පුටින්ට ඇඩ්‍රස් නැතිවෙයි! ලොව දැවැන්ත සමාගම් පොකුරු පිටින් රුසියාවෙන් ඉවත් වෙයි!

යුක්රේනයට එරෙහිව රුසියානු ආක්‍රමණය අමානුෂික ක්‍රියාවක් බව සඳහන් කරමින් ලෝකයේ දැවැන්ත ගෝලීය සමාගම් රාශියක් රුසියාව වෙත සිය ව්‍යාපාර කටයුතු සම්පූර්ණයෙන් නතර කරන්න තීරණය කරලා තියනවා.

ඒ සමාගම් අතරට එකතු වූ අළුත්ම සමාගම් දෙක වෙන්නේ මැක්ඩොනල්ඩ් සහ කොකාකෝලා සමාගම්.

මැක්ඩොනල්ඩ් ආයතනය රුසියාව පුරා පිහිටුවා ඇති සිය වෙලඳසැල් 850 පමණ දින නියමයක් නොමැතිව සම්පූර්ණයෙන්ම වසා දමන්න තීරණය කරා.

ඒ වගේම කොකාකෝලා ආයතනයත් රුසියාවේ තම මෙහෙයුම් සම්පූර්ණයෙන්ම නතර කරා. එය ඔවුන්ගේ ගෝලීය මෙහෙයුම් ආදායමෙන් 2% පමණ කොටසක්.

ඊට අමතරව තවත් ආයතන රාශ්‍රියක් මේ වෙනකොට රුසියාව සිය වෙලඳාමෙන් ඉවත් කරලා තියනවා. Starbuck කොෆි ආයතනය රුසියාව පුරා සිය වෙලඳ සැල් 100 කට වැඩි ප්‍රමාණයක් සම්පූර්ණයෙන් වහලා දානවා.

කොකාකෝලා ආයතනයේ තරඟකාරී ආයතනය වන පෙප්සි සමාගමත් රුසියාවේ සිය වෙලඳ මෙහෙයුම් නතර කරන්න තීරණය කරලා’

යුනිලිවර් ආයතනයත් මාමයිට්, ඩව් ඇතුළු සිය වෙලඳනාම රැසක් රුසියාවේ අලවි කිරීම නතර කලා.

ඒ වගේම රුසියාවේ සිදුකරන ප්‍රචාරක වියදම් අත්හිටුවන්නත් ඔවුන් තීරණය කරා. ඒත් අත්‍යවශ්‍ය භාන්ඩ හි සනීපාරක්ෂක ද්‍රව්‍ය විකිණීම දිගටම කරනවා කියලා ඔවුන් කියනවා.

Netflix සමාගමද රුසියාවේ සිදුකරමින් පැවති සියළුම සිනමා නිශ්පාදන කටයුතු නතරකර දැමීමට තීරණය කර තිබෙනවා.

ඊට අමතරව රුසියාවට අයිතිය හිමි ආයතනයන් හී විකාශන කටයුතුද නතර කිරීමටයි ඔවුන් තීරණය කර ඇත්තේ.

තවද ලොව විශාලතම සිනමා සමාගම් වන WB,Sony සහ Universal යන සමාගම් සිය චිත්‍රපට රුසියාවේ ප්‍රදර්ශනය කිරීම නතරකරනු ලැබුවා.

මීට අමතරව ලොව සුප්‍රසිද්ධ විලාසිතා සමාගම් වන Levi’s , Nike, H&M ඇතුළු සමාගම් ගණනාවක්ද රුසියාවේ සිය ව්‍යාපාර කටයුතු අත්හිටුවන බව නිවේදනය කලා.

තවද ලොව විශාලතම රූපලාවණ්‍ය උපකරණ නිශ්පාදන සමාගම වන L’Oreal සමාගම ද රුසියාවේ සිය වෙලඳසැල් සහ බෙදාහැරීම්‍ නතර කර තිබෙනවා.

යුක්රේන ආක්‍රමණයට එරෙහිව රුසියාවේ ව්‍යාපාර නවතා දැමූ සමාගම් අතරට ලොව විශාලතම තාක්ෂණික සමාගම වන Apple සමාගමද එක්ව සිටිනවා.

ඇපල් නිශ්පාදනයන්ට අමතරව Apple pay, Apple map වැනි සේවාවන්ද රුසියාව තුල සීමා කිරීමට ඔවුන් පියවර ගෙන තිබෙනවා.

ගූගල් සමාගමද රුසියානු රාජ්‍ය රූපවාහිනී නාලිකාවන්ට අයත් තොරතුරු ගූගල් අවකාශයෙන් ඉවත් කරන්න කටයුතු කරලා තියනවා.

ඒ වගේම ලොව ප්‍රධානම ගුවන් යානා නිශ්පාදන සමාගම් වන එයර් බස් සමාගම සහ බෝයිං සමාගම රුසියාවේ ගුවන් සේවා කර්මාන්තයට අවශ්‍ය අමතර කොටස් සැපයීම නතර කරලා තියනවා.

ඒ වගේම සමාගම් ද්විත්වයම රුසියාවේ පිහිටි සිය සේවා මාධ්‍යස්ථාන දෙකත් තාවකාලිකව වසා දමන්න තීරණය කරා.

ලොව ප්‍රධානම තෙල් සමාගම් ලෙස සැලකෙන BP, Shell, Equinor වගේම Exxonmobil යන සමාගම් සියල්ල රුසියාව සමඟ පවතින සිය වෙලඳ හා ව්‍යාපාරික සබඳතා සියල්ල අත්හැර දමන්‍න තීරණය කලා.

ඒ වගේම ලොව ප්‍රධානතම මොටර් රථ නිශ්පාදන සමාගම් කිහිපයකුත් මේ වන විට රුසියාවේ සිය ව්‍යාපාර කටයුතු නතර කරන්න පියවර අරන් තියනවා.

මේ විදියට දිනපතා ආයතන සහ සමාගම් රැසක් රුසියාවේ සිය ව්‍යාපාරික කටයුතු නතර කර දමනවා.

ප්‍රධාන වශයෙන් රුසියාවෙන් ඉවත් වන ලෙස සමාජ මාධ්‍ය හරහා එම සමාගම්වලට එන බලපෑමත් මෙයට විශාල හේතුවක් ලෙස මාධ්‍ය වාර්තා කරනවා.

මම තිලාන් ජයසේකර

බ්‍රිතාන්‍යයේ ලන්ඩන් නුවර සිට