හිතවත්කම්වලට රඟපාන්න දෙන්න බෑ…
සදුසුම කෙනාව තෝරගත්තේ…
චරිතාංග රංගන ශිල්පිනියක් ලෙසට කටයුතු කරමින් සම්මාන රැසක් හිමිකරගත්ත ජනප්රිය රංගන ශිල්පිනියක් තමයි දමයන්ති ෆොන්සේකා කියන්නේ. ඇය හෙළ සිනමා රැජනගේ ආදරණීය නැඟණියද වීම තවත් විශේෂත්වයක්. ඉතින් හැමදාමත් අප සමඟ ළෙන්ගතු ඒ ආදර බව සමඟ කතාබහ කිරීමට අප හිතුවා.
දමයන්ති අක්කේ මේ දවස්වල උදේ, හවස බුදුන් වැඳ ප්රාර්ථනා කරන්නේ මොනවද?
මේ කොරෝනා වසංගතයෙන් ලෝකයේම ජනතාව බේරා ගෙන කොරෝනා වසංගතය තුරන් වේවා කියලා තමයි. ලෝකෙම ජනතාව පීඩා විඳිනව මේ වසංගතයක් නිසා.
ඉතින් මේ දවස්වල වැඩකටයුතු කොහොමද?
පසුගිය කාලවකවානුවේ ගෙදරට වෙලා තමයි හිටියේ. ඒත් ටෙලිනාට්ය කරන්න සියලුම ශිල්පීන්ට නව රජයෙන් මේ වසංගතයත් එක්ක අවසර දුන්නු නිසා මේ දවස්වල ටෙලිනාට්යවල වැඩකටයුතුවලට සම්බන්ධ වෙලා ඉන්නවා. ‘නෑනලා’ ටෙලිනාට්යයේ සහ ‘සිහින ගෙනෙන කුමරියේ’ නිර්මාණ එක්ක තමයි මම මේ දවස්වල නිරතවෙලා ඉන්නේ.
මෙයට කලින් අපි නොදුටු වෙනස්ම රංගනයක් මේ දවස්වල අපි දකිනවා?
‘නෑනලා’ ටෙලිනාට්යයේ මගෙ චරිතය ගැන ගොඩදෙනෙක් කතාබහ වෙනවා. කටකාර වෙනස්ම චරිතයක්. ඒ වගේම කිහිලිකරුවෙන් රඟපාන පළමු අවස්ථාවද මෙයයි. එයත් මට අභියෝගයක්. ඒ විතරක් නෙවේ අපේ ගම් ප්රදේශයේ කීරේ විකුණන බක්කි කරත්තයක් හදාගෙන පාරවල් ගානේ යනවා කීරේ තියාගෙන. මම මේ චරිතය වෙනුවෙන් වෙනස්ම රංගන විලාසයක් එකතු කරගත්තා.
ඔබ රඟපෑමට අමතරව මේ ක්ෂේත්රයට සම්බන්ධ තවත් වෘත්තීන් කිහිපයක මූලිකවෙලා වැඩකටයුතු කරන බව අප දන්නවා. කොහොමද මේ සියල්ල ගළපගත්තේ?
කාලය කළමනාකාරිත්වය ඇතිව, සැලැසුමක් ඇතිව තමයි මම වැඩ කරන්නේ. අධ්යක්ෂණය, නළුවරණය, ඒ විතරක් නෙවේ මගේ රංග පාසලේ වැඩකටයුතුත් කරන අතරතුර තමයි රඟපෑම් කටයුතු කරන්නේ. කිසිම දෙයකට බාධාවක් නොවන විදියට වැඩකටයුතු කරනවා.
නළුවරණ කියන දේ බැරෑරුම් කර්තව්යයක් වෙන්න ඇති?
