තානාපති මහින්ද සමරසිංහ මහතාගේ මගපෙන්වීම යටතේ, HEART TO HEART INTERNATIONAL ආයතනය තුන්වැනි වරටත් ශ්රී ලංකාවේ ජනතාව වෙත අත්යාවශ්ය වෛද්ය ආධාර තොගයක් යැවීම සඳහා අවශ්ය සියලුම රජයේ අනුමැතිය ලබාගෙන ඇති අතර, එහි වටිනාකම ආසන්න වශයෙන් ඇ.ඩො. 7,270,756.31 (රු. බිලියන 2.7) ක් වේ. නවතම පරිත්යාගයට අධි රුධිර පීඩනය සහ අනෙකුත් හෘද රෝගවලට ප්රතිකාර කිරීම සඳහා වූ Propranolol Hydrochloride සහ Labetalol HCL සහ ශරීරයේ අඩු පොටෑසියම් මට්ටමට ප්රතිකාර කිරීම සඳහා වූ Potassium Chloride වැනි හදිසි ඖෂධ විශාල ප්රමාණයක් ඇතුළත් වන අතර අවපීඩනය, භින්නෝන්මාදය, බයිපෝල අක්රමිකතා වැනි ඇතැම් මානසික තත්වයන්ට ප්රතිකාර කිරීම සඳහා Quetiapine Fumarate ද, රුධිරයේ අධික යූරික් අම්ල මට්ටම අඩු කිරීමට සහ රක්තවාතය (ආතරයිටිස් ආකාරයක්) වැළැක්වීමට Allopurinol ද ඇතුලත් වේ.
වොෂින්ටන් ඩීසී හි ශ්රී ලංකා තානාපති කාර්යාලය, මෙම තීරණාත්මක අවස්ථාවේ දී ශ්රී ලංකාවාසී ජනතාව කෙරෙහි දක්වන ලද පරිත්යාගශීලීත්වය වෙනුවෙන් HEART TO HEART INTERNATIONAL වෙත සිය කෘතඥතාව පළ කරන ලදී. ශ්රී ලංකාවේ සෞඛ්ය අමාත්යාංශය සහ මෙම තානාපති කාර්යාලය සම්බන්ධීකරණයෙන්, තෙවැනි ඖෂධ පරිත්යාගය 2022 දෙසැම්බර් 29වැනි දින ගුවනින් කොළඹට ළඟා වීමට නියමිතය. පෙර පරිත්යාගවලදී පරිදිම, මේ සම්බන්ධ සියලු වියදම් HEART TO HEART INTERNATIONAL විසින් දරනු ලබන අතර ශ්රී ලංකාවට කිසිදු වියදමකින් තොරව ජනතාව වෙත කඩිනමින් බෙදා හැරීම සඳහා සෞඛ්ය අමාත්යාංශය විසින් මෙම පරිත්යාගය භාරගනු ඇත.
මේ වන විට HEART TO HEART INTERNATIONAL ආයතනය විසින් ශ්රී ලාංකේය ජනතාව වෙත ලබා දුන් මුළු පරිත්යාගවල වටිනාකම දළ වශයෙන් ඇ.ඩො. 19,915,909.38 වේ. (රු. බිලියන 7.4)
කන්සාස් ප්රාන්තයේ ලෙනෙක්සා හි මූලස්ථානය පිහිටි HEART TO HEART INTERNATIONAL (HHI) ආයතනය, සෞඛ්යය ප්රවේශය වැඩිදියුණු කිරීම කෙරෙහි අවධානය යොමු කළ ගෝලීය මානුෂීය සංවිධානයකි. 1992 ආරම්භයේ සිට, HHI ආයතනය එක්සත් ජනපදය ඇතුළුව රටවල් 130 කට වැඩි ගණනකට ඩොලර් බිලියන 2.5 ක් වටිනා වෛද්ය ආධාර සහ සැපයුම් ලබා දී ඇත. මෙම ආයතනය දේශීය හා ජාත්යන්තර වශයෙන් ස්වභාවික විපත්වලදී, වෛද්ය සහන සැපයීමෙන් සහ ස්වේච්ඡා සේවකයන් බලගැන්වීම මගින් ප්රතිචාර දක්වා ඇත. මෙම සංවිධානය තරු 4 පුණ්යායතනයක් මෙන්ම BBB ප්රතීතනය ලත් පුණ්යායතනයක්ද වන අතර එය “Philanthropy 400” හිද ඇතුලත් ආයතනයකි.
