ශ්රී ලංකා-චීන පාර්ලිමේන්තු මිත්රත්ව සංගමයේ නව සභාපතිවරයා ලෙස තරුණ හා ක්රීඩා අමාත්ය නාමල් රාජපක්ෂ මහතා අද (22) තේරී පත් විය.
කථානායක මහින්ද යාපා අබේවර්ධන මහතාගේ ප්රධානත්වයෙන් පැවති ශ්රී ලංකා – චීන පාර්ලිමේන්තු මිත්රත්ව සංගමයේ පුනර්ජීවන රැස්වීමේදී මෙම පත්වීම සිදු කෙරිණි.
ශ්රී ලංකා – චීන පාර්ලිමේන්තු මිත්රත්ව සංගමයේ ලේකම් ලෙස පාර්ලිමේන්තු මන්ත්රී ප්රේම්නාත් සී. දෝලාවත්ත මහතා පත් කරන ලදී. දෙරට අතර මිත්රත්වය පුනර්ජීවනය කිරීමේ අරමුණින් පැවති රැස්වීමට පාර්ලිමේන්තු මහලේකම් ධම්මික දසනායක මහතා සහ තානාපති ක්වි ෂෙන්හෝං මහතා සහභාගී වූහ.
ආචාර්ය උපුල් ගලප්පති, අරවින්ද් කුමාර් සහ සෙල්වම් අඩකලානාදන් යන මහත්වරුන් නියෝජ්ය සභාපති ධූරයට තේරී පත් වූ අතර, නියෝජ්ය ලේකම් ලෙස මොහොමඩ් මුසම්මිල් සහ භාණ්ඩාගාරික ලෙස ඉෂාක් රාහුමාන් තේරී පත් විය.
මෙහිදී අදහස් දක්වමින් කථානායක මහින්ද යාපා අබේවර්ධන මහතා කියා සිටියේ ශ්රී ලංකාව හා චීනය අතර සබඳතා ක්රි.පූ. 206 තරම් ඈත අතීතයට දිවෙන බවත් 1957 දී නිල රාජ්ය තාන්ත්රික සබඳතා ඇති වූ දා සිට දෙරට අතර ඉතා ගැඹුරු සම්බන්ධතාවයක් පවතින බවත්ය.
COVID-19 වලින් ආරක්ෂා වීමට චීන රජය විසින් ශ්රී ලංකාවට ලබා දී ඇති ශක්තිමත් සහයෝගය කථානායකවරයා අගය කළ අතර ශ්රී ලංකාවේ විදේශ සංචිත ආරක්ෂා කිරීමේ මූලික ප්රභවය චීනය බව ප්රකාශ කළේය.
2014 දී චීන ජනාධිපති ෂී ජින් පිං ශ්රී ලංකාවට පැමිණීම සහ හිටපු ජනාධිපති සහ වත්මන් අගමැති මහින්ද රාජපක්ෂගේ චීනයේ සංචාරය දෙරට අතර ද්විපාර්ශ්වික සබඳතා ශක්තිමත් කිරීමට ඉවහල් වූ බව කථානායකවරයා පැවසීය.
8 වන පාර්ලිමේන්තුවේදී ශ්රී ලංකා පාර්ලිමේන්තු මන්ත්රීවරුන්ට සහ පාර්ලිමේන්තු කාර්ය මණ්ඩලයට ලබා දුන් අධ්යාපන චාරිකා සිහිපත් කරමින් කථානායකවරයා කියා සිටියේ 2016 දී පාර්ලිමේන්තු මන්ත්රීවරයෙකු වශයෙන් ඔහුට ද එවැනි නියෝජිත පිරිසක් සමඟ චීනයේ සංචාරය කිරීමට අවස්ථාව ලැබුණු බවයි .
රැස්වීම අමතමින් චීන තානාපතිවරයා ශ්රී ලංකා-චීන පාර්ලිමේන්තු මිත්රත්ව සංගමය නැවත ස්ථාපිත කිරීම පිළිබඳව සිය උණුසුම් සුබ පැතුම් එක් කළේය. මෙය තවදුරටත් ද්විපාර්ශ්වික සබඳතා ශක්තිමත් කරන බවත්, ශ්රී ලංකාවට තවදුරටත් සහයෝගය දැක්වීමට චීනය සූදානම් බවත් ඔහු පැවසීය.