ඇත්තටම ඔව්. නිර්මාණවලට නළු නිළියන් සම්බන්ධ කිරීම පහසු දෙයක් නෙවේ. අධ්යක්ෂවරුන්ට අවශ්ය ශිල්පීන් ලබා දීම. සමහරු මම සමඟ හිත් අමනාපකම් වෙනවා. ඔවුන්ට අවස්ථාවක් දෙන්නෙ නැහැ කියලා. මෙය හිතවත්කමට අවස්ථාවන් දෙන්න බැහැ. චරිතයට ගැළපෙන සුදුසුම කෙනාට දීමට තමයි මම උත්සාහ කරන්නේ. ඒ ශිල්පියා ගැන මම සම්පූර්ණම වගකිවයුතුයි. ඔහුට ආරක්ෂාව පවා සැපැයිය යුතුයි.
ඉන්දියානු චිත්රපටයකටත් නළුවරණය තෝරා ගැනීමට අවස්ථාවක් ලැබුණා නේද?
ඔව්. ප්රධාන නළුනිළියන් ඉන්දියාවෙන් සම්බන්ධ කරගන්නේ. අනෙකුත් ශිල්පීන් ලංකාවෙන් තමයි තෝරා ගැනීමට සිදුවෙන්නේ. මෙහි විශේෂත්වයක් තමයි දමිළ භාෂාව කතාබහ කිරීමට හැකියාව තිබීම. අපේ රටේ දමිළ භාෂාව පුළුවන් දක්ෂ ශිල්පීන් ඉන්නවා. ලබන වසරේ මුල චිත්රපටයේ වැඩකටයුතු පටන් ගැනීමට සැලැසුම් කරගෙන යනවා. මනිරත්නම් තමයි චිත්රපටය අධ්යක්ෂණ කටයුතු කරන්නේ.
ඔබගේ කුලුඳුල් අධ්යක්ෂණයෙන් නිර්මාණය වුණු ‘ඉරගල නැකැත’ වැඩකටයුතු කොහොමද?
කොරෝනා ප්රශ්නය නිසා එහි රූපගත කිරීම් අවසන් කිරීමට නොහැකි වුණා. ජනවාරියේ රූපගත කිරීම් කටයුතු මම නැවැත පටන්ගන්නවා. එයත් බැරෑරුම් වැඩකටයුත්තක්. ඒ කාලවකවානුවේ ඉරගල නැකැත වෙනුවෙන්ම මම කැප වෙනවා.
ඔබගේ ආදරණීය සැමියා සුවිශේෂී සිනමා අධ්යක්ෂවරයෙක්. ඔහුගෙන් ලැබෙන සහාය කොයිවගේද ඔබගේ නිර්මාණවලට?
ඔහු තමයි ප්රසන්න විතානගේ. ගොඩදෙනෙක් දන්නවා ඔහු ගැන. ඔහු මට දීලා තිබෙන නිදහස වචනයකින් කියා නිම කරන්න බැහැ. ඔහුත් මට ගුරුවරයෙක්. ඒ වගේම මම මේ ක්ෂේත්රයේ ගොඩාක් අය සමඟ වැඩ කළා. ඒ සියලුමදෙනාගෙන් මම ගුරුහරුකම් ලබාගත්තා. ගුරුවරයෙක් අධ්යාපනයක් ලබා දුන්නට විභාගයට මුහුණ දෙනකොට ඔහු එන්නැහැනේ පිළිතුරු ලියන්න. අන්න ඒ වගේ තමයි මමත් සියල්ලටම තනියම මුහුණ දෙනවා. අධ්යක්ෂණය කියන්නේ පහසු කටයුත්තක් නෙවෙයි.
ඔබ මේ ක්ෂේත්රයට දරුවන් රැසක් බිහි කළ මවක්. ඔවුන් නිර්මාණ තුළ දකින සතුට කොයි වගේද?
මගේ දරුවන්ගේ දෙවැනි අම්මා විදියට තමයි ඔවුන් මට සලකන්නේ. ඔවුන්ගේ මවට දැනෙන සතුට මටත් දැනෙනවා. සමහර අවස්ථාවල ඒ දරුවන් සමඟ මටද රඟපාන්න සිදුවෙනවා. මගේ දරුවෝ මේ ක්ෂේත්රයේ විවිධ අංශවල වැඩ කරනවා. ඒ සියලුමදෙනා මගේ රංග පාසලෙන් බිහිවුණු දරුවන්.
වසන්ත විතාරණගේ
