ආණ්ඩුවේ සහ විපක්ෂයේ මන්ත්රීවරුන් අන්තර්වාර ආණ්ඩුවකට සුදානම් නැතිනම් ආණ්ඩුව අතුරු ආණ්ඩුවකට ඉඩ දී ඉල්ලා අස්විය යුතු බව හෝ පාර්ලිමේන්තු මැතිවරණයකට යා යුතු බව හිටපු ජනාධිපතිනි චන්ද්රිකා බණ්ඩාරනායක කුමාරතුංග මහත්මිය අද ප්රකාශ කළාය.
ජනතා වරම තිබෙන තාක් ජනතා නියෝජිතයින්ට බලයේ සිටිය හැකි බවත්, ජනතාව ප්රතික්ෂේප කළ වහාම බලය අත්හැරීමට සූදානම් විය යුතු බවත් ඇය සමාජ මාධ්ය ඔස්සේ ප්රකාශයක් නිකුත් කරමින් කියා සිටියා.
“ජනතාව මහජන නියෝජිතයින්ට බලය ලබා දෙන්නේ ඔවුන්ගේ අපේක්ෂාවන් ඉටු කර ගැනීමටයි. ජනතාව ලබා දෙන බලය ජීවිත කාලයටම නොව තාවකාලික බව ඔවුන් තේරුම් ගත යුතුයි,” ඇය පැවසුවාය.
බෞද්ධ භික්ෂූන් වහන්සේලා, සිවිල් සමාජය සහ මහජනතාව ඇතුළු ආගමික නායකයින්ගේ දැඩි ආයාචනයට අවනත නොවී බලයේ රැඳී සිටීමට රජය ගන්නා පියවර තරයේ හෙළා දකින බව කුමාරතුංග මහත්මිය පැවසුවාය.
“සියලුම මහජන නියෝජිතයින්ගෙන් මම ඉල්ලා සිටින්නේ ජනතාවට සහ ඔවුන්ගේ අරමුණු අවංකව නියෝජනය කිරීමට නොහැකි නම්, පාර්ලිමේන්තු මන්ත්රී ධුරයෙන් ඉල්ලා අස්වීම වඩා ගෞරවනීය දෙයක්,” යැයි ඇය පැවසුවාය.
මේ මොහොතේ රජයට ඇත්තේ විකල්ප දෙකක් පමණක් බව කී ඇය, පළමුවැන්න ජනාධිපතිවරයා සහ ආණ්ඩුව ඉල්ලා අස්වී අන්තර්වාර ආණ්ඩුවක් හරහා දේශීය ආර්ථිකය ශක්තිමත් කර රට තුළ ස්ථාවර පාලනයක් ඇති කිරීම බවත්, දෙවැන්න ආණ්ඩුවේ සහ විපක්ෂයේ මන්ත්රීවරුන් ඊට සූදානම් නැතිනම් මැතිවරණයක් පවත්වා ස්ථාවර ආණ්ඩුවක් පිහිටුවිය යුතු බවත් පෙන්වා දුන්නාය.
