දූෂිත බවට අනාවරණය වූ චීන කාබනික පොහොර තොගය සම්බන්ධයෙන් මතුව ඇති ආරවුල අඩියක් පසුපසට ගෙන, එනම් වටිනාකමෙන් 75%ක් ගෙවා විසදා ගැනීමට රජය තීරණය කර තිබේ.
මුලින් මෙම පොහොර තොගයේ වටිනාකම ඩොලර් මිලියන 8 ඉක්මවන බව සදහන් වුවද ඇමෙරිකානු ඩොලර් මිලියන 6.7ක් ගෙවා එම ගැටලුව නිරාකරණය කර ගැනීම ආණ්ඩුවේ සැලසුම වී තිබේ.
එමෙන්ම එම සමාගමෙන්ම අලුත් තොග මිලදී ගැනීමට ද රජය තීරණය කර ඇති බව කෘෂිකර්ම අමාත්ය මහින්දානන්ද අලුත්ගමගේ මහතා සන්ඩේ ටයිම්ස් පුවත්පත වෙත පවසා ඇත.
“මෙම ප්රශ්නය සම්බන්ධයෙන් රාජ්ය තාන්ත්රික සබඳතා පළුදු කිරීමට අපට හැකියාවක් නැත,” අමාත්යවරයා පැවසීය.
වලංගු බලපත්රයක් නොමැතිව මෙම පොහොර තොගය නැව්ගත කළ බවට ශ්රී ලංකාව පවසන අතර, චීන සමාගම අවධාරණය කළේ ණයවර ලිපිය විවෘත කළ බැවින් නෞකාව මෙරටට පැමිණ ඇති බවයි.
මාසයකට වැඩි කාලයක් පැවති ආරවුල නිරාකරණය කර ගැනීම සඳහා නීතිපතිවරයාගේ උපදෙස් ලබාගෙන ඇති බවදඅමාත්යවරයා පැවසීය.
මෙට්රික් ටොන් එකක් ඇමෙරිකානු ඩොලර් 446ක මිලකට මිලදී ගැනීම සඳහා ඇණවුම කර ඇති බවත්, මේ වනවිට එම මිල ඇමෙරිකානු ඩොලර් 900කට වඩා ඉහළ ගොස් ඇති බවත්, එම නිසා ගිවිසුම අවලංගු කිරීම අධික පිරිවැයක් දැරීමට සිදුවන බවත් ඔහු පැවසීය.
අමාත්යවරයා කියා සිටියේ යෝජිත සමථය කැබිනට් අනුමැතිය සඳහා ඉදිරිපත් කරන බවයි.
