ආන්දෝලනයට තුඩු දී ඇති නෙදර්ලන්තයේ ජිනවංශ හිමියන්ගේ මරණය උන්වහන්සේ දිය යට භාවනා කිරීමක් හේතුකොට සිදුවූවේදැයි ඒ සම්බන්ධයෙන් පරීක්ෂණ පවත්වන පොලිස් කණ්ඩායමට අලුත් සැකයක් මතුව තිබේ.
නෙදර්ලන්තය වැනි රටවල් මේ වන විට දිය යට කිමිදී භාවනා කිරීමේ ක්රමවේදයක් ප්රචලිතව තිබෙන බව එම විමර්ශන මෙහෙයවන නිලධාරියා වැඩිදුරටත් කීය.
එබැවින් උන්වහන්සේත් එවැනි අත්හදා බැලීමක් කිරීමට ගොස් මෙවැනි අනතුරක් සිදුවී දැයි යන සැකය මේ වන විට මතුව තිබේ.
උන්වහන්සේ අඳනකඩය පිටින් දියේ ගිලී සිටීම, දියේ ගිලුණු ස්ථානය සහ උන්වහන්සේගේ කුටිය අතර එතරම් දුරක් නොතිබීම, දියේ ගිලුණු ස්ථානය කරවටක් හෝ නොමැති වීම එම සැකය තවදුරටත් වර්ධනය වීමට හේතු වී තිබෙන බවද වාර්තා වේ.
නෙදර්ලන්ත හිමිනමගේ පාදයේ ගැටගසා තිබුණු කොන්ක්රීට් කැබැල්ල උන්වහන්සේ දිය යට කිමිදී සිටියදී සිරුර දිය යට තබා ගැනීමට පහසුවක් ලෙස ගැටගැසුවක් බවට සැකයක්ද මේ වන විට මතුව තිබේ.
කොන්ක්රීට් කැබැල්ලේ ගැට ගසා තිබී ඇත්තේ මාළු දැල් ගැටගසන නූල්වලින් බවත්, මළසිරුර හමුවන විට එම ලණු දෙපාවල පැටලී තිබුණු බවත් එම නිලධාරීන් අනාවරණය කළේය.
දැනට කෙරී ඇති විමර්ශනවලින් ජිනවංශ හිමියන්ගේ මරණය ඝාතනයක්ද, සියදිවි හානිකර ගැනීමක්ද යන්න පිළිබඳව මූලික සැකයක් මතුවුණත් අලුත් තොරතුරුවලට අනුව විමර්ශන නවමඟක් ගනු ඇති බවද එම නිලධාරියා කීය.
කෙසේ වෙතත් මෙහි අවසන් තීන්දුව ගතහැක්කේ රස පරීක්ෂක වාර්තාව ලැබුණු පසුව බවද හෙතෙම කීය.
