‘පුංචි තිරයේ මහා කලා මංගල්යය’ ලෙස හඳුන්වනු ලබන සුමති සම්මාන උළෙල 2023 පෙබරවාරි 09 වැනි බ්රහස්පතින්දා දින බත්තරමුල්ල, වෝටර්ස් එජ් හෝටල් පරිශ්රයේදී මෙවරත් අති උත්කර්ෂවත් අන්දමින් පැවැත්වීමට සියලු කටයුතු සූදානම් කර තිබේ.
පසුගිය වසර දෙක තුළ රටේ උද්ගත වූ සමාජ, දේශපාලන සහ ආර්ථික ගැටලු හේතුවෙන් 2020 සහ 2021 වර්ෂවලදී සුමති සම්මාන උලෙළ නොපැවැත්වුණු අතර, එම වර්ෂ දෙකටම අදාළ නිර්මාණයන්ට දායක වූ කලාකරුවන්ට සහ නිර්මාණකරුවන්ට අසාධාරණයක් නොවන පරිදි මෙම වසරේදී ඔවුන් අගැයීමට සුමති සම්මාන සංවිධායක කමිටුව තීරණය කර තිබීම මෙවර සම්මාන උළෙලේ විශේෂත්වයකි. මෙම තීරණය ගනු ලැබුවේ ශ්රී ලාංකේය ටෙලිනාට්ය කලාව රැකගැනීමට කැපවෙමින් නිර්මාණකරණයේ නියැලෙන සියලු දෙනා අගැයීම සිය යුතුකමක් ලෙස සලකන බැවින් යැයි සුමති සම්මාන සංවිධායක කමිටුව සඳහන් කරයි.
ඒ අනුව මෙම වසරේදී 26 වැනි සුමති සම්මාන වෙනුවෙන් 2020 වර්ෂයේ රූපවාහිනී මාධ්යයෙන් විකාශය වූ නිර්මාණ සහ ඒවාට දායක වූ කලාකරුවන්ද, 27 වැනි සුමති සම්මාන වෙනුවෙන් 2021 වර්ෂයේ විකාශය වූ නිර්මාණ සහ ඒවාට දායක වූ කලාකරුවන්ද අගැයීමට ලක්කෙරෙනු ඇත.
සුමති සම්මාන උළෙල යනු ශ්රී ලාංකේය කලාකරුවන්ගේ රංගන ප්රතිභාවන් අගැයීම උදෙසා පමණක් නොව, රූපවාහිනී ක්ෂේත්රයේ නිර්මාණකරණයේ නියැලෙන සෑම නිර්මාණකරුවකුම තමන්ගේ නිර්මාණ උදෙසා අගැයීම් ලබාගැනීමට අපේක්ෂාවෙන් සිටින කලා මහෝත්සවයකි. රූපවාහිනී නිර්මාණකරණයේ සැබෑ විශිෂ්ටත්වය පැසසුමට ලක්කරමින් සුමති සම්මාන උළෙල 1995 වර්ෂයේ සිට වසර 25කට අධික කාලයක් පුරා අතිසාර්ථකවත්, අඛණ්ඩවත් පවත්වා ඇත.
