රන්ජන් අයියා එක්ක සම්බන්ධකමක් නැහැ…
ඉන්න ගමන් මලුත් කඩනවා…
මනාලියක් ලෙසට හැඩවැඩ වී කටයුතු කළ ඇය කාලයත් එක්කම රංගන ශිල්පිනියක් බවට දැන් පත්වෙලා. ඇය මේ දවස්වල ‘කොළඹ ඉතාලියේ’ ‘සඳා’ ලෙසින් ඔබ හමුවට එනවා. දඟකාර, කටකාර චරිතයක් වන ‘සඳා’ට ඔබ එතරම් කැමැත්තක් නැති බව අපි දන්නවා. ඉතින් එහෙම වුණේ ඇයි දැයි කියා දැනගැනීමට අමා විජේසූරියට අපි කතා කළා.
මනාලියක් ලෙස හැඩවැඩ දාපු අමායා අද ‘සඳා’ ලෙසට පත්වෙලා. ඉතින් කියමුකෝ බලන්න ඔබ ආපු ගමන ගැන?
මම නිරූපිකාවක් ලෙසට තමයි නිරූපණ ක්ෂේත්රයේ කටයුතු කළේ. ඉතින් ඔය ඉන්න අතරතුර එක්තරා කාන්තා පුවත්පතකට මුල් පිටුවේ පෙනී සිටීමට මට අවස්ථාව ලැබුණා. ඉතින් ඒ පින්තූරය දැකලා තමයි මට ‘පිනි’ ටෙලිනාට්යයට සම්බන්ධ වීමට අවස්ථාව ලැබුණේ. ඉන්පසු විවිධ නිර්මාණවල පොඩි පොඩි චරිත කළා. ඉතින් එදා හෙමින් ආපු ගමන මම ‘කොළඹ ඉතාලියේ’ ‘සඳා’ ලෙසින් ජීවත් වෙනවා.
‘සඳා’ මේ දවස්වල ‘ගුරු ගීතය’ නවකතාවට පෙම්බඳිනවා නේද?
ඒක නවතකාවක් කියලා නැහැ, මම නවකතා පොත් ගොඩාක් කියවලා තියෙනවා. මේ දවස්වල ‘ගුරු ගීතය’ නවකතාව තමයි මම කියවන්නේ.
‘සඳා’ට එතරම් ප්රේක්ෂකයන් කැමැත්තක් නැහැ නේද?
අම්මෝ ඔව්… ගොඩදෙනෙක් මට බනිනවා. ආච්චි අම්මා එක්ක රණ්ඩු වෙන නිසා. ‘සඳා’ට වඩා ආච්චි අම්මාට ප්රේක්ෂකයෝ ගොඩාක් ආදරෙයි වගෙයි මට හිතෙන්නේ.
ඔබත් සාමාන්ය ජීවිතයෙත් දඟකාර චරිතයක් නේද?
‘සඳා’ චරිතය මගේ ජීවිතයට සමානකම් තිබෙනවා. මමත් ටිකක් ඒ වගේම දඟකාර කෙනෙක්.
සාමාන්ය ජීවිතයේදී ඔබ නවකතා කියනවාද?
පාසල් කාලයේ නම් නවකතා බැලුවා. ඒත් මගේ දැන් තිබෙන කාර්යබහුලත්වයත් එක්ක ඇත්තටම පොතක් බලන්න තරම් මට වෙලාවක් නැති තරම්.
පොතපතට වෙලාවක් නැතිවුණත් ජංගම දුරකතනය අතේ නැති වේලාවක් නැහැ නේද?
ඔව්… ඉතින් මේ දවස්වල බිස්නස් වැඩකටයුතු online හරහා සිදුකරන නිසා මට ෆෝන් එකේම ඉන්නවෙලා. හැබැයි ඉතින් ඔය අතර මලුත් කඩනවා.
අපිට නොකියන ඒ මල්සරා කවුද?
ඔහු ගැන මම දැන්ම කියන්න කැමැති නැහැ. පසුකාලීනව එය ගැන කතා කරමු. ඒ ගැන කතා කරන්න සුදුසු කාලය නෙවේ. හැබැයි ඔහු මගේ වැඩවලට දෙන සප්එක වගේම මාව විශ්වාස කරන එක හැමදේටම වඩා වටිනවා.
රංජන් රාමනායක සමග තිබුණු සම්බන්ධය මොකක්ද?
එහෙම විශේෂ සම්බන්ධයක් නැහැ. ඔහු සමග මට රඟපෑමට අවස්ථාවක් ලැබුණා එක්තරා චිත්රපටයක. තවම එය තිරගත වුණේ නැහැ.
අද කාලේ ගොඩදෙනෙක් ජනප්රියතාවයත් එක්ක තමන්ගේ අනෙකුත් වැඩකටයුතු සාර්ථකකර ගැනීමට උත්සාහ කරනවා, ඔබත් එහෙමද?
මගේ බිස්නස් වැඩකටයුතු වැඩිදියුණු කර ගැනීමට මගේ රඟපෑම් කටයුතුවලින් ලැබෙන ප්රතිචාර ලොකු රුකුලක් වෙනවා. හැබැයි මගේ ජනප්රියතාවය වැරැදි කටයුතු සඳහා මම යොදවලා නැහැ කියලා මට කියන්න පුළුවන්. මගේ අනාගත දියුණුව වෙනුවෙන් තමයි මේ හැමදේම මට ලැබුණේ.
ඔබේ රඟපෑම් කටයුතු බිස්නස් වැඩත් එක්ක පහසුවෙන් කරගෙන යෑමට පුළුවන්ද?
අනිවාර්යයෙන් මගේ බිස්නස් වැඩත් එක්ක මගේ රංගන වෘත්තියේ වැඩකටයුතුත් ඉතාමත් පහසුවෙන් කරගෙන යන්න පුළුවන්.
අද ඉන්නා තැන සතුටුද? එහෙමත් නැතිනම් අසතුටුද?
මගේ මේ රඟපෑමත් එක්ක තමයි මගේ අනෙකුත් වැඩකටයුතු බාධාවක් නැතුව කරගෙන යන්න පුළුවන් වෙලා තියෙන්නේ.
-වසන්ත විතාරණගේ
