පවතින පළාත් පාලන ආයතන සංකල්පය වෙනස් කිරීමට සමගි ජන බලවේගය විසින් විවිධ යෝජනා සහ වැඩපිළිවෙළ සංවිධානය කරන විට කිසිදු වැඩක් නොකර විවිධ දේශපාලන පක්ෂ සමඟ ඩීල් දමමින් කයිවාරු ගසන සමහර දේශපාලන පක්ෂ විසින් සමාජ මාධ්ය හරහා අපහාස උපහාස සිදු කරන බවත් එසේ අපහාස උපහාස සිදු කළත් රටේ මුදල් නොමැති අවස්ථාවක වුවත් නෑ බෑ නොකියා ජනතාවට සේවය කිරීමට ඒ සියලු වැඩසටහන් සංවිධානය කර ඇති බවත් විපක්ෂ නායක සජිත් ප්රේමදාස මහතා රත්තොට පැවැති ජන හමුවකට එක් වෙමින් පැවසීය.
මැතිවරණයෙන් පසු සමගි ජන බලවේගයේ පළාත් පාලන මන්ත්රීවරු ජනතාවගේ දෙපතුළ ළඟට ගොස් සේවය කළ යුතු බවට තමා පැවසූ විට සමාජ මාධ්ය හරහා සුළු පිරිසක් විහිළු කරන බවත් 2019 ජනාධිපතිවරණයේ දීද එසේ පැවසූ විට එවක ද විහිළු කළ බවත් එම විහිළුවේ ප්රතිඵල මේ වන විට රටම විඳින බවත් රට බංකොලොත් වී ජනතාව අන්ත අසරණ තත්ත්වයට පත්ව ඇති බවත් විපක්ෂ නායකතුමා පැවසීය.
නමුත් මෙම ජංගම සේවාවේ අරමුණ වන්නේ ජනතා ඡන්දයෙන් පත්වූ සභාපති, උපසභාපති සහ මන්ත්රීවරු ජනතාව හමුවට ගොස් ඔවුන්ගේ ගැටලු සොයා බලා විශිෂ්ඨ සේවාවක් ලබා දීම බවත් විපක්ෂ නායකතුමා අවධාරණය කළේය.
අදාළ පළාත් පාලන ආයතනයන් හි ප්රශ්න ඒ ඒ පළාත් පාලන ආයතන තුළ ම විසඳන වැඩසටහන් රැසක් ක්රියාත්මක කිරීමට අපේක්ෂිත බවත් දත්ත හා තොරතුරු මත පදනම්ව අදාළ ප්රශ්න විසඳන වැඩසටහනක් කිසිදු පක්ෂයකට හෝ රජයට පවා නොමැති අවස්ථාවක සමගි ජන බලවේගය එවැනි සංකල්පයක් ක්රියාත්මක කරන බවත් එවැනි ජනතා හිතකාමී වැඩසටහනක් ක්රියාත්මක වන විට සමහර ප්රශ්න බොරු කතා කියමින් ජනතාව ඇන්දවීමට කටයුතු කරන බවත් පැවසූ විපක්ෂ නායකවරයා වැඩිදුරටත් කියා සිටියේ ජනතාවට අවශ්ය ලස්සන වචන, මිරිගු පස්සේ යන්න නම් සමගි ජන බලවේගය ඊට සූදානම් නොමැති බව ද පැවසීය.
රට විනාශ කළ කල්ලි එකට එකතු වී ඇති බවත් ඔවුන්ට විටින් විට කඩේ ගිය රතු මල්ලිලා එකම විසඳුම යනුවෙන් කියා ගන්නා බවත් පැවසූ විපක්ෂ නායකවරයා සඳහන් කර සිටියේ මේ රටට ඇති එකම විසඳුම වන්නේ මුදල් සෙවිය හැකි නායකත්වයක් සහ කණ්ඩායමක් සහිත දේශපාලන පක්ෂය කුමක්ද? කියා ජනතාව මේ අවස්ථාවේ නිවැරදිව තීරණය කිරීම බවයි.
එසේ ම ඉදිරි පළාත් පාලන මැතිවරණයෙන් සමගි ජන බලවේගය ජය ගත් පසු මේ රටේ පරිවර්තනාත්මක සංවර්ධන යුගයක් ආරම්භ කර ජන හිතකාමී පාලනයක් ගෙන යන බවත් ඒ සඳහා බුද්ධිමත් ඡන්ද දායකයන්ගේ සහාය අවශ්ය බවත් අවසාන වශයෙන් විපක්ෂ නායක සජිත් ප්රේමදාස මහතා වැඩිදුරටත් කියා සිටියේය.
