මේ දිනවල බොහෝ දෙනා බලා සිටින්නේ රන්ජන්ගේ හඬපට දෙසය. සියලුම මාධ්යයත් රස කර කර පෙන්වන්නේ රන්ජන්ගේ හඬ පටවල තියෙන දේවල්ය. මේ ආකාරයට මුළු රටම රන්ජන් පසුපස දිවයෑමට සැලැස්වීම නිසා සැබෑ ප්රශ්න පිළිබඳව රටේ ජනමාධ්යයෙන් වැඩිපුර කතාබහට ලක්වෙන්නේ නැත. කතා කළද ඒ ඉතාමත් අවම වශයෙනි. කෙසේ වෙතත් රටම රන්ජන්ගේ හඬපට ඔස්සේ දිවයද්දී ආණ්ඩුව පසුගිය සතියේදී එක්තරා විශේෂ වැඩකටයුත්තකට අතගැසුවේය. ඒ වැඩකටයුත්ත එසේ මෙසේ එකක් නොව ලෝකයම හෙල්ලී යන වැඩකටයුත්තකි. එනම් ඇමෙරිකානු ජනාධිපති ඩොනල්ඞ් ට්රම්ප් මහතා ලංකාවට ගෙන්වා ගැනීමේ මෙහෙයුමටය.
ආණ්ඩුව ට්රම්ප්ව ලංකාවට ගෙන්වා ගැනීමට උත්සාහ කරන්නේ ලබන ජනවාරියේ ට්රම්ප් සිදුකිරීමට නියමිත ඉන්දියානු සංචාරය අතරතුරදීය. ලබන පෙබරවාරි 24, 25 යන දිනවල ට්රම්ප් ඉන්දියාවට පැමිණ ඉන්දීය අගමැති නරේන්ද්ර මෝඩි හමුවීමට නියමිත අතර, එම ගමනේදී පැය තුන හතරකට හෝ ට්රම්ප්ව ලංකාවට ගෙන්වා ගැනීම ආණ්ඩුවේ උත්සාහය වී තිබේ. ලංකා ඉතිහාසයේ මෙතෙක් බලයේ සිටි ඇමෙරිකානු ජනාධිපතිවරයකු සිය නිල කාලය තුළ ලංකාවට පැමිණ නොමැති අතර, 2016 දී ඇමෙරිකානු ජනාධිපති බැරැක් ඔබාමා ලංකාවට පැමිණීමට නියමිතව තිබුණද සිය ආසියානු සංචාරය අතරතුරදී ලංකාවේ වෙසක් සතිය යෙදී තිබීම හේතුකොටගෙන ඔබාමාගේ ලංකා ගමන අවලංගු වී තිබිණ. ඒ අනුව මෙවර ආණ්ඩුව සැරසෙන්නේ කෙසේ හෝ ට්රම්ප්ව ලංකාවට ගෙන්වාගෙන දේශපාලන ඉතිහාසය අලුතෙන් ලියවන්නටය.
පසුගිය සතියේ සිදුකෙරුණු ඇමෙරිකාවේ දකුණු හා මාධ්යම ආසියානු කලාප භාර නියෝජ්ය රාජ්ය ලේකම්වරිය වූ ඇලිස් ජේ. වෙල්ස් මහත්මියගේ සංචාරය අතරතුරදීද ආණ්ඩුව මෙම මාතෘකාව පිළිබඳව වටින් ගොඩින් කතාබහ කර තිබූ බව ආරංචිය. විශේෂයෙන්ම මේ දිනවල ඇමෙරිකාව ලංකාව කෙරෙහි විශාල උනන්දුවක් දක්වන අතර, ඊට හේතු කිහිපයක් බලපා ඇති ආකාරයක් දැකගන්නට ඇත. ඉන් පළමුවැන්න එම්.සී.සී. ගිවිසුමය. දෙවැන්න මේ වන විට ඉරානය හා ඇමෙරිකාව අතර මෝදුවෙමින් පවතින යුද උණුසුමය. තුන්වැන්න ආසියානු කලාපය තුළ සහ ලංකාව මුල්කරගෙන චීන රජය කරන බලපෑමය. ශ්රී ලංකාවේ පිහිටීම අතින් ගත් කල මෙම කරුණු තුනටම ලංකාව පොදු කරුණක් බවට පත්ව තිබීම නිසා වෙල්ස්ගේ සංචාරය අතරතුරදී මේ සම්බන්ධයෙන් සාකච්ඡා කිරීමට ඔවුන් විශාල උනන්දුවක් දැක්වූ බවක්ද දැකගන්නට තිබිණි.
මේ නිසාම ආණ්ඩුව උත්සාහ කරන්නේ ඇමෙරිකානු රජය තුළ ඇති එම උනන්දුව උපයෝගි කරගෙන කෙසේ හෝ ට්රම්ප්ව පැය කිහිපයකට හෝ ලංකාවට ගෙන්වා ගැනීමටය. ඒ හරහා ආර්ථික, සංචාරක හා ආරක්ෂාව සම්බන්ධයෙන් ලෝකයට යම් පණිවුඩයක් ලබාදීම ආණ්ඩුවේ අරමුණ වී තිබේ. ඒ අනුව පසුගිය සතියේ සිටම ආණ්ඩුව විවිධ පාර්ශ්ව හරහා මෙම අරමුණ සාර්ථක කර ගැනීමට විශාල මෙහෙයුමක් ආරම්භ කර ඇති ආකාරයක් දැකගන්නට තිබේ. දැනට ට්රම්ප්ගේ ලංකා සංචාරය සියයට පනහ පනහ මට්ටමේ පවතින ආකාරයක්ද ‘රාජ්ය රහස්‘ තීරයට ආරංචිය.
කපිල පුංචිමාන්නගේ
