මරු කතා කියන හරි ටාසන්

මේ ඔබට අප කියන්නට යන්නේ එදා මහකැලේ ගස්වැල්වල එල්ලීගෙන වැඩ පෙන්වපු ටාසන් ගැන නම් නෙවෙයි. නමුත් ශ්‍රී ලංකාවේ රූපවාහිනිය සහ ගුවන්විදුලි වැඩසටහන් අතර ඉහළ නමක් දැරුව ටාසන් බාප්පා ගැන ඔබ අහලා තිබුණත් රුව දැකලා නැතිව ඇති. මොකද මේ ටාසන් හැංගි හැංගී තමයි වෙස් බඳින්නේ. ඉතින් ඒ ටාසන් බාප්පා චතුර විජේරත්න කියන නමින් ලංකාවේ පෙරළියක් ඇති කිරීමට සැරසෙන බවකුත් ආරංචි වුණා. හැබැයි ටාසන් බාප්පාට අපේ “හාට්” එකෙන් නම් ගැලවෙන්න බැරි වුණා.
ඉතින් කොහොමද ටාසන් බාප්පේ?
ටාසන් බාප්පා වෙනදාටත් වඩා සතුටින් ඉන්නවා. කෙටියෙන් කිව්වොත් ටාසන් බාප්පා නිසා චතුර විජේරත්න එයට ප්‍රතිචාර විඳිමින් ඉන්නවා.
චතුර විජේරත්න කිව්වාට ගොඩදෙනෙක් දන්නේ නැහැ නේද?
ඔව්. ඉතින් චතුර විජේරත්න විදියට නෙවෙයිනෙ මම එළියට ආවේ. මාව දැන හඳුනගත්තේ ටාසන් බාප්පා විදියට. ඉතින් මම උත්සාහ කරන්නේ චතුර විජේරත්න විදියට එළියට ඇවිත් යමක් කරන්නයි.
ටාසන් බාප්පා අත්තෙන් අත්තට පනින්න ගත්තේ කොයි කාලේද?
2006 වසරේ තමයි ටාසන් බාප්පා බිහිවුණේ. 2007 වසරේ ටාසන් බාප්පා ලෝකෙම ජනප්‍රිය වුණා. ඒ තරමටම ටාසන් බාප්පට ආදරය කළා.
හැබැයි ඔය කාල අතරතුර ටාසන් බාප්පලා බිහිවෙන ප්‍රමාණය වැඩිවීමත් එක්ක ලොකු තරගකාරිත්වයක් තිබුණා නේද?
මට එහෙම කිසිම තරගයක් තිබුණේ නැහැ. ඩුප්ලිකේට් ටාසන් බාප්පලා බිහිවුණු එකෙන් වුණේ ඔරිජිනල් ටාසන් බාප්පාට තිබුණු ඉල්ලුම තවත් වැඩි වුණා. එක අත්තකට පනින කොට තවත් වැලක් මට ශක්තියක් වුණා. රජ කරන ටාසන් බාප්පලාට රජ කරන්න දීලා මම එතැනින් ඉවත් වෙලා එළියට ආව.
එළියට පැනපු ටාසන්ගේ ගමන නතර වුණේ නැහැ නේද?
මම එළියට ආවා කියලා මගේ දොර වැහුණේ නැහැ. මම වෙනුවෙන් මාධ්‍ය ආයතනවල දොරවල් ගොඩාක් ඇරුණා. ඒ තරමට ටාසන් බාප්පාට තිබ්බ ඉල්ලුම වැඩියි. දැන් ඉතින් ටාසන් බාප්පා අයි.ටී.එන්. එෆ්.එම්. එකේ තමයි වැඩකටයුතු කරගෙන යන්නෙ. මාධ්‍ය ආයතන කිහිපයක අත්දැකීම් ගොඩාක් මට ලබා ගන්න ලැබීමත් සතුටට කරුණක් තමයි ඉතින්.
ටාසන් බාප්පා තැනින් තැනට මාරුවෙන කොට තිබුණු ඉල්ලුම අඩුවුණාද?
ප්‍රේක්‍ෂකයන් ආදරය කළේ ටාසන් බාප්පාගේ චරිතයට විතරයි. නැතිව ඔවුන්ට අදාළ වුණේ නැහැ මම වැඩ කරන ආයතනය. මම ටාසන් චරිතය ශක්තිමත් චරිතයක් බවට බිහිකරලා ඉවරයි. ටාසන් කොතැනද අන්න එතැන මගේ ආදර ප්‍රේක්‍ෂකයන් මම එක්ක ඉන්නවා.
මෙවැනි ආකර්ෂණීය ඉදිරිපත් කිරීමක් හැමෝටම කරන්න බැහැ. කොහොමද ඔබ මේ චරිතය බිහිකළේ?
ටාසන් චරිතය හඬ තිබ්බ පළියකට ඇද කරගෙන කියෙව්වට බිහි කරන්න බැහැ. එහෙම කියපු ටාසන්ලා අද කෝ. මගේ හඬ රටාව අනුකරණයට ගිය ගොඩදෙනෙක්ට වැරදුණා. මෙයින් මගේ ජීවිතයට ගත්තු දේවල් ගොඩාක් තියෙනවා. මට හොඳට ගායනා කරන්න පුළුවන්. මම රටේ පහළ පන්තියේ ඉඳල ඉහළ පන්තියේ මිනිසුන්ව ආශ්‍රය කළා. මම මේ හඬ අවදිකළේ චිත්‍රයක් මවා ගන්න පුළුවන් විදියට. පූජ්‍ය පක්‍ෂය පවා මගේ හඬට ආදරය කළා. මම ගොඩනඟාගත්ත දේවල්වල ප්‍රතිඵල තමයි මේ.
ඔබ නිකුත් කළ සංයුක්ත තැටිවලින් ඔබටම ලොකු අසාධාරණයක් වුණා නේද?
මම ටාසන් බාප්පාව සංයුක්ත තැටියකට නඟන්න රන්සිළු ආයතනයේ රංජිත් ප්‍රේමලාල් මහතා මූලික වෙලා කටයුතු කළා. එහෙත් අවසානයේ වුණේ පාඩු විඳින්න තමයි. මොකද විවිධ සී.ඩී. ආයතනය මගේ සී.ඩී. කොපි ගහලා විකුණන්න පටන් ගත්ත නිසා. ඒකෙන් වුණේ විශාල පාඩුවක් ලබන්න විතරයි.
ටාසන් බාප්පා චරිතයෙන් ඇයි ඔබ එළියට ඒමට තවත් ප්‍රමාද?
මම එහෙම ආවොත් චරිතයට හානි වෙන්න පුළුවන්. ඒ නිසා මම කැමැති මගේ ප්‍රතිරූපය ජනතාව අතරට යන්න යමක් කරන්න තමයි. මම අයි.ටී.එන්. නාළිකාවෙන් ටාසන් බාප්පා නිර්මාණ කරනවා. හැබැයි ඒත් මාව අඳුරගන්න බැහැ කාටවත්. මගේ පෙනුම පවා වෙනස් කරලා තියෙන්නේ.
වසන්ත විතාරණගේ