අගමැතියි විපක්ෂ නායකයි එපා කියද්දීත් මන්ත්‍රීවරුන්ගේ වැටුප් වැඩි කරගනී!

එළඹෙන අප්‍රේල් 1 වනදා සිට බ්‍රිතාන්‍ය පාර්ලිමේන්තු මන්ත්‍රීවරයෙකුගේ වාර්ෂික වැටුප පවුම් 2,212 කින් ඉහළ දැමීමට තීරණය කර ඇත.

ඒ අනුව බ්‍රිතාන්‍ය පාර්ලිමේන්තු මන්ත්‍රිවරයෙකුගේ වාර්ෂික වැටුප බ්‍රිතාන්‍ය පවුම් 84,144 ක් දක්වා ඉහළ යනු ඇත.

කොරෝනා වසංගතය හේතුවෙන් පසුගිය වසර දෙක තුළ මන්ත්‍රීවරුන්ගේ වැටුප් ඉහළ දැමීම නතර කර තිබුණි.

සෑම වසරක අප්‍රේල් 1 වෙනිදා බ්‍රිතාන්‍යයේ සාමාන්‍ය වැටුප් මට්ටම් ඉහළ දැමෙන අතර ඒ අනුව යමින් බ්‍රිතාන්‍ය පාර්ලිමේන්තු මන්ත්‍රීවරුන්ගේද වැටුප මෙලෙස 2.7%කින් ඉහළ දැමීමට තීරණය කර තිබේ.

කෙසේ වෙතත් අග්‍රාමාත්‍ය බොරිස් ජොන්සන් සහ විපක්ෂ නායක ශ්‍රීමත් කීර් ස්ටාමර් යන දෙදෙනාම පවසා ඇත්තේ මේ වසරේ පාර්ලිමේන්තු මන්ත්‍රීවරුන්ට වැටුප් වැඩිවීමක් අනවශ්‍ය බවයි.

එහෙත් මන්තීවරුන්ගේ වැටුප් නියම කරන ස්වාධීන ආයතනය ප්‍රකාශ කරන්නේ අනෙකුත් රාජ්‍ය අංශයේ සේවකයන්ට අනුකූලව එම වැඩිවීම ලබාදිය යුතු බවයි.

2011 වසරේ සිට බ්‍රිතාන්‍ය පාර්ලිමේන්තු මන්ත්‍රීවරුන්ගේ වැටුප තීරණය කරනු ලබන්නේ ‘ස්වාධීන පාර්ලිමේන්තු ප්‍රමිති අධිකාරිය’ (IPSA) නැමති ස්වාධීන ආයතනයත් විසිනි.

බ්‍රිතාන්‍යයේ පාර්ලිමේන්තු මන්ත්‍රීවරයෙකුට සිය වැටුපට අමතරව කාර්‍ය්ලයක් හා සේවක මණ්ඩලයක් නඩත්තු කිරීම වෙනුවෙන් වන පිරිවැය ප්‍රතිපූරණය කරගත හැකි අතර ලන්ඩන් නුවර හෝ තමන්ගේ මැතිවරණ කොඨාසයේ ජීවත් වීම සඳහා නිවසක් කුලියට ගැනීමට වන වියදම් ලබා දෙනු ලැබේ.

ඊට අමතරව එම නිවස හා පාර්ලිමේන්තුව අතර ගමන් කිරීමට වන වියදම්ද ප්‍රතිපූරණය කරනු ලැබේ.

සෑම මන්ත්‍රීවරයෙකු වාර්ශික තැපැල් දීමනාවකටද හිමිකම් කියයි.

තවද පාර්ලිමේන්තු මන්ත්‍රීවරයෙකුට අමතරව වෙනත් තනතුරු දරණ පුද්ගලයෙකුට මන්ත්‍රී වැටුපට අමතරව එම තනතුර වෙනුවෙන් වෙනම වැටුප් හා වරප්‍රසාද හිමිව තිබේ.

ඒ අනුව යමින් බ්‍රිතාන්‍ය අග්‍රාමාත්‍ය බොරිස් ජොන්සන් මන්ත්‍රී වැටුපට අමතරව වාර්ෂිකව £75,440 වැටුපකට හිමිකම් කියයි.

කැබිනට් අමාත්‍යවරයෙකු අමතරව £67,505 වැටුපක් ද වෙනත් අමාත්‍යවරයෙකු වාර්ෂිකව £31,680 වැටුපකටද හිමිකම් කියයි.

තිලාන් ජයසේකර

බ්‍රිතාන්‍යයේ ලන්ඩන් නුවර සිට