රඟපෑම වෙනුවෙන් වෙනස් වුණු නිළිය

ගමේකමට, අපේකමට පුංචි තිරය හැඩ කරන සුරූපී රංගන ශිල්පිනියක් වන දිලිනි ලක්මාලි රංගන ක්‍ෂේත්‍රයෙන් සමුගෙන යනවා කියලා අපට ආරංචි වුණා. මේ කතාවේ ඇත්ත සොයා ඔබට කියන්න අපි ඇයට කතා කළා.

දිලිනි ලක්මාලි රංගනයෙන් සමුගෙන යනවා කියලා අපට ආරංචියක් ආවා. ඇත්තද මේ කතාව?
මගේ වෘත්තිය රංගන ජීවිතයයි. දිලිනි ලක්මාලි බිහිවුණේ රංගනය හරහා. ඉතින් මට ආදරය කරන ප්‍රේක්‍ෂකයන්ව මම අතරමං කරන්නේ නැහැ. මටත් දුරකතන ඇමතුම් ආවා දිලිනි ඔයා රඟපෑමෙන් ඉවත් වෙලාද කියලා. මට හිතාගන්න බැහැ කවුරු මේ වගේ බොරු කටකතා පතුරුවනවද කියලා. එහෙමත් නැතිනම් මම නිතර දෙවේලේ දකින්න නැති නිසා එහෙම හිතුවද කියන්න මම දන්නෙනැහැ. ඒ කොහොම වුණත් මම මගේ රංගන වෘත්තියෙන් සමුගන්නේ නැහැ.
පසුගිය දවස්වල බයිසිකල් පදින්න පුරුදු වුණාලු නේද? අයෝමා වෙනුවෙන්?
අයෝමා චරිතය වෙනුවෙන් මම ගොඩාක් කැපවුණා. මට පුළුවන් උපරිම විදියට මම අයෝමා චරිතය නිරූපණය කළා. මම හිතනවා හේළංකඩ ටෙලිනාට්‍යයට මම සාධාරණයක් කරන්න ඇති කියලා ලැබුණු ප්‍රතිචාරත් එක්ක. දැන් ටෙලිනාට්‍ය විකාශය වෙලා ඉවරයි. තවමත් මඟතොටදී හමුවන අය අයෝමා විදියට තමයි මාව දකින්නේ.
අපි කාලයක් තිස්සේ ඔබව දකින්නේ එකම චරිතයකින්. සමහර විට අපට හිතෙනවා ඔබ කොටුකරගෙනද කියලා. ඒ ගැන කතා කළොත් දිලිනි?
ඇත්තටම මමත් අකැමැතියි චරිතවලට කොටුවෙන්න. තවම මට එයින් මිදෙන්න බැරි වුණා. රංගන ශිල්පිනියක් විදියට එය අපට වන අසාධාරණයක්. විවිධ චරිත කරන්න අපිත් කැමැතියි. ගැමි චරිත රඟපෑවට ඒ චරිතවල වෙනස් දෙයක් කරන්න තියෙනවා. නමුත් ප්‍රේක්‍ෂකයන් බලන්නේ අපි එකම රාමුවක රඟපානවා කියලා. සමහරවිට මගේ බාහිර ස්වරූපයත් මේ චරිතවල බලපාන්න ඇති. ඉදිරියේදීවත් මාව වෙනස් චරිතවලට තෝරා ගන්නවා නම් මම කැමැතියි. මම වෘත්තීය ශිල්පිනියක් නිසා චරිත තෝරා බේරාගෙන රඟපාන්නත් බැහැ.
අයෝමා චරිතයට වඩා මම හිතන විදියට රම්‍යලතාට ගොඩදෙනෙක් ආදරය කරන්න ඇති?
මම රඟපාන හැම චරිතයක්ම මට විශේෂයි. ගමේ කතාවලට කොටු වුණු එකයි ප්‍රශ්නය. රම්‍යලතා නිරූපණය කිරීමට මට සුමිත් රත්නායක අයියා තමයි ආරාධනා කළේ. ඒ ඔහුගේ “මද්දහන” ටෙලි නාට්‍යයට. මද්දහන ටෙලිනාට්‍ය පිටපත සුවිශේෂී පිටපතක් විදියට මම අගය කරනවා.
ඔබගේ බාහිර ස්වරූපය පවා වෙනස් කළේ ඉදිරියේදී විවිධ චරිත සඳහා පහසුවටද?
ගොඩාක් දුරට එහෙම හිතලා තමයි මම මගේ කොණ්ඩය පවා කැපුවේ. ගොඩදෙනෙක් මාව හඳුනන්නේ කොණ්ඬේ දිග නිළිය විදියටයි. කොණ්ඬේ දිග වැඩි නිසා සමහර චරිත කරන්න පවා අපහසුතාවක් තිබුණා. ඒත් දැන් මට කිසි අවුලක් නැහැ. විවිධ චරිත රඟපාන්න පුළුවන් විදියට මම මගේ කොණ්ඩය පවා වෙනස් කළා.
තවම අපට දිලිනිව සිනමා නිර්මාණයකින් දැකගන්න ලැබුණේ නැහැ. මොකද සිනමාවට කැමැති නැද්ද?
සිනමාවට කවුද අකැමැති. එය මේ ක්‍ෂේත්‍රයට සම්බන්ධ හැම ශිල්පියෙක්ගේ එකම සිහිනයක්. මගෙත් ඒ කාලේ ඉඳල ලොකු ආසාවක් තිබුණා. චිත්‍රපටයකට සම්බන්ධ වෙන්න. හොඳ ආර්ට් ෆිල්ම් එකකට සම්බන්ධ වෙන්න ලොකු බලාපොරොත්තුවක් තියෙනවා.
ඔබ කලින් පැවසූ ආකාරය මේ ක්‍ෂේත්‍රයේ වෘත්තීය රංගන ශිල්පිනියක් විදියට කටයුතු කරන එක අපහසුයි කියලා හිතෙන්නෙ නැද්ද?
ගොඩාක් දෙනෙක් විවිධ මාර්ග තෝරාගෙන තියෙනවා රංගනය වෘත්තියක් විදියට කරන්න අපහසු නිසා. අවුරුදු 11ක් තිස්සේ ඉඳලම මම වෘත්තියක් විදියට මේ ක්‍ෂේත්‍රයේ රැඳිලා ඉන්නවා. බලමු ඉදිරියේදී සමහරවිට වෙනසක් වෙන්නත් පුළුවන්.
පෞද්ගලික ජීවිතය පැත්තෙන් කතා කළොත්?
ඉදිරි සැලසුම් ලොකුවට නැහැ. තවම විවාහය ගැනවත් මම හිතලා නැහැ. ජීවිතයේ පැවැත්මේදී විවිධ පාඩම් ඉගෙනගනිමින්, අභියෝගවලට මුහුණ දෙමින් ජීවිතය ජයගත්තා කියල තමයි හිතන්නේ. හැම දේම කාලයට භාර දීලා සතුටින් ජීවත් වෙන එක තමයි එකම සැලසුම.
වසන්ත විතාරණගේ