වනජීවී සංරක්ෂණ දෙපාර්තමේන්තුව මඟින් පාලනය කරන ජාතික වනෝද්යාන තුළ පිහිටි කඳවුරු භූමියක රාත්රියක් ගත කරන්න අවශ්ය කරන මූලික සූදානම ගැන අපි පසුගිය සතියේ කැලෑ කොලමෙන් කතා කළානේ. කඳවුරු භූමියට ඇතුළු වුණාට පස්සේ කටයුතු කරන්නේ කොහොමද කියන එක ගැනයි අද අපි කතා කරන්න හදන්නේ.
අවශ්ය සියලුම දේවල් රැගෙන කඳවුරු භූමියට ගියාට පස්සේ අපේ කූඩාරම ඉදි කර ගන්නේ කොහෙද කියන එක රියැදුරු මහත්මා සහ වනජිවී නියාමක මහත්මා අපට පෙන්වනවා. සුදුසු ස්ථානය තෝර ගත්තට පස්සේ මුලින්ම කරන්න ඕනෑ ඒ අවට ශුද්ධ පවිත්ර කර ගන්න එක. මොකද ගන වනාන්තරයක සර්පයින්, පත්තෑයින් වැනි විවිධාකාර සත්වයින් සැරිසරනවා. ඒ හින්දා ඒ ආරක්ෂාවට අවට ශුද්ධ පවිත්ර කර ගැනීම හරිම වැදගත්.
ඒ හින්දා තමයි කඳවුරු භූමියට කල් තියා ගමන් කළ යුතුයි කියලා අපි ගිය සතියේ පැහැදිලි කළේ. තව දෙයක්. අපි රැගෙන ගිය ආහාර පාන පරිස්සම් කර ගැනීම ගැනත් හොඳ අවධානයකින් ඉන්න ඕනෑ. මොකද වඳුරන්, රිළව් වැනි සත්වයන්ගෙන් ඒවාට හානි වෙන්න පුළුවන්. ඒ හින්දා ඒ අවධානය කඳවුරු භූමියට ගිය වෙලාවේ ඉඳන් ආපසු පැමිණෙන තෙක්ම තබා ගත යුතුයි.
භූමිය ශුද්ධ පවිත්ර කර ගැනීමෙන් පස්සේ අපට නිසියාකාරව කඳවුර ඉදි කර ගන්න පුළුවන්. සුළඟට ඔරොත්තු දෙන ආකාරයෙන් නියම ක්රමයට එය ඉදි කිරීම අනිවාර්යයෙන්ම කළ යුත්තක්. රාත්රිය පුරා දල්වා තැබෙන ගිනිමැළ සඳහා අවශ්ය දර සොයා ගැනීම තමයි ඊළඟට කළ යුත්තේ. මේ වගේ ගන වනාන්තරයක අවම වශයෙන් ගිනිමැළ දෙකක්වත් දැල්වීම කළ යුතුයි. ගිනිමැළයක් අසලට කිසිම සත්වයෙක් ළඟා වෙන්නේ නැහැ.
සාමාන්යයෙන් කඳවුරු රාත්රියක් ගත කරන බොහෝ දෙනෙක් හවස පහ හය වෙද්දී ගිනිමැළ දල්වන්න කටයුතු කරනවා. නමුත් අපේ අත්දැකීම් අනුව ගිනිමැළ දැල්වීම රාත්රී 8, 9ත් අතර කාලයේදී සිදු කළ යුතු බව තමයි මගේ අදහස. මොකද එහෙම වුණාම උදෑසන වෙනකම්ම ගිනිමැළය දල්වා තබා ගැනීම පහසු වෙනවා. ඒ අතර කාලයේදී අපිට රාත්රී ආහාරය සකස් කර ගන්න පුළුවන්. එහිදී වැදගත්ම දේ තමයි පානීය ජලය කළමනාකරණය කර ගැනීම. නැවත වනාන්තරයෙන් පිටතට යනතුරු ගෙන ආ පානීය ජලය ඉතාම අරපිරිමැස්මෙන් භාවිතා කිරීම අත්යවශ්යයෙන්ම කළ යුත්තක්. කඳවුරු භූමිය තුළදී ආහාර සකස් කර ගැනීමත් අලුත් අත්දැකීමක්. එය කණ්ඩායමේ සියලු දෙනාම එකතුව සාමූහිකව කළ යුතුයි. ඒ වගේම තමයි අපි එවෙලේ ගන්න ආහාර එවෙලේම සකස් කර ගැනීමත් වැදගත්. මොකද ආහාර සකස් කර තබා යෑමෙන් සතුන්ගෙන් හානි වෙන්න පුළුවන්. අපි එක රාත්රියකට වඩා ගත කරනවා නම් තමයි ඒ උපදෙස වැදගත් වෙන්නේ. අපි ආහාර සකස් කර ගැනීමට යොදා ගන්නා උපකරණ අසල ජල ප්රවාහයෙන් පිරිසුදු කර ගන්න පුළුවන්. හැබැයි ආහාර සකස් කර ගැනීම සඳහා ගෙන ගිය සැමන් ටින්, බටර් කප් වැනි කිසිවක් පරිසරයට මුදා නොහරින්න වග බලා ගත යුතුමයි.
අපි මේ ඉන්නේ දුරකථන සංඥා නොමැති ළඟ පාත කාත් කවුරුවත් නැති මහා ගන වනාන්තරයක. අපි වචනයෙන් අහලා තියෙන කෑලි කැපිය හැකි අඳුර කියන දේ අත් විඳින්න ඔබට එහිදී අවස්ථාව ලැබෙනවා. අඳුර විනිවිද දැකිය හැකි විදුලි පන්දම් කිහිපයක් ළඟ තබා ගැනීමේ වැදගත්කම ඔබට දැනෙන්නේ අන්න ඒ වෙලාවට.
මේ රාත්රියේදී අපි පිළිපැදිය යුතු කරුණු ගණනාවක්ම තියෙනවා. අධික කෑ කෝ ගැසීම්වලින් තොරව කල් ගත කිරීම තමයි ඒ අතරින් ප්රධාන. නමුත් කණ්ඩායම සමඟ සතුටු සාමීචියේ යෙදෙමින් කාඞ් සෙල්ලම් වැනි දෙයක් කරන්න බාධාවක් නැහැ. කිසිම හේතුවකට අප සිටින වපසරියෙන් ඉවතට නොයෑම තමයි ඊළඟ කාරණය. නායකයාගේ වචනයට අවනත වන පිරිසක් සිටිය යුතුයි කියලා අපි මුලින්ම කිව්වේ ඒකයි. එහෙම නැතිව තමන්ගේ හිතුමනාපයට රාත්රී කාලයේ එහෙ මෙහෙ ඇවිදින්න හදන එක් අයෙකු හෝ හිටියොත් ඒක මුළු කණ්ඩායමටම ලොකු අනතුරක් වෙන්න පුළුවන්.
අපේ ජීවිත කාලයේදී මින් පෙර කිසිම දවසක අහලා නැති ශබ්ද රාශියක් මේ රාත්රියේදී ඔබට අහන්න ලැබෙනවා. සමහර විට ඒ ශබ්ද ඉතාම මිහිරි ඒවා වෙන්න පුළුවන්. සමහර විට ඒවා ඉතාම අමිහිරි ශබ්ද වෙන්නත් පුළුවන්. ඒ හින්දා එය දරා ගැනීමට හැකි මානසිකත්වයක් ඔබට තිබිය යුතුමයි. නමුත් ඒ ශබ්ද අසමින් ගත කරන රාත්රිය ඉතාම සුන්දර එකක් වන බවත් කිව යුතුමයි.
ඒ වගේම වන සතුන්ගේ චර්යා රටා අධ්යයනය කිරීමට සහා ඡායාරූප ගත කිරීමට මීට වඩා තවත් අවස්ථාවක් ඔබට ලැබෙන්නේ නැහැ. වැවක් හෝ ගංගාවක් අසල රාත්රිය ගත කළහොත් තමයි ඔබට මේ අත්දැකීම හොඳටම විඳින්න පුළුවන්. මොකද ඒ භූමියේ ඒ වෙලාවේ ඉන්නේ අපියි, වන සතුනුයි විතරයි. ඒ හින්දා වන සත්තු කිසිම බාධාවකින් තොරව කටයුතු කරන විදිය බොහොම අපූරුවට දැක බලා ගන්න පුළුවන්.
කඳවුරු රාත්රිය ගත කර ආපසු පැමිණීමේදී නැවත වරක් භූමිය පිරිසුදු කිරීම කළ යුතුමයි. ගිනිමැළ සම්පූර්ණයෙන්ම නිවා දමා නැවත පරීක්ෂා කළ යුතුයි. අප ගෙන ආ සියලු දේ නැවත රැගෙන යන්නේදැයි කිහිප වරක් පරීක්ෂා කළ යුතුයි. විශේෂයෙන්ම නොදිරන ද්රව්ය කිසිවක් ඒ භූමියේ දමා ඒම සිදු නොකළ යුත්තක්. අත්දැකීම් බහුල සංචාරකයන් අතින් එවැන්නක් සිදු නොවුණත්, ඇතැම් සංචාරකයන් අතින් එවැනි වැරැදි සිදුවන ආකාරය අප දැක තිබෙනවා. එවැනි දේ පිළිබඳව දැනුවත් කිරීමත් අපේ කැලෑ කොලමේ එක් අරමුණක්. වන සතුන් ගහන රූස්ස වනාන්තරයක රැයක් ගත කරමින් ජීවිතයට එක් වරක් පමණක් ලැබෙන අපූරු අත්දැකීමක් ලබා ගන්න අවශ්ය කරුණු මේ හරහා ලැබුණේ නම් අපේ අරමුණ සාර්ථකයි.
සමන් හල්ලොලුව
