ආර්ථිකයේ අයිතිය ජනතාවට හිමිවන, ජනතා කේන්ද්රීය ජාතික ආර්ථිකයක් ගොඩනැගීම අරමුණු කොට ගෙන මෙවර රාජ්ය අමාත්යාංශ ව්යුහය සකස් කළ බව ජනාධිපති ගෝඨාභය රාජපක්ෂ මහතා පවසයි.
රාජ්ය අමාත්යාංශ විෂය පථය සමාලෝචනය ආරම්භ කරමින් අද (17) පස්වරුවේ ජනාධිපති කාර්යාලයේ පැවති සාකච්ඡාවේදී ජනාධිපතිවරයා මේ බව සඳහන් කළේය.
බතික්, අත්යන්ත්ර රෙදි සහ දේශීය ඇඟළුම් නිෂ්පාදනය විෂය කොට රාජ්ය අමාත්යාංශයක් නිර්මාණය කිරීමට හේතු ජනාධිපතිවරයා විසින් පැහැදිළි කරනු ලැබීය.
කොවිඩ් 19ත් සමග දැඩි අර්බුදයකට මුහුණ පා ඇති සෙසු රටවල් යථා තත්ත්වයට පත් වන තෙක් දේශීය ආර්ථිකය දියුණු නොකර ඉදිරියට යා නොහැකි බව ජනාධිපතිවරයා මෙහිදී සඳහන් කළේය.
“ඇඟළුම් කර්මාන්තය රටේ සමස්ථ අපනයනයෙන් 43%ක් නියෝජනය කරයි. අපනයන ආදායමට වාර්ෂිකව ඉන් එක්කරන මුදල ඇමරිකානු ඩොලර් බිලියන 5ක් පමණ වේ. රැකියා සැපයීමේ දී සහ ප්රාදේශීය සංවර්ධනයේ දී ඇඟළුම් කර්මාන්තය පුරෝගාමී මෙහෙවරක් ඉටු කරයි. එය ශක්තිමත් කරමින් බතික් සහ අත්යන්ත්ර රෙදි හා දේශීය ඇඟළුම් නිෂ්පාදනය දියුණු කිරීම රජයේ ප්රධාන අරමුණ“ බව ජනාධිපතිවරයා පැවසීය.
බතික් සහ අත්යන්ත්ර කර්මාන්තය නඟාසිටුවිමට සියලු අංශ ආවරණය කෙරෙන සැලැස්මක් සකස් කරන ලෙසද ජනාධිපතිවරයා උපදෙස් දුනි.
එය සාර්ථක කර ගැනීමෙන් ඉදිරි පස් වසර තුළ ඇගළුම් නිෂ්පාදකයන්ට ඉහළ ස්ථාවරත්වයක් අත්කරගත හැකි බව රාජපක්ෂ මහතා පැවසීය.
“සළු සළ” වැනි ආයතන මගින් බතික් සහ අත්යන්ත්ර රෙදි පිළි නිෂ්පාදකයාට වෙළෙඳපොළක් සකසා දිය හැකි බවද ජනාධිපතිවරයා පෙන්වා දුනි.
