදී කලාපයක් බව පාර්ලිමේන්තු මන්ත්රීවරු කිහිප දෙනකුම පරිසර අමාත්යාංශයට පෙන්වා දී තිබිණි.
