අද වන විට මේ රටේ දේශපාලනමය වශයෙන් සිදුවන ක්රියාදාමයක් පිළිබඳව අවධානය යොමුකිරීමේදී රට ඉදිරියට ගෙනයාමට ආණ්ඩුව බලාපොරොත්තුවන මාර්ගය කුමන ආකාරයේ එකක් ද යන්න පිළිබඳව හොඳින් වැටහෙන බවත්, ශාපලත් පාලනයක් අවසන් කිරීමට කටයුතු කිරීමත්, ප්රජාතන්ත්රවාදී අයිතීන් සුරැකීමට පෙරට ඒමත් නිසා, රාජිත සේනාරත්න මැතිතුමා සිරගත කර දැඩි පළිගැනීමේ ක්රියාවලියක් ආණ්ඩුව විසින් ආරම්භ කර තිබීමෙන් පැහැදිලි වන බව හිටපු අමාත්ය පාඨලී චම්පික රණවක මහතා පෙන්වා දෙයි.
හිටපු අමාත්යවරයා මේ බව සඳහන් කර සිටියේ අද (15) සමගි ජන බලවේගය පක්ෂ කාර්යාලයේ පැවති මාධ්ය හමුවකට එක්වෙමිනි.
එහිදී වැඩි දුරටත් අදහස් පළකළ හිටපු අමාත්යවරයා,
කරුණු දෙකක් මුල් කරගනිමින් ආණ්ඩුව විසින් රාජිත සේනාරත්න මැතිතුමා කිසිදු කෙනෙකුට බැලීමටවත් නොහැකි ලෙස අඳුරු සිර කුටියක රඳවමින් දැඩි මර්ධනකාරී වැඩපිළිවෙළක් දියත්කොට තිබෙනවා. පළමු කරුණ එතුමාගෙන් පළිගැනීමයි. ඒ ඇයි ? 2014 නොවැම්බර් මාසෙ 21 වෙනිදා රාජපක්ෂ පාලනය අවසන් කිරීම සඳහා මෛත්රීපාල සිරිසේන මැතිතුමත් එක්ක නව නගර ශාලාවට පැමිණ මාධ්ය සාකච්ඡාවක් පවත්වමින් ඒ පාලනය පෙරලා දැමීම සඳහා යුක්ති සහගත ප්රජාතන්ත්රවාදී මිනිස්සුත් එක්ක පෙනී සිටීම.
ඒ වගේම අපේ රජයේ ඇතැම් අය රාජපක්ෂ පාලනයේ පිරිස් එක්ක කරට අත දාගෙන කටයුතු කරමින්, දූෂිතයින් අධිකරණ ක්රියාමාර්ගවලින් නිදහස් කරගන්න යටින් ගණුදෙනු කරනකොට ඒවාට විරුද්ධව නිර්භයව පෙනී සිටීම. අන්න ඒ ක්රියාදාමයන්ට එතුමාගෙන් පළිගැනීමක් හැටියටයි අපි මෙය දකින්නෙ. 2014 නොවැම්බර් 21 වන දා ශාපලත් පාලනයක් ඉවත් කරන්න ප්රජාතන්ත්රවාදීව කටයුතු කළ එතුමා අද දුක්විඳිනකොට, එතුමා විසින් ජනාධිපති, අගමැති ඇතුළු පදවි වලට ඔසවා තබපු අය අද මේ ආණ්ඩුවේ කොටස්කාරයො බවට පත්වෙලා සිටීම පිළිබඳව අපි ඉතාමත් කණගාටුවට පත්වෙනවා.
දෙවැනි හේතුව තමයි බිය. මොකටද මේ බිය? අද වෙනකොට රටේ වැඩකරන ජනතාව පාරට ඇදවැටිල තියෙනවා. අති විශාල පිරිසකට රැකියා අහිමිවෙලා තියෙනවා. විදේශගතව සිටි අයටත් රැකියා අහිමිවෙලා තියෙනවා. රජයේ සේවකයින්ගේ වැටුප් කප්පාදු කරමින් ඉන්නවා. ඒ වගේම මේ කොවිඩ් උවදුර පිළිබඳව නොයෙක් සංඛ්යා ලේඛන හරඹ කරමින් මේ කොවිඩ් උවදුරේ තිබෙන බොහොම නරක තත්ත්වයන් යටපත් කරගන ඉදිරියට යන්න කටයුතු කරමින් සිටිනවා. රාජිත සේනාරත්න මැතිතුමා නිසැකවම මේ කොවිඩ් උවදුර සම්බන්ධයෙන් සත්ය තොරතුරු හෙළි කිරීමත්, ඒ වගේම මේ රටේ වැඩ කරන ජනතාවගේ අයිතිය වෙනුවෙන් ඉදිරියට එන බවත් මේ පාලකයො දන්නවා. ඒ වගේම මේ රටේ නිදහස් ප්රජාතන්ත්රවාදය මර්දනයට එරෙහිව එතුමා නැගිටින බව මේ පාලකයො දන්නවා. ඒකයි මේ බිය.
අපේ මන්ත්රීවරු ලිපියක් දුන්න සෞඛ්ය අමාත්යාංශයට කොවිඩ් මරණ සම්බන්ධයෙන් සංඛ්යා දත්ත ලබාදෙන්න කියල. දැන් ලිපිය ලබාදීල සතියකට වැඩියි. කිසිම උත්තරයක් නෑ. අපට කියන්න තියෙන්නෙ මේවා කවද හරි හෙළිවෙනවා. මේවා යටපත් කරගෙන ඉන්න බෑ. ඒ නිසා රාජිත සේනාරත්න මැතිතුමා ලෝක සෞඛ්ය සංවිධානයේත් පදවි තානාන්තර දරමින් කළ මෙහෙය, විශේෂයෙන්ම ඩෙංගු මර්ධන ව්යාපාරයෙදි කළ මෙහෙය මේ රටේ ජනතාවට මතකයි. ඒ නිසා අපි එතුමා නිදහස් කරගැනීම සඳහා අධිකරණමය ක්රියාමාර්ග ගන්නවා වගේම එතුමාම අපට පෙන්නල දීපු ඒ ජන අරගලයේ මාවතටත් අපි පිවිසෙන බව බොහොම වගකීමෙන් යුතුව අපි ප්රකාශ කරනවා.
මොකද මේක රාජිත සේනාරත්නට තබපු අතක් නෙවෙයි. මේ රටේ අනාගතයේ ප්රජාතන්ත්රවාදී නිදහස ඉල්ලල එළඹෙන සියලුම දෙනාට එරෙහිව තබපු අතක් හැටියටයි, මර්දනයක් හැටියටයි අපි දකින්නෙ. ඒ නිසා සමස්ථ ජනතාවගේම මේ නිදහස් ප්රජාතන්ත්රවාදී අයිතිය වෙනුවෙන් අපි නැගී සිටිනවා, ප්රජාතන්ත්රවාදීව, නීත්යානුකූලව කටයුතු කරනවා. අපේ නිදහස් ස්වාධීන අධිකරණය ඒ පිළිබඳව නිවැරදිව ක්රියාකරනු ඇතැයි විශ්වාස කරන බව ද හිටපු අමාත්යවරයා වැඩි දුරටත් සඳහන් කර සිටියේය.
