පාස්කු ප්රහාරය සිදුවී වසරක් සපිරෙන මේ මොහොතේ ප්රහාරය සිදුවන අවස්ථාවේ බලයේ සිටි ජනාධිපතිවරයා මෙන්ම සන්නද්ධ හමුදාවල සේනාධිනායකයා වූ මෛත්රීපාල සිරිසේන, අගමැති රනිල් වික්රමසිංහ, රාජ්ය ආරක්ෂක ඇමැති රුවන් විජයවර්ධන යන මහත්වරුන්ගෙන් කිසිදු අයකු අවම වශයෙන් නිවේදනයක් හෝ නිකුත් නොකිරීම විශේෂ සිදුවීමකි.
ප්රහාරය සම්බන්ධයෙන් වත්මන් ජනාධිපති ගෝඨාභය රාජපක්ෂ, අගමැති මහින්ද රාජපක්ෂ යන මහත්වරුන් පමණක් නොව සමගි ජන බලවේගයේ නායකයා වන සජිත් ප්රේමදාස මහතා පවා අද (21) දින නිවේදන නිකුත් කරමින් ප්රහාරය හෙළා දැකීමට පියවර ගෙන තිබිණ.
නමුත් හිටපු ජනාධිපති මෛත්රිපාල සිරිසේන, හිටපු අගමැති රනිල් වික්රමසිංහ සහ හිටපු රාජ්ය ආරක්ෂක අමාත්ය රුවන් විජයවර්ධන යන මහත්වරුන් අද දිනයේ ඒ සම්බන්ධයෙන් කිසිදු වචනයක් හෝ කතා නොකළා පමණක් නොව අවම වශයෙන් එම අවස්ථාව සිහි කරමින් පහනක් හෝ දල්වනු දැකගත නොහැති විය.
කෙසේවෙතත් ප්රහාරය සිදුවන අවස්ථවේ ඒ සම්බන්ධයෙන් පූර්ව අනතුරු ඇගවීම් රැසක් ලැබී තිබුණද ආරක්ෂක ඇමැති ලෙස ජනාධිපති මෛත්රීපාල සිරිසේන මහතා ඒ පිළිබද උනන්දුවක් නොදැක්වූ බවට එකල චෝදනා එල්ල වී තිබිණ.
ප්රහාරය සිදුවන අවස්ථාවේ පවා මෛත්රීපාල සිරිසේන මහතා සිටියේ කිසිවකුටත් නොකියා සිංගප්පූරු සංචාරයක නිරතවය. නමුත් ප්රහාරයෙන් පසුවත් දින ගණනාවක් යනතුරු ඒ මහතා දිවයිනට පැමිණීමට පියවර ගත්තේ නැත.
පසුව පැවැති පාර්ලිමේන්තු තේරීම් කාරක සභාවේදී පවා ජනාධිපතිවරයා ලෙස එකල සිරිසේන මහතා සිය වගකීම් පැහැර හැර ඇති බව අනාවරණය වී තිබිණ.
