මේ වන විට පටු දේශපාලන වාසි ලබාගැනීම තම මූලික අරමුණ කරගත් පොළොන්නරුව දිස්ත්රික්කයේ එක්තරා දේශපාලඥයෙකු විසින් මහා පරිමාණ සහල් මෝල් හිමියන් ඉලක්ක කොටගෙන සමාජ ජාලා හරහා ව්යාපාර ලාභය සම්බන්ධයෙන් දැවැන්ත මඩ ප්රචාරයක් එල්ල කරමින් සිටින බව හිටපු ජනපති සොයුරු, කෝටිපති ව්යාපාරික ඩඩ්ලි සිරිසේන මහතා සදහන් කොට ඇත.
ඒ මහතාගේ ෆේස්බුක් පිටුවේ මේ සම්බන්ධයෙන් මෙසේ අදහස් පළ කොට තිබේ.
ඕනෑම ව්යාපාරිකයෙකු තමන් සතු ව්යාපාර වපසරිය වැඩිදියුණු කරගන්නේ හුදෙක් ලාභ ලැබීම මූලික පරමාර්ථය කර ගනිමිනි. මමද එසේ ලාභ අරමුණු කොටගෙන, ස්වෝත්සාහයෙන් ව්යාපාර ලෝකය ජයගත් දේශීය ව්යවසායකයෙකි.
එහෙත්, බොහෝ දුෂ්කරතා මධ්යයේ මා ගොඩනඟාගත් කීර්තිනාමය සහ ව්යාපාර සන්නාමය භාවිතා කරමින් කිසිදිනක අනිසි ලෙස සමාජයේ හැසිරීමටත්, මාගේ සහෝදරයින්ගේ දේශපාලන භාවිතාව යොදා ගනිමින් අනවශ්ය ලෙස සමජයේ කැපී පෙනීමටත් මා කිසි දිනෙක ක්රියා කොට නැති බව, මා දන්නා හඳුනන සියල්ලන්ම පාහේ හොඳින් දන්නා දෙයකි. එය අදටත් එසේමය.
මා වෙහෙස මහන්සියෙන් උපයා ගත් මිල මුදලින් කරනු ලබන පෞද්ගලික ධන පරිත්යාගයන් සහ මාගේ ජනතා සුභසාධනවාදී වැඩිපිළිවෙළ හේතුවෙන් පොළොන්නරුව දිස්ත්රික්කයේ ඇතුලු සමස්ථ ලක්වාසීන්ගේ නිඹඳ ආදරය සහ ගෞරවය දිනාගත් මා හට, මජර දේශපාලනයෙන් හරි හම්බ කරගැනීමට අමුතුවෙන් යමක් නැත.
එහෙයින්, මේ සිදුකරනු ලබන සියලුම සමාජ සත්කාරයන් මා විසින් සිදුකරනු ලබන්නේ මා අදහන බෞද්ධ දර්ශනයට අදාලව මිසෙක, පටු දේශපාලන අරමුණු සහ පරමාර්ථ පෙරදැරිකොටගෙන නොවන බව අදාල දේශපාලඥයින් දැන්වත් තේරුම්ගත යුතුව ඇත.
අපි කර්මාන්තයක් වශයෙන් මෙම ව්යාපාරය සිදුකරන නිසා මෙහි ඇති වියදම් හොඳින් දනිමු. සේවකයන්ගේ පඩිනඩි සහ වාර්ෂික ප්රසාද දීමනා, විශාල විදුලි බිල් සහ වතුර බිල්, යන්ත්රෝපකරණ නඩත්තු සහ ප්රවාහන වියදම් ගිය පසු මහා පරිමාණ මෝල් හිමියන්ට වුවද සහල් ව්යාපාරයෙන් අති විශාල ලාභ ලැබෙන්නේ නැත. එහෙත් තම ධනය සහ ලාභය කළමනාකරණය කරගනිමින් නිවැරදි ආයෝජන අවස්ථා සළසා ගන්නා ව්යාපාරියකන් මේ ක්ශේත්රය ජයගෙන ඇත. මමද එවැනි අතලොස්සෙන් කෙනෙකි.
එහෙයින්, මේ මොහොතේ රටේ ප්රධාන මාතෘකාව බවට සහල් ව්යාපාරයේ ලාභය පත්කරගැනීමට වඩා අවශ්ය වන්නේ අපහසුතාවට පත්වූ ජනතාව වෙනුවෙන් සහන සැළසීමේ රජයේ ක්රියාන්විතය ශක්තිමත් කිරීමය. රටේ ශ්රමයෙන් සහ ජනතාවගේ මුදලින් නිර්මාණය වූ මා වැනි දේශීය ව්යවසායකයන් මේ මොහොතේදී අතිගරු ජනාධිපති ගෝඨාභය රාජපක්ෂ මහතා සමඟින් අත්වැල් බැඳගත්තේ ඒ කර්තව්යය ශක්තිමත් කිරීමේ මූලික අධිෂ්ඨානයෙනි.
එහෙයින් මෙම කාලපරිච්ඡේදය තුළ පාට පක්ෂ නොබලා, ජනාධිපතිවරයාගේ සහ රජයේ වැඩපිළිවෙළ වෙනුවෙන් දායකත්වය ලබා දී කැපවන ලෙස සියලුම දේශපාලනඥයන්ට සහ පෞද්ගලික ව්යවසායකයන්ට මා ආරාධනා කරන්නේ ඒ නිසාමය. මන්ද මෙම වසංගතය අප රටෙන් මුළිනුදුරා දැමිය හැක්කේ රජයේ වැඩපිළිවෙළ සමඟ එක්ව වැඩකිරීමෙන් මිසක, වෙන්ව පටු අරමුණු මුදුන්පමුණුවා ගැනීමෙන් නොවන බව සිහිපත් කළ යුතුව ඇති නිසාය.
ස්තූතියි…!
නිඹඳවම ඔබ වෙනුවෙන් කැපවන මම,
ඩඩ්ලි සිරිසේන
