මේ වන විට දකුණු ඉන්දියානු කොලිවුඩ් සිනමාවද පවතින්නේ උතුරු ඉන්දියානු බොලිවුඩ් සිනමාවට කරට කර සමවන මට්ටමක. කොලිවුඩ් සිනමා තාරකාවන්ගේ මිල ගණන්ද දැන් බොලිවුඩ් සිනමා තාරකාවන්ගේ මට්ටමටම ඉහළ ගිහින් තියෙනවා.
ඒ බව තහවුරු කළ එක් සිදුවීමක් පසුගියදා වාර්තා වුණා. බොහෝ දෙනකු විමතියට පත් කළ ඉන් කියැවුණේ කොලිවුඩ් තාරකාවක් වන තලපති විජේ තෙලිඟු චිත්රපටයක රඟපෑම සඳහා ඉන්දියානු රුපියල් කෝටි 100ක් ඉල්ලා ඇති බවයි.
කොලිවුඩ් සිනමාවේ ජනප්රියම නළුවෙක් වන විජේ මීට පෙර තෙලිඟු චිත්රපටයක රඟපා නොතිබීමත් විශේෂත්වයක්.
විජේ රංගනයෙන් දායක වීමට නියමිත මේ තෙළිඟු චිත්රපටය අධ්යක්ෂණය කරන්නේ වම්සි පායිදීපලි විසින් කියලයි දැන ගන්න තියෙන්නේ. ඒ වගේම එහි නිෂ්පාදනය කරන්නේ දිල් රාජු විසින්.
ඉන්දියානු මාධ්ය අනාවරණය කරන විදියට දැනටමත් මේ තෙළිඟු චිත්රපටය සඳහා විජේ සහ නිෂ්පාදකවරයා අතර ගිවිසුම් අස්සන් කර අවසන්. ඒ වගේම ඒ සඳහා මේ වන විටත් ඉන්දියානු රුපියල් කෝටි 10ක මුදලක් අත්තිකාරම් වශයෙන් විජේට ගෙවන්නත් අධ්යක්ෂවරයා කටයුතු කරලා තියෙනවා.
කොහොම වුණත් මේ වෙද්දිත් විජේ කොලිවුඩ් නිර්මාණ කිහිපයක් සමඟම කාර්යබහුල වෙලයි ඉන්නේ. ඒ හින්දා තෙළිඟු චිත්රපටයේ වැඩ කටයුතු තවත් ටික කාලයක් ප්රමාද වන බවත් දැන ගන්න ලැබෙනවා. මේ වෙද්දි තලපති 65 චිත්රපටයේ රූගත කිරීම් සමඟ සම්බන්ධ වෙලා ඉන්න විජේ තෙළිඟු චිත්රපටය සමඟ සම්බන්ධ වීමට පෙර තවත් එක් කොලිවුඩ් චිත්රපටයක් සඳහා සම්බන්ධ වීමට නියමිත බවත් වාර්තා වෙනවා.
මේ අතරේ මේ තෙළිඟු සිනමාව එහෙම නැත්නම් ටොලිවුඩ් සිනමා සඳහා සම්බන්ධ වීමේදී විජේ මේ තරම් මුදලක් අය කිරීමත් දැඩි ආන්දෝලනයක තුඩු දීලා තියෙනවා.
තෙළිඟු චිත්රපටයක් සඳහා ඒ තරම් මුදලක් අය කිරීම ඉතාම අසාධාරණ බවට ඇතැම් පිරිස් අදහස් දක්වද්දී, කොලිවුඩ් සිනමාවේ විජේට ඇති ජනප්රියත්වය සහ කාර්යබහුත්වය මත එම මුදල සාධාරණ බවට පවසන පිරිස්ද දැක ගන්න පුළුවන්. කොහොම වුණත් මේ චිත්රපටයේ නිෂ්පාදකවරයාට ඒ අධික මුදල ඒ තරම් ප්රශ්නයක් නැති බව තමයි පේන්න තියෙන්නේ.
ඒ වගේම මෙහි නිෂ්පාදක දිල් රාජු මීට පෙරත් මෙවැනි ආකාරයේ අත්හදා බැලීම් තෙළිඟු සිනමාවට එක් කිරීමට උත්සාහ කරලා තියෙනවා. බොලිවුඩ් සිනමාවේ දැවැන්ත තාරකා යුගලයක් වූ ශ්රී දේවි සහ බොනී කපූර්ගේ දියණියක් වන කුෂී කපූර්ව තෙළිඟු සිනමා පටයක් සඳහා සම්බන්ධ කර ගැනීමටත් මීට පෙර දිල් රාජු උත්සාහ දැරුවා. සිනමා පවුලක තරුණියක් වුණත් කුෂි මේ දක්වා සිනමාවට එකතු වී නොතිබීමත් විශේෂ කාරණයක්.
දිල් රාජුගේ මේ උත්සාහයන් ටොලිවුඩ් සිනමාවේ උන්නතියට මොන විදියටද බලපාවිද කියන්න තවම කල් වේලා වැඩියි. ඒත් තලපති විජේ රංගනයෙන් දායක වන චිත්රපටය ටොලිවුඩයේ ආදායම් වාර්තා බිඳ දමනු ඇති බවට නම් කිසිදු සැකයක් නැහැ කියලයි විචාරකයන් කියන්නේ.
– චන්දන පොන්නම්පෙරුම
